ਟੋਰਾਂਟੋ ਪੀਅਰਸਨ ਏਅਰਪੋਰਟ ਉੱਤੇ ਹੁਣ
ਤਾਪਮਾਨ ਦੀ ਸਕ੍ਰੀਨਿੰਗ ਹੋਈ ਲਾਜ਼ਮੀ
ਟੋਰਾਂਟੋ, 30 ਜੁਲਾਈ (ਪੋਸਟ ਬਿਊਰੋ) : ਟੋਰਾਂਟੋ ਦੇ ਪੀਅਰਸਨ ਏਅਰਪੋਰ ਸਮੇਤ ਕੈਨੇਡਾ ਦੇ 15 ਸੱਭ ਤੋਂ ਮਸ਼ਰੂਫ ਰਹਿਣ ਵਾਲੇ ਏਅਰਪੋਰਟਸ ਉੱਤੇ ਪੜਾਅਵਾਰ ਟੈਂਪਰੇਚਰ ਦੀ ਸਕ੍ਰੀਨਿੰਗ ਕੀਤੀ ਜਾਇਆ ਕਰੇਗੀ| ਇਹ ਸਿਲਸਿਲਾ ਅੱਜ ਤੋਂ ਸ਼ੁਰੂ ਹੋਣ ਜਾ ਰਿਹਾ ਹੈ|
ਇਹ ਨਿਯਮ ਅੱਜ ਤੋਂ ਵੈਨਕੂਵਰ, ਕੈਲਗਰੀ ਤੇ ਮਾਂਟਰੀਅਲ ਸਥਿਤ ਕੌਮਾਂਤਰੀ ਏਅਰਪੋਰਟਸ ਉੱਤੇ ਵੀ ਸ਼ੁਰੂ ਹੋਣ ਜਾ ਰਿਹਾ ਹੈ| 30 ਸਤੰਬਰ ਨੂੰ ਜਾਂ ਇਸ ਤੋਂ ਪਹਿਲਾਂ ਕੈਨੇਡਾ ਦੇ 11 ਏਅਰਪੋਰਟਸ, ਜਿਨ੍ਹਾਂ ਵਿੱਚ ਸੇਂਟ ਜੌਹਨਸ, ਹੈਲੀਫੈਕਸ, ਕਿਊਬਿਕ ਸਿਟੀ, ਓਟਵਾ, ਟੋਰਾਂਟੋ ਬਿਲੀ ਬਿਸ਼ਪ, ਵਿਨੀਪੈਗ, ਰੇਜਾਈਨਾ, ਸਸਕਾਟੂਨ, ਐਡਮੰਟਨ, ਕੈਲੋਨਾ ਤੇ ਵਿਕਟੋਰੀਆ ਸ਼ਾਮਲ ਹਨ, ਵਿਖੇ ਇਹ ਨਿਯਮ ਲਾਜ਼ਮੀ ਹੋ ਗਿਆ ਹੈ|
ਦ ਕੈਨੇਡੀਅਨ ਏਅਰ ਟਰਾਂਸਪੋਰਟ ਸਕਿਊਰਿਟੀ ਅਥਾਰਟੀ (ਕੈਟਸਾ) ਦਾ ਕਹਿਣਾ ਹੈ ਕਿ ਇਨ੍ਹਾਂ ਏਅਰਪੋਰਟਸ ਤੋਂ ਲੰਘਣ ਵਾਲੇ ਸਾਰੇ ਯਾਤਰੀਆਂ ਨੂੰ ਟੈਂਪਰੇਚਰ ਸਕਰੀਨਿੰਗ ਲਾਜ਼ਮੀ ਤੌਰ ਉੱਤੇ ਕਰਵਾਉਣਾ ਹੋਵੇਗਾ| ਯਾਤਰੀਆਂ ਦਾ ਤਾਪਮਾਨ ਜਾਂ ਤਾਂ ਟੈਂਪਰੇਚਰ ਸਕੈਨਿੰਗ ਕੈਮਰੇ ਤੇ ਜਾਂ ਫਿਰ ਹੱਥ ਵਿੱਚ ਫੜ੍ਹੇ ਜਾਣ ਵਾਲੇ ਥਰਮਾਮੀਟਰ ਨਾਲ ਜਾਂਚਿਆ ਜਾਵੇਗਾ|
38 ਡਿਗਰੀ ਸੈਲਸੀਅਸ ਤੋਂ ਘੱਟ ਤਾਪਮਾਨ ਵਾਲੇ ਯਾਤਰੀਆਂ ਨੂੰ ਚੈਕਪੁਆਇੰਟ ਤੱਕ ਪਹੁੰਚ ਕਰਨ ਦੀ ਇਜਾਜ਼ਤ ਹੋਵੇਗੀ| ਜਿਨ੍ਹਾਂ ਦਾ ਤਾਪਮਾਨ 38 ਡਿਗਰੀ ਸੈਲਸੀਅਸ ਉੱਤੇ ਜਾਂ ਇਸ ਤੋਂ ਵੱਧ ਹੋਵੇਗਾ, ਉਨ੍ਹਾਂ ਨੂੰ ਵੇਟਿੰਗ ਏਰੀਆ ਵਿੱਚ 10 ਮਿੰਟ ਤੱਕ ਉਡੀਕ ਕਰਨ ਲਈ ਆਖਿਆ ਜਾਵੇਗਾ| ਉਨ੍ਹਾਂ ਨੂੰ ਇਸ ਸਬੰਧ ਵਿੱਚ ਮੈਡੀਕਲ ਸਰਟੀਫਿਕੇਟ ਵੀ ਦੇਣਾ ਹੋਵੇਗਾ ਕਿ ਉਨ੍ਹਾਂ ਦਾ ਤਾਪਮਾਨ ਕੋਵਿਡ-19 ਕਾਰਨ ਨਹੀਂ ਵਧਿਆ ਸੀ| ਜੇ ਦੂਜੀ ਰੀਡਿੰਗ ਵਿੱਚ ਵੀ ਤਾਪਮਾਨ ਨਿਰਧਾਰਤ ਤਾਪਮਾਨ ਤੋਂ ਜ਼ਿਆਦਾ ਆਉਂਦਾ ਹੈ ਤੇ ਜੇ ਯਾਤਰੀ ਦੂਜੀ ਰੀਡਿੰਗ ਨਹੀਂ ਲੈਣ ਦਿੰਦਾ ਤਾਂ ਉਸ ਨੂੰ ਜਹਾਜ਼ ਨਹੀਂ ਚੜ੍ਹਨ ਦਿੱਤਾ ਜਾਵੇਗਾ|
ਕੈਨੇਡੀਅਨ ਏਅਰਪੋਰਟਸ ਉੱਤੇ ਮਾਸਕਸ ਜਾਂ ਫੇਸ ਕਵਰਿੰਗ ਲਾਜ਼ਮੀ ਹਨ| ਸਿਹਤ ਤੇ ਮੈਡੀਕਲ ਕਾਰਨਾਂ ਕਰਕੇ ਕੁੱਝ ਯਾਤਰੀਆਂ ਨੂੰ ਇਨ੍ਹਾਂ ਨਿਯਮਾਂ ਤੋਂ ਛੋਟ ਦਿੱਤੀ ਗਈ ਹੈ ਤੇ ਇਸੇ ਤਰ੍ਹਾਂ ਦੋ ਸਾਲ ਤੋਂ ਘਟ ਉਮਰ ਦੇ ਬੱਚਿਆਂ ਨੂੰ ਵੀ ਇਨ੍ਹਾਂ ਨਿਯਮਾਂ ਤੋਂ ਛੋਟ ਹੈ|