ਫਰੀਦਕੋਟ, 12 ਜੁਲਾਈ (ਪੋਸਟ ਬਿਊਰੋ)- ਬਾਬਾ ਫਰੀਦ ਨਰਸਿੰਗ ਕਾਲਜ ਵਿੱਚ ਬੱਚਿਆਂ ਦੀ ਐਡਮਿਸ਼ਨ ਕਰਾਉਣ ਦੇ ਨਾਂਅ 'ਤੇ ਦੋ ਜਣਿਆਂ ਨੇ ਕਮਿਸ਼ਨ ਦੇ ਰੂਪ ਵਿੱਚ ਛੇ ਲੱਖ ਰੁਪਏ ਮੈਨੇਜਮੈਂਟ ਤੋਂ ਠੱਗ ਲਏ ਹਨ।
ਇਸ ਘਟਨਾ ਬਾਰੇ ਬਾਬਾ ਫਰੀਦ ਨਰਸਿੰਗ ਕਾਲਜ ਦੇ ਐੱਮ ਡੀ ਡਾਕਟਰ ਮਨਜੀਤ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਕੁਝ ਮਹੀਨੇ ਪਹਿਲਾਂ ਦੋ ਵਿਅਕਤੀ, ਜੋ ਆਪਣਾ ਨਾਂਅ ਭਗਤ ਸਿੰਘ ਅਤੇ ਅਨਵਰ ਵਾਸੀ ਗਯਾ ਬਿਹਾਰ ਦੱਸ ਰਹੇ ਸਨ, ਨੇ ਕਰੀਬ 55 ਬੱਚਿਆਂ ਦੀ ਐਡਮਿਸ਼ਨ ਸਾਡੇ ਬੀ ਐੱਸ ਸੀ ਨਰਸਿੰਗ ਕਾਲਜ ਵਿੱਚ ਕਰਾਉਣ ਦੀ ਪੇਸ਼ਕਸ਼ ਕੀਤੀ ਸੀ। ਉਨ੍ਹਾਂ ਦੱਸਿਆ ਕਿ ਕਾਲਜ ਵਿੱਚ ਸੀਟਾਂ ਖਾਲੀ ਹੋਣ ਕਾਰਨ ਅਸੀਂ ਹਾਮੀ ਭਰ ਦਿੱਤੀ ਤਾਂ ਉਨ੍ਹਾਂ ਨੇ ਪ੍ਰਤੀ ਸੀਟ 10 ਹਜ਼ਾਰ ਰੁਪਏ ਕਮਿਸ਼ਨ ਦੀ ਮੰਗ ਰੱਖੀ, ਜੋ ਅਸੀਂ ਮੰਨ ਲਈ। ਉਨ੍ਹਾਂ ਵੱਲੋਂ ਦਿਖਾਏ ਸਰਟੀਫਿਕੇਟ ਵੀ ਅਸਲੀ ਲੱਗੇ ਸਨ, ਜਿਸ 'ਤੇ 55 ਬੱਚਿਆਂ ਦੇ ਫਾਰਮ ਭਰ ਕੇ ਉਨ੍ਹਾਂ ਦਸਤਾਵੇਜ਼ਾਂ ਨਾਲ ਲਾ ਕੇ ਸਾਰਿਆਂ ਦੇ ਕਰੀਬ 39 ਲੱਖ ਰੁਪਏ ਦੇ ਬੈਂਕ ਡਰਾਫਟ ਫੀਸ ਵਜੋਂ ਜਮ੍ਹਾ ਕਰਵਾ ਦਿੱਤੇ ਗਏ। ਅਸੀਂ ਤੈਅ ਕਮਿਸ਼ਨ ਦੀ ਅੱਧੀ ਰਕਮ ਉਨ੍ਹਾਂ ਨੂੰ ਨਕਦ ਦੇ ਕੇ ਬਾਕੀ ਉਨ੍ਹਾਂ ਦੇ ਦੱਸੇ ਬੈਂਕ ਖਾਤੇ ਵਿੱਚ ਜਮ੍ਹਾ ਕਰਵਾ ਦਿੱਤੀ, ਜੋ ਕੁੱਲ ਛੇ ਲੱਖ ਰੁਪਏ ਸੀ। ਦੋ ਦਿਨ ਬਾਅਦ ਅਸੀਂ ਡਰਾਫਟ ਆਪਣੇ ਬੈਂਕ ਵਿੱਚ ਲਾਏ ਤਾਂ ਡਰਾਫਟ ਨਕਲੀ ਹਨ। ਇਸ ਪਿੱਛੋਂ ਸਾਨੂੰ ਆਪਣੇ ਨਾਲ ਹੋਈ ਠੱਗੀ ਦਾ ਪਤਾ ਲੱਗਾ ਤੇ ਅਸੀਂ ਪੁਲਸ ਨੂੰ ਸ਼ਿਕਾਇਤ ਦਿੱਤੀ। ਡੀ ਐੱਸ ਪੀ ਬਲਾਕਰ ਸਿੰਘ ਨੇ ਦੱਸਿਆ ਕਿ ਜਾਂਚ ਦੇ ਬਾਅਦ ਦੋ ਜਣਿਆਂ ਦੇ ਖਿਲਾਫ ਕੇਸ ਦਰਜ ਕੀਤਾ ਹੈ।