ਵੁਈ ਚੈਰਿਟੀ ਵਿਵਾਦ ਤੋਂ ਬਾਅਦ ਚੈਰਿਟੀਜ਼ ਨੂੰ ਵਿਸ਼ਵਾਸ ਤੇ ਡੋਨੇਸ਼ਨਜ਼ ਖੁੱਸਣ ਦਾ ਡਰ
ਓਟਵਾ, 3 ਅਗਸਤ (ਪੋਸਟ ਬਿਊਰੋ) : ਬਹੁਤਿਆਂ ਨੂੰ ਲੱਗਦਾ ਸੀ ਕਿ ਗਰਮੀਆਂ ਤੱਕ ਸੱਭ ਨੌਰਮਲ ਹੋ ਜਾਵੇਗਾ ਪਰ ਅਜਿਹਾ ਹੋ ਨਹੀਂ ਸਕਿਆ| ਭਾਵੇਂ ਓਨਟਾਰੀਓ ਦੇ ਬਹੁਤੇ ਹਿੱਸੇ ਤੀਜੇ ਪੜਾਅ ਵਿੱਚ ਦਾਖਲ ਹੋ ਚੁੱਕੇ ਹਨ ਪਰ ਅਜੇ ਵੀ ਹਾਲਾਤ ਪੂਰੀ ਤਰ੍ਹਾਂ ਨੌਰਮਲ ਨਹੀਂ ਹੋਏ| ਇਸ ਮਹਾਂਮਾਰੀ ਤੋਂ ਕਈ ਲੋਕਾਂ ਨੂੰ ਨੁਕਸਾਨ ਹੋਇਆ ਹੈ| ਕੁੱਝ ਬਿਮਾਰ ਪਏ ਅਤੇ ਕੁਝ ਤਾਂ ਮੌਤ ਦੇ ਮੂੰਹ ਜਾ ਪਏ| ਕਈਆਂ ਦੀਆਂ ਨੌਕਰੀਆਂ ਖੁੱਸ ਗਈਆਂ ਤੇ ਉਨ੍ਹਾਂ ਨੂੰ ਕੰਮ ਜਲਦ ਮਿਲਣ ਦੀ ਆਸ ਵੀ ਨਹੀਂ|
ਚੈਰੀਟੇਬਲ ਸੈਕਟਰ-ਜਿਹੜਾ ਫੁੱਲ ਟਾਈਮ ਵਰਕਫੋਰਸ ਦੇ 10 ਫੀ ਸਦੀ ਨੂੰ ਰੋਜ਼ਗਾਰ ਦਿੰਦਾ ਹੈ ਤੇ ਜੀਡੀਪੀ ਵਿੱਚ ਅੱਠ ਫੀ ਸਦੀ ਦੀ ਹਿੱਸੇਦਾਰੀ ਪਾਉਂਦਾ ਹੈ, ਦੀਆਂ ਪੰਜ ਵਿੱਚੋਂ ਇੱਕ ਸੰਸਥਾਵਾਂ ਨੂੰ ਆਪਣੇ ਕੰਮ ਜਾਂ ਤਾਂ ਮੁਲਤਵੀ ਕਰਨੇ ਪੈ ਰਹੇ ਹਨ ਤੇ ਜਾਂ ਫਿਰ ਕੋਵਿਡ-19 ਕਾਰਨ ਆਪਣੇ ਪ੍ਰੋਗਰਾਮ ਰੱਦ ਕਰਨੇ ਪੈ ਰਹੇ ਹਨ| ਕਈ ਚੈਰਿਟੀਜ਼ ਤਾਂ ਆਪਣੇ ਦਰਵਾਜੇæ ਬੰਦ ਕਰ ਚੁੱਕੀਆਂ ਹਨ| ਇਹ ਖੁਲਾਸਾ ਇਮੈਜਿਨ ਕੈਨੇਡਾ ਦੀ ਰਿਪੋਰਟ ਤੋਂ ਹੋਇਆ ਹੈ|
