ਨਵੀਂ ਦਿੱਲੀ, 10 ਜੁਲਾਈ (ਪੋਸਟ ਬਿਊਰੋ)- ਸਰਕਾਰੀ ਹਵਾਬਾਜ਼ੀ ਕੰਪਨੀ ਏਅਰ ਇੰਡੀਆ ਨੂੰ ਖ਼ਰੀਦਣ ਲਈ ਲਾਈਨ ਵਿੱਚ ਟਾਟਾ ਗਰੁੱਪ ਇਕਲੌਤੀ ਬੋਲੀ ਦੇਣ ਵਾਲੀ ਕੰਪਨੀ ਹੈ, ਜਦ ਕਿ ਆਖ਼ਰੀ ਬੋਲੀ ਦੀ ਤਰੀਕ 'ਚ ਸਿਰਫ਼ ਇੱਕ ਮਹੀਨਾ ਰਹਿ ਗਿਆ ਹੈ। ਏਅਰਲਾਈਨ ਕਾਰੋਬਾਰ 'ਚ ਪਹਿਲਾਂ ਤੋਂ ਮੌਜੂਦ ਟਾਟਾ ਗਰੁੱਪ ਨੇ ਏਅਰ ਇੰਡੀਆ ਨੂੰ ਖ਼ਰੀਦਣ 'ਚ ਰੁਚੀ ਦਿਖਾਈ ਹੈ, ਜੋ ਕਿਸੇ ਸਮੇਂ ਟਾਟਾ ਦੇ ਕੋਲ ਹੀ ਹੁੰਦੀ ਸੀ।
ਵਿਸ਼ਵ ਪੱਧਰ 'ਤੇ ਹਵਾਬਾਜ਼ੀ ਕੰਪਨੀਆਂ ਕੋਵਿਡ-19 ਮਹਾਂਮਾਰੀ ਅਤੇ ਉਸ ਦੇ ਨਤੀਜੇ ਵਜੋਂ ਹਵਾਈ ਯਾਤਰਾ ਤੇ ਸੈਰ-ਸਪਾਟਾ 'ਚ ਆਈਆਂ ਮੁਸ਼ਕਿਲਾਂ ਕਾਰਨ ਗੰਭੀਰ ਸੰਕਟ 'ਚ ਹਨ। ਟਾਟਾ ਗਰੁੱਪ ਬੋਲੀ ਅੱਗੇ ਵਧਾ ਸਕਦਾ ਹੈ, ਜਦ ਕਿ ਇਸ ਦੀ ‘ਜੁਆਇੰਟ ਵੈਂਚਰ ਏਅਰਲਾਈਨ', ਸਿੰਗਾਪੁਰ ਏਅਰਲਾਈਨ ਨੇ ਕੋਵਿਡ-19 ਦੀਆਂ ਚਿੰਤਾਵਾਂ ਕਾਰਨ ਏਅਰ ਇੰਡੀਆ ਦੀ ਬੋਲੀ ਨਾਲ ਜੁੜਨ ਤੋਂ ਇਨਕਾਰ ਕਰ ਦਿੱਤਾ ਹੈ। ਟਾਟਾ ਗਰੁੱਪ ਫ਼ਿਲਹਾਲ ਏਅਰਲਾਈਨਜ਼ ਨੂੰ ਪੂਰਾ ਮਹੱਤਵ ਦੇ ਰਿਹਾ ਹੈ। ਬੋਲੀ ਦੀ ਅੰਤਿਮ ਮਿਤੀ 31 ਅਗਸਤ ਹੈ ਅਤੇ ਸਰਕਾਰ ਇਸ ਮਿਤੀ ਨੂੰ ਅੱਗੇ ਵਧਾਉਣ ਦੇ ਪੱਖ 'ਚ ਨਹੀਂ ਹੈ। ਏਅਰ ਇੰਡੀਆ ਕੋਵਿਡ-19 ਤੋਂ ਕਾਫ਼ੀ ਪਹਿਲਾਂ ਤੋਂ ਗੰਭੀਰ ਵਿੱਤੀ ਸੰਕਟ ਦਾ ਸਾਹਮਣਾ ਕਰ ਰਹੀ ਹੈ। ਮਹਾਂਮਾਰੀ ਦੇ ਅਸਰ ਨੇ ਖ਼ਾਸ ਤੌਰ 'ਤੇ ਹਵਾਬਾਜ਼ੀ ਖੇਤਰ 'ਚ ਸੱਟ ਮਾਰੀ ਹੈ ਅਤੇ ਇਸ ਦੀ ਵਿੱਤੀ ਸਥਿਤੀ ਹੋਰ ਖ਼ਰਾਬ ਹੋਈ ਹੈ। ਟਾਟਾ ਏਅਰਲਾਈਨਸ ਅਤੇ ਏਅਰ ਇੰਡੀਆ ਤੋਂ ਲੈ ਕੇ ਵਿਸਤਾਰਾ ਅਤੇ ਏਅਰ ਏਸ਼ੀਆ ਇੰਡੀਆ ਤੱਕ ਟਾਟਾ ਗਰੁੱਪ ਭਾਰਤ 'ਚ ਵਿਕਸਿਤ ਹੋ ਰਹੇ ਹਵਾਬਾਜ਼ੀ ਖੇਤਰ ਦਾ ਇੱਕ ਮਹੱਤਵਪੂਰਨ ਹਿੱਸਾ ਹਨ।