ਦੁਬਈ, 10 ਜੁਲਾਈ (ਪੋਸਟ ਬਿਊਰੋ)- ਦੁਬਈ 'ਚ ਰਹਿੰਦੇ ਭਾਰਤੀ ਨੌਜਵਾਨ ਨੇ ਅਦਭੁਤ ਕਾਰਨਾਮਾ ਕਰ ਦਿਖਾਇਆ ਹੈ ਅਤੇ ਦੇਸ਼ ਦੇ ਨਾਂਅ ਇੱਕ ਹੋਰ ਮਾਣ ਵਾਲੀ ਗੱਲ ਜੋੜ ਦਿੱਤੀ ਹੈ।
ਸੋਹਮ ਮੁਖਰਜੀ ਨੇ ਇੱਕ ਪੈਰ ਨਾਲ 101 ਵਾਰ ਛਾਲਾਂ ਮਾਰ ਕੇ ਆਪਣਾ ਨਾਂਅ ਗਿਨੀਜ਼ ਵਿਸ਼ਵ ਰਿਕਾਰਡ ਵਿੱਚ ਦਰਜ ਕਰਵਾ ਲਿਆ ਹੈ। ਇਸ ਕਾਰਨਾਮੇ ਦਾ ਵੀਡੀਓ ਸੋਹਮ ਨੇ ਅੱਪਲੋਡ ਕੀਤਾ ਸੀ ਅਤੇ ਸਾਰੇ ਮਾਪਦੰਡਾਂ ਨੂੰ ਧਿਆਨ 'ਚ ਰੱਖਦੇ ਹੋਏ ਗਿਨੀਜ਼ ਬੁੱਕ ਦੇ ਅਧਿਕਾਰੀਆਂ ਨੇ ਉਨ੍ਹਾਂ ਦੇ ਨਾਂਅ ਇਹ ਕਰਤਬ ਦਰਜ ਕੀਤਾ ਹੈ। ਦਿੱਲੀ ਨਾਲ ਸਬੰਧ ਰੱਖਦੇ ਸੋਹਾਮ ਮੁਖਰਜੀ ਨੇ 30 ਸੈਕੰਡ 'ਚ 96 ਵਾਰ ਛਾਲ ਮਾਰਨ ਦੇ ਪਿਛਲੇ ਰਿਕਾਰਡ ਨੂੰ ਤੋੜ ਦਿੱਤਾ ਹੈ। ਰਿਕਾਰਡ ਤੋੜਨ 'ਤੇ ਵਿਸ਼ਵ ਸੰਸਥਾ ਨੇ ਬਿਆਨ ਜਾਰੀ ਕਰ ਕੇ ਕਿਹਾ ਕਿ ਵੀਡੀਓ 'ਚ ਮੁਖਰਜੀ ਕੁੱਲ 110 ਵਾਰ ਟੱਪਿਆ, ਪਰ ਇਸ 'ਚੋਂ ਨੌ ਨੂੰ ਅਯੋਗ ਐਲਾਨ ਦਿੱਤਾ ਗਿਆ। ਮੁਖਰਜੀ ਨੇ ਕਿਹਾ ਕਿ ਇਸ ਨੂੰ ਦੋ ਕੈਮਰਿਆਂ ਨਾਲ ਰਿਕਾਰਡ ਕੀਤਾ ਗਿਆ ਤੇ ਕੋਲੋਂ ਇਸ ਨੂੰ ‘ਸਲੋਅ-ਮੋਸ਼ਨ' ਨਾਲ ਨਾਪਿਆ ਗਿਆ। ਮੁਖਰਜੀ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਰਿਕਾਰਡ ਨੂੰ ਨੇੜੇ ਤੋਂ ‘ਸਲੋਅ-ਮੋਸ਼ਨ ਵੀਡੀਓ' ਨਾਲ ਮਾਪਿਆ ਗਿਆ ਸੀ ਤਾਂ ਕਿ ਲਾਇਨ ਆਬਜੈਕਟ ਅਤੇ ਮੇਰੇ ਪੈਰ ਸਪੱਸ਼ਟ ਰੂਪ ਨਾਲ ਦਿਖਾਈ ਦੇਣ। ਮੁਖਰਜੀ ਨੇ ਇਸ ਦਾ ਸਿਹਰਾ ਆਪਣੇ ਸਰਗਰਮ ਖੇਡ ਜੀਵਨ ਨੂੰ ਦਿੰਦੇ ਹੋਏ ਕਿਹਾ ਕਿ ਤਾਇਕਵਾਂਡੋ 'ਚ 13 ਸਾਲਾਂ ਦੀ ਉਨ੍ਹਾਂ ਦੀ ਮਿਹਨਤ ਨੇ ਇਸ ਖ਼ਾਸ ਰਿਕਾਰਡ ਨੂੰ ਤੋੜਨ 'ਚ ਉਨ੍ਹਾਂ ਦੀ ਮਦਦ ਕੀਤੀ ਹੈ।