ਨਵੀਂ ਦਿੱਲੀ, 10 ਜੁਲਾਈ (ਪੋਸਟ ਬਿਊਰੋ)- ਲੱਦਾਖ ਦੇ ਕੋਲ ਅਸਲ ਕੰਟਰੋਲ ਰੇਖਾ (ਐਲ ਏ ਸੀ) ਦੇ ਦੋਵਾਂ ਪਾਸਿਉਂ ਹਮਲਾਵਰੀ ਤੇਵਰਾਂ ਨਾਲ ਜਮ੍ਹਾ ਹੋਈ ਫੌਜ ਨੂੰ ਤਿੰਨ ਪੜਾਵਾਂ ਵਿੱਚ ਹਟਾਇਆ ਜਾਏਗਾ।
ਜਾਣਕਾਰ ਸੂਤਰਾਂ ਅਨੁਸਾਰ ਜੁਲਾਈ ਦੇ ਚਾਰ ਹਫਤਿਆਂ ਵਿੱਚ ਫੌਜ ਪਿੱਛੇ ਹਟਾਉਣ ਦੀਆਂ ਬਰੀਕੀਆਂ ਤੈਅ ਕਰ ਲਈਆਂ ਗਈਆਂ ਹਨ। ਪਹਿਲੇ ਹਫਤੇ ਵਿੱਚ ਫੌਜ ਵਾਪਸੀ ਦੇ ਰੋਡਮੈਪ 'ਤੇ ਦੋਵਾਂ ਧਿਰਾਂ ਨੇ 80 ਫੀਸਦੀ ਤੋਂ ਵੱਧ ਅਮਲ ਕੀਤਾ ਹੈ, ਪਰ ਦੋਵਾਂ ਪਾਸਿਉਂ ਤੋਪਾਂ, ਬਖਤਰਬੰਦ ਗੱਡੀਆਂ, ਮਿਜ਼ਾਈਲਾਂ ਅਤੇ ਹੋਰ ਜੰਗੀ ਸਾਮਾਨ ਦੇ ਨਾਲ ਜਮ੍ਹਾ ਫੌਜ ਨੂੰ ਦੇਖਦੇ ਹੋਏ ਸਥਿਤੀ ਨਾਜ਼ੁਕ ਬਣੀ ਹੋਈ ਹੈ। ਇਸ ਲਈ ਜੁਲਾਈ ਦੇ ਦੂਸਰੇ ਹਫਤੇ ਵਿੱਚ 72 ਘੰਟੇ ਦੀ ਨਿਗਰਾਨੀ ਪਿੱਛੋਂ ਲੋਕਲ ਕਮਾਂਡਰਾਂ ਦੀ ਬੈਠਕ ਹੋਵੇਗੀ। ਇਸ ਦੇ ਬਾਅਦ 15 ਜੁਲਾਈ ਤੱਕ ਕੋਰ ਕਮਾਂਡਰਾਂ ਦੀ ਬੈਠਕ ਵਿੱਚ ਵੇਰਵਾ ਰੱਖਿਆ ਜਾਏਗਾ। ਫਿਰ ਸਰਹੱਦੀ ਮਸਲੇ ਤੈਅ ਕੀਤੇ ਵਿਸ਼ੇਸ਼ ਪ੍ਰਤੀਨਿਧਾਂ ਦੀ ਬੈਠਕ ਹੋਵੇਗੀ। ਤੀਸਰੇ ਪੜਾਅ ਵਿੱਚ ਫੌਜਾਂ ਆਪਣੀ ਜੰਗੀ ਤਿਆਰੀ ਵਿੱਚ ਢਿੱਲ ਦੇਣਗੀਆਂ। ਬਫਰ ਜ਼ੋਨ ਲਈ ਇਹ ਤੈਅ ਕਰ ਲਿਆ ਗਿਆ ਹੈ ਕਿ ਦੋਵੇਂ ਧਿਰਾਂ ਯੂ ਏ ਵੀ ਅਤੇ ਕਵਾਡਕਾਪਟਰਸ ਦੀ ਮਦਦ ਨਾਲ ਵੈਰੀਫਿਕੇਸ਼ਨ ਕਰਨਗੀਆਂ ਤਾਂ ਕਿ ਮੁੱਠਭੇੜ, ਹੱਥੋਪਾਈ ਅਤੇ ਹਿੰਸਕ ਸੰਘਰਸ਼ ਦੀ ਨੌਬਤ ਨਾ ਆਏ। ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਉੱਚ ਪੱਧਰੀ ਬੈਠਕ ਵਿੱਚ ਸੀਮਾ ਸੜਕ ਸੰਗਠਨ ਦੇ ਅਫਸਰਾਂ ਨਾਲ ਸੜਕ ਯੋਜਨਾਵਾਂ ਦੀ ਪ੍ਰਗਤੀ ਦਾ ