ਖੋਸਤ (ਅਫਗਾਨਿਸਤਾਨ), 30 ਜੁਲਾਈ (ਪੋਸਟ ਬਿਊਰੋ)- ਤਾਲਿਬਾਨ ਅੱਤਵਾਦੀਆਂ ਅਤੇ ਪਾਕਿਸਤਾਨੀ ਫੌਜ ਵੱਲੋਂ ਅਫਗਾਨ ਸਰਹੱਦ 'ਤੇ ਕੀਤੇ ਜਾ ਰਹੇ ਰਾਕੇਟ ਹਮਲਿਆਂ ਦੇ ਖ਼ਿਲਾਫ਼ ਅਫਗਾਨਾਂ ਅਤੇ ਪਸ਼ਤੂਨਾਂ ਨੇ ਦੋ ਦਿਨ ਤੱਕ ਦੁਨੀਆ ਭਰ 'ਚ ਵਿਰੋਧ ਪ੍ਰਦਰਸ਼ਨ ਕੀਤੇ। ਖੋਸਤ ਅਤੇ ਪਕਤਿਕਾ ਰਾਜਾਂ 'ਚ ਪ੍ਰਦਰਸ਼ਨਕਾਰੀਆਂ ਦਾ ਕਹਿਣਾ ਸੀ ਕਿ ਪਾਕਿਸਤਾਨ ਨੇ ਫੌਜੀ ਚੌਂਕੀਆਂ ਬਣਾ ਕੇ ਨਾਜਾਇਜ਼ ਤੌਰ 'ਤੇ ਅਫਗਾਨ ਖੇਤਰ 'ਚ ਘੁਸਪੈਠ ਦੀ ਕੋਸ਼ਿਸ਼ ਕੀਤੀ ਹੈ।
ਖੋਸਤ ਅਤੇ ਪਕਤਿਕਾ ਦੋਵੇਂ ਸ਼ਹਿਰ ਦੇਸ਼ ਦੇ ਦੱਖਣ-ਪੂਰਬੀ ਭਾਗ 'ਚ ਹਨ ਅਤੇ ਪਾਕਿਸਤਾਨ ਦੇ ਨਾਲ ਡੁਰੰਡ ਲਾਈਨ ਸਰਹੱਦ ਨਾਲ ਲਗਦੇ ਹਨ। ਪ੍ਰਦਰਸ਼ਨਕਾਰੀਆਂ ਨੇ ਡੁਰੰਡ ਲਾਈਨ ਦੇ ਦੋਵੇਂ ਪਾਸੇ ਕਬਜ਼ੇ ਵਿੱਚ ਲਈ ਥਾਂ ਨੂੰ ਖਾਲੀ ਕਰਨ ਲਈ ਕਿਹਾ ਹੈ। ਜਾਣਕਾਰ ਸੂਤਰਾਂ ਮੁਤਾਬਕ ਅਫਗਾਨ ਜ਼ਮੀਨ ਉੱਤੇ ਪਾਕਿਸਤਾਨੀ ਫੌਜ ਵੱਲੋਂ ਲਗਾਤਾਰ ਕੀਤੀ ਜਾ ਰਹੀ ਗੋਲੀਬਾਰੀ ਵਿੱਚ ਪਿਛਲੇ ਦਿਨਾਂ 'ਚ ਕਈ ਨਾਗਰਿਕ ਜ਼ਖ਼ਮੀ ਹੋਏ ਹਨ ਅਤੇ ਉਨ੍ਹਾਂ ਦੇ ਘਰਾਂ ਅਤੇ ਜਾਇਦਾਦ ਨੂੰ ਨੁਕਸਾਨ ਹੋਇਆ ਹੈ। ਅਫਗਾਨ ਵਿਦੇਸ਼ ਮੰਤਰਾਲਾ ਨੇ ਕਿਹਾ ਸੀ ਕਿ ਪੂਰਬੀ ਕੁਨਾਰ ਪ੍ਰਾਂਤ ਵਿੱਚ ਵਿਵਾਦ ਪੂਰਨ ਸਰਹੱਦੀ ਖੇਤਰ 'ਤੇ ਪਾਕਿਸਤਾਨ 2017 ਦੇ ਮੱਧ ਤੋਂ ਵਾੜ ਲਾ ਰਿਹਾ ਹੈ।
ਪਖਤੂਨ ਤਹਿਫੁੱਜ ਮੂਵਮੈਂਟ (ਪੀ ਟੀ ਐਮ) ਦੇ ਬੈਨਰ ਹੇਠ ਵੱਡੀ ਗਿਣਤੀ 'ਤੇ ਪਸ਼ਤੂਨਾਂ ਨੇ ਪ੍ਰਦਰਸ਼ਨਾਂ ਵਿੱਚ ਹਿੱਸਾ ਲਿਆ। ਗਾਰਡੇਜ (ਪਰਟੀਆ) ਅਤੇ ਉਰਗੋਨ (ਪਕਤਿਕਾ) 'ਚ ਵੱਡੀਆਂ ਸਭਾਵਾਂ ਹੋਈਆਂ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਪਾਕਿ ਤਾਲਿਬਾਨ ਕੈਡਰ ਨਿਰਦੋਸ਼ ਅਫਗਾਨਾਂ 'ਤੇ ਹਮਲੇ ਕਰ ਰਹੇ ਹਨ। ਇਸਦੇ ਨਾਲ ਪੀ ਟੀ ਐਮ ਦੀਆਂ ਵਿਦੇਸ਼ੀ ਇਕਾਈਆਂ ਨੇ ਵੀ ਕਤਲੇਆਮ ਦੇ ਖ਼ਿਲਾਫ਼ ਯੂਰਪ 'ਚ ਵਿਰੋਧ ਪ੍ਰਦਰਸ਼ਨ ਕੀਤੇ। ਜਰਮਨੀ, ਬੈਲਜੀਅਮ ਅਤੇ ਸਵੀਡਨ 'ਚ ਵੀ ਜ਼ੋਰਦਾਰ ਪ੍ਰਦਰਸ਼ਨ ਹੋਏ। ਉਨ੍ਹਾਂ ਨੇ ਅੰਦੋਲਨਕਾਰੀ ਹਨੀਫ ਪਸ਼ਤੂਨ ਨੂੰ ਹਿਰਾਸਤ 'ਤੇ ਲੈਣ ਦਾ ਮਾਮਲਾ ਵੀ ਉਠਾਇਆ।