ਬੰਗਲਾ, ਤੇਲਗੂ ਦੇ ਨਾਲ ਹਿੰਦੀ ਸਿਨੇਮਾ ਵਿੱਚ ਸਰਗਰਮ ਅਭਿਨੇਤਾ ਜੀਸ਼ੂ ਸੇਨਗੁਪਤਾ ਫਿਲਮ ‘ਸ਼ਕੁੰਤਲਾ ਦੇਵੀ’ ਵਿੱਚ ਵਿਦਿਆ ਬਾਲਨ ਦੇ ਆਪੋਜ਼ਿਟ ਨਜ਼ਰ ਆਉਣਗੇ। ਉਹ ਸ਼ਕੰੁਤਲਾ ਦੇਵੀ ਦੇ ਪਤੀ ਪਾਰਿਤੋਸ਼ ਬੈਨਰਜੀ ਦੀ ਭੂਮਿਕਾ ਨਿਭਾ ਰਹੇ ਹਨ। ਜੀਸ਼ੂ ਮੁਤਾਬਕ ਉਹ ਪੜ੍ਹਾਈ ਵਿੱਚ ਵਧੀਆ ਨਹੀਂ ਸਨ, ਪਰ ਗਣਿਤ ਵਿੱਚ ਠੀਕ-ਠਾਕ ਸਨ। ਵਿਦਿਆ ਨਾਲ ਕੰਮ ਕਰਨ ਬਾਰੇ ਜੀਸ਼ੂ ਨੇ ਦੱਸਿਆ, ‘‘ਉਹ ਊਰਜਾ ਨਾਲ ਲਬਰੇਜ ਰਹਿੰਦੀ ਹੈ। ਉਹ ਫਰਾਟੇਦਾਰ ਬੰਗਲਾ ਬੋਲਦੀ ਹੈ। ਅਸੀਂ ਸੈੱਟ 'ਤੇ ਜ਼ਿਆਦਾਤਰ ਸਮਾਂ ਬੰਗਲਾ ਵਿੱਚ ਗੱਲ ਕਰਦੇ ਸੀ। ਅਸੀਂ ਜਦ ਗੱਲ ਕਰਦੇ ਤਾਂ ਡਾਇਰੈਕਟਰ ਅਤੇ ਲੇਖਕ ਅਨੂ ਮੈਨਨ ਸਾਡੇ ਵੱਲ ਦੇਖਦੀ। ਬਾਅਦ ਵਿੱਚ ਪੁੱਛਦੀ ਕਿ ਤੁਸੀਂ ਕੀ ਗੱਲ ਕਰ ਰਹੇ ਸਨ, ਤਾਂ ਅਸੀਂ ਕਹਿੰਦੇ ਸੀ ਸੀਨ ਦੇ ਬਾਰੇ ਗੱਲ ਕਰ ਰਹੇ ਸੀ। ਇਸ ਸ਼ਰਾਰਤ ਦੇ ਪਿੱਛੇ ਵਿਦਿਆ ਹੁੰਦੀ ਸੀ।”
ਆਪਣੇ ਕਿਰਦਾਰ ਬਾਰੇ ਜੀਸ਼ੂ ਨੇ ਦੱਸਿਆ ਕਿ ‘ਸ਼ਕੁੰਤਲਾ ਦੇਵੀ’ ਲਈ ਅਨੁ ਮੈਨਨ ਨੇ ਰਿਸਰਚ ਬੜੀ ਗੰਭੀਰਤਾ ਨਾਲ ਕੀਤੀ ਹੈ। ਸ਼ੂਟਿੰਗ 'ਤੇ ਜਾਣ ਤੋਂ ਪਹਿਲਾਂ ਉਨ੍ਹਾਂ ਕੋਲ ਹਰ ਸਵਾਲ ਦਾ ਜਵਾਬ ਹੁੰਦਾ ਸੀ। ਮੈਨੂੰ ਸਾਰੀ ਜਾਣਕਾਰੀ ਅਨੂ ਤੇ ਵਿਦਿਆ ਤੋਂ ਮਿਲੀ। ਦਰਅਸਲ ਉਹ ਦੋਵੇਂ ਸ਼ਕੁੰਤਲਾ ਦੇਵੀ ਦੀ ਬੇਟੀ ਅਨੁਪਮਾ ਨੂੰ ਮਿਲੇ ਸਨ। ਪਾਰਿਤੋਸ਼ ਬੈਨਰਜੀ ਦੇ ਬਾਰੇ ਇੰਟਰਨੈਟ 'ਤੇ ਖਾਸ ਕੁਝ ਨਹੀਂ ਹੈ, ਇਸ ਲਈ ਉਸ ਕਿਰਦਾਰ ਵਿੱਚ ਮੈਂ ਆਪਣੀਆਂ ਚੀਜ਼ਾਂ ਵੀ ਪਾਈਆਂ ਹਨ। ਮੇਰਾ ਕੰਮ ਦੇਖਣ ਦੇ ਬਾਅਦ ਅਨੁਪਮਾ ਨੇ ਕਿਹਾ ਕਿ ਮੈਂ ਸਕਰੀਨ 'ਤੇ ਪਿਤਾ ਵਜੋਂ ਵਧੀਆ ਲੱਗਾ। ਇਹ ਬਿਹਤਰੀਨ ਕੰਪਲੀਮੈਂਟ ਸੀ। ਉਥੇ ‘ਪੀਕੂ' ਵਿੱਚ ਅਮਿਤਾਭ ਬੱਚਨ ਨਾਲ ਕੰਮ ਕਰਨ ਦੇ ਅਨੁਭਵ ਬਾਰੇ ਕਿਹਾ ਕਿ ਉਨ੍ਹਾਂ ਦੇ ਨਾਲ ਇਸ ਤੋਂ ਪਹਿਲਾਂ ਫਿਲਮ ‘ਦ ਲਾਸਟ ਲੀਅਰ’ ਵਿੱਚ ਕੰਮ ਕੀਤਾ ਸੀ। ਉਹ ਕੰਮ ਨੂੰ ਲੈ ਕੇ ਬਹੁਤ ਜਨੂੰਨੀ ਹਨ। ਜਦ ਮੈਂ ‘ਪੀਕੂ’ ਦੇ ਸੈੱਟ 'ਤੇ ਮਿਲਿਆ ਤਾਂ ਲੱਗਾ ਉਹ ਮੈਨੂੰ ਭੁੱਲ ਗਏ ਹੋਣਗੇ, ਪਰ ਮੈਨੂੰ ਦੇਖਦੇ ਹੋਏ ਪੁੱਛਿਆ ਜੀਸ਼ੂ ਕੀ ਹਾਲ ਏ? ਉਨ੍ਹਾਂ ਨੂੰ ਪਤਾ ਹੁੰਦਾ ਹੈ ਕਿ ਦੁਨੀਆ ਵਿੱਚ ਕੀ ਹੋ ਰਿਹਾ ਹੈ। ਬੰਗਲਾ ਸਿਨੇਮਾ ਦੀ ਵੀ ਜਾਣਕਾਰੀ ਰਹਿੰਦੀ ਹੈ।