ਹਨੋਵਰ, 4 ਅਗਸਤ (ਪੋਸਟ ਬਿਉੂਰੋ)- ਬਲੂਚ ਰਿਪਬਲਿਕਨ ਪਾਰਟੀ (ਬੀ ਆਰ ਪੀ) ਨੇ ਪਿੱਛੇ ਜਿਹੇੇ ਲਾਹੌਰ ਤੋਂ ਕਰੀਬ 400 ਕਿਲੋਮੀਟਰ ਦੂਰ ਰਾਜਨਪੁਰ ਵਿੱਚ ਪੰਜਾਬ ਪੁਲਸ ਵਲੋਂ ਅਗਵਾ ਕੀਤੇ ਪੰਜ ਬੁਗਤੀ ਲੋਕਾਂ ਦੀ ਬੇਰਹਿਮ ਹੱਤਿਆ ਦੇ ਖ਼ਿਲਾਫ਼ ਜਰਮਨੀ ਦੇ ਹਨੋਵਰ ਵਿੱਚ ਵਿਰੋਧ ਪ੍ਰਦਰਸ਼ਨ ਕੀਤਾ ਹੈ।
ਪ੍ਰਦਰਸ਼ਨਕਾਰੀਆਂ ਨੇ ਕਿਹਾ ਕਿ ਉਨ੍ਹਾਂ ਦਾ ਮਕਸਦ ਪਾਕਿਸਤਾਨੀ ਅਧਿਕਾਰੀਆਂ ਵੱਲੋਂ ਬਲੂਚਿਸਤਾਨ ਦੇ ਲੋਕਾਂ 'ਤੇ ਕੀਤੇ ਜਾਂਦੇ ਜੁਲਮਾਂ ਨੂੰ ਉਜਾਗਰ ਕਰਨਾ ਅਤੇ ਮਨੁੱਖੀ ਅਧਿਕਾਰਾਂ ਦੇ ਘਾਣ ਵਿਰੁੱਧ ਆਵਾਜ਼ ਉਠਾਉਣਾ ਸੀ। ਇਸ ਦੌਰਾਨ ਉਨ੍ਹਾਂ ਨੇ ਇੱਕ ਸਮਾਜਿਕ ਮੁਹਿੰਮ ਜਸਟਿਸ ਫਾਰ ਬਲੂਚ ਪੀਪਲ ਵੀ ਸ਼ੁਰੂ ਕੀਤੀ ਹੈ। ਬੀ ਆਰ ਪੀ ਜਰਮਨੀ ਦੇ ਪ੍ਰਧਾਨ ਜਾਵਦ ਬਲੂਚ ਨੇ ਮਨੁੱਖੀ ਅਧਿਕਾਰ ਸੰਸਥਾਨਾਂ ਤੋਂ ਅਗਵਾ ਕੀਤੇ ਗਏ ਆਦੀਵਾਸੀ ਬਲੂਚ ਲੋਕਾਂ ਦੀ ਹੱਤਿਆ ਦਾ ਮਾਮਲਾ ਉਠਾਉਣ ਦੀ ਅਪੀਲ ਕੀਤੀ ਹੈ। ਬਲੂਚ ਕਾਰਜਕਰਤਾਵਾਂ ਨੇ ਕਿਹਾ ਕਿ ਰਾਜਨਪੁਰ ਵਿੱਚ 31 ਜੁਲਾਈ ਨੂੰ ਫਰਜੀ ਮੁਕਾਬਲਾ ਹੋਇਆ ਅਤੇ ਪੀੜਤਾਂ ਨੂੰ ਵੱਖ-ਵੱਖ ਥਾਂਵਾਂ ਤੋਂ ਅਗਵਾ ਕਰ ਕੇ ਉਨ੍ਹਾਂ ਦੀ ਹੱਤਿਆ ਕੀਤੀ ਗਈ ਹੈ।