ਇਸ ਰਿਪੋਰਟ ਵਿੱਚ ਇਹ ਵੀ ਪਾਇਆ ਗਿਆ ਕਿ 2008 ਦੇ ਮੰਦਵਾੜੇ ਨਾਲੋਂ ਕੋਵਿਡ-19 ਦਾ ਅਸਰ ਇਨ੍ਹਾਂ ਚੈਰਿਟੀਜ਼ ਉੱਤੇ ਬਹੁਤਾ ਨਕਾਰਾਤਮਕ ਰਿਹਾ ਹੈ| ਦੋ ਤਿਹਾਈ ਚੈਰਿਟੀਜ਼ ਦੀ ਆਮਦਨ ਵਿੱਚ 31 ਫੀ ਸਦੀ ਕਮੀ ਦਰਜ ਕੀਤੀ ਗਈ ਹੈ| ਇਸ ਨਾਲ ਬਹੁਤੇ ਕੈਨੇਡੀਅਨ, ਖਾਸ ਤੌਰ ਉੱਤੇ ਕਮਜ਼ੋਰ ਵਰਗ ਨੂੰ ਕਾਫੀ ਨੁਕਸਾਨ ਹੋਵੇਗਾ|
ਮਹਾਂਮਾਰੀ ਦੀ ਮਾਰ ਸਹਿ ਰਹੀਆਂ ਚੈਰਿਟੀਜ਼ ਨੂੰ ਇੱਕ ਚਿੰਤਾ ਹੋਰ ਸਤਾ ਰਹੀ ਹੈ ਤੇ ਉਹ ਹੈ ਵਿਸ਼ਵਾਸ ਗੁਆਚਣ ਦੀ| ਵੁਈ ਚੈਰਿਟੀ ਵਿਵਾਦ ਤੋਂ ਬਾਅਦ ਲਿਬਰਲ ਸਰਕਾਰ ਵੱਲੋਂ ਇਸ ਚੈਰਿਟੀ ਨਾਲ ਕੀਤੀ ਡੀਲ ਰੱਦ ਕਰਨ ਮਗਰੋਂ ਆਮ ਤੌਰ ਉੱਤੇ ਹੀ ਹੁਣ ਕੈਨੇਡੀਅਨਾਂ ਦਾ ਭਰੋਸਾ ਚੈਰਿਟੀਜ਼ ਵਿੱਚੋਂ ਉਠ ਗਿਆ ਲੱਗਦਾ ਹੈ| ਕੋਵਿਡ-19 ਮਹਾਂਮਾਰੀ ਕਾਰਨ ਇਨ੍ਹਾਂ ਚੈਰਿਟੀਜ਼ ਨੂੰ ਮਿਲਣ ਵਾਲੀ ਡੋਨੇਸ਼ਨ ਪਹਿਲਾਂ ਹੀ ਘੱਟ ਗਈ ਸੀ| ਇਮੈਜਿਨ ਕੈਨੇਡਾ ਦੇ ਚੀਫ ਐਗਜ਼ੈਕਟਿਵ ਬਰੂਸ ਮੈਕਡੌਨਲਡ ਨੇ ਆਖਿਆ ਕਿ ਚੈਰਿਟੀਜ਼ ਨੂੰ ਹੋਣ ਵਾਲੀ 48 ਫੀ ਸਦੀ ਆਮਦਨ ਡੋਨੇਸ਼ਨਜ਼ ਤੋਂ ਹੀ ਹੁੰਦੀ ਹੈ|
ਇੱਕ ਹੋਰ ਚਿੰਤਾ ਇਹ ਵੀ ਹੈ ਕਿ ਸਰਕਾਰਾਂ ਹੁਣ ਚੈਰਿਟੀਜ਼ ਨਾਲ ਭਾਈਵਾਲੀ ਕਰਨ ਤੋਂ ਕਤਰਾਉਣਗੀਆਂ| ਪਰ ਆਈ ਲੀਡ, ਕੈਨੇਡਾ ਹੈਲਪਜ਼ ਨੇ ਇਮੈਜਿਨ ਕੈਨੇਡਾ ਨਾਲ ਰਲ ਕੇ ਕੋਵਿਡ-19 ਚੈਰਿਟੀ ਅਡੈਪਟੇਸ਼ਨ ਐਂਡ ਇਨੋਵੇਸ਼ਨ ਫੰਡ ਲਾਂਚ ਕੀਤਾ ਹੈ| ਜਿਸ ਨਾਲ ਕੈਨੇਡੀਅਨਾਂ ਲਈ 400 ਸੰਸਥਾਵਾਂ ਦੀ ਸਹਾਇਤਾ ਕਰਨੀ ਸੌਖੀ ਹੋ ਸਕੇਗੀ| ਇਸ ਤਰ੍ਹਾਂ ਕੈਨੇਡੀਅਨ ਇਸ ਸੈਕਟਰ ਦੀ ਮਦਦ ਕਰ ਸਕਣਗੇ ਅਤੇ ਅਗਾਂਹ ਚੈਰਿਟੀਜ਼ ਕਮਜ਼ੋਰ ਵਰਗ ਦੀ ਮਦਦ ਕਰ ਸਕਣਗੀਆਂ|