ਘਰਾਂ ਦੇ ਬਾਹਰ ਲੱਗੀ ਅੱਗ ਨੂੰ ਬੁਝਾਉਣ ਤੋਂ ਬਾਅਦ ਫਾਇਰਫਾਈਟਰਜ਼ ਨੂੰ ਮਿਲੀ ਇੱਕ ਲਾਸ਼
ਟੋਰਾਂਟੋ, 31 ਜੁਲਾਈ (ਪੋਸਟ ਬਿਊਰੋ) : ਅੱਜ ਸਵੇਰੇ ਬਰੈਂਪਟਨ ਦੇ ਰਿਹਾਇਸ਼ੀ ਇਲਾਕੇ ਦੇ ਘਰਾਂ ਦੇ ਬਾਹਰ ਲੱਗੀ ਅੱਗ ਨੂੰ ਬੁਝਾਉਣ ਤੋਂ ਬਾਅਦ ਫਾਇਰਫਾਈਟਰਜ਼ ਨੂੰ ਇੱਕ ਲਾਸ਼ ਮਿਲੀ| ਇਹ ਜਾਣਕਾਰੀ ਪੀਲ ਰੀਜਨਲ ਪੁਲਿਸ ਵੱਲੋਂ ਦਿੱਤੀ ਗਈ|
ਬਲੈਕਚੈਰੀ ਲੇਨ ਤੇ ਸਨੀ ਮੈਡੋਅ ਬੋਲੀਵੀਆਰਡ ਇਲਾਕੇ ਵਿੱਚ ਸੈਰ ਕਰ ਰਹੇ ਇੱਕ ਵਿਅਕਤੀ ਵੱਲੋਂ ਘਰਾਂ ਦੇ ਬਾਹਰਵਾਰ ਗ੍ਰੀਨ ਸਪੇਸ ਉੱਤੇ ਲੱਗੀ ਅੱਗ ਵੇਖਣ ਤੋਂ ਬਾਅਦ ਸਵੇਰੇ 3:00 ਵਜੇ ਬਰੈਂਪਟਨ ਫਾਇਰ ਨੂੰ ਸੱਦਿਆ ਗਿਆ| ਪੁਲਿਸ ਨੇ ਦੱਸਿਆ ਕਿ ਅੱਗ ਉੱਤੇ ਕਾਬੂ ਪਾ ਲਏ ਜਾਣ ਤੋਂ ਬਾਅਦ ਉੱਥੋਂ ਇੱਕ ਲਾਸ਼ ਮਿਲੀ|
ਖਬਰ ਲਿਖੇ ਜਾਣ ਤੱਕ ਕਈ ਅਧਿਕਾਰੀ ਤੇ ਕੌਰੋਨਰ ਵੀ ਮੌਕੇ ਉੱਤੇ ਹੀ ਮੌਜੂਦ ਸਨ|
ਜਾਂਚਕਾਰਾਂ ਵੱਲੋਂ ਅਜੇ ਮ੍ਰਿਤਕ ਦੀ ਉਮਰ ਤੇ ਲਿੰਗ ਦੀ ਜਾਣਕਾਰੀ ਨਹੀਂ ਦਿੱਤੀ ਗਈ ਹੈ| ਜਾਂਚਕਾਰਾਂ ਵੱਲੋਂ ਇਹ ਵੀ ਨਹੀਂ ਆਖਿਆ ਗਿਆ ਕਿ ਇਹ ਅੱਗ ਸ਼ੱਕੀ ਸੀ ਜਾਂ ਨਹੀਂ ਪਰ ਹੋਮੀਸਾਈਡ ਯੂਨਿਟ ਦੇ ਮੈਂਬਰਾਂ ਨੂੰ ਇਸ ਦੀ ਜਾਣਕਾਰੀ ਦੇ ਦਿੱਤੀ ਗਈ ਹੈ|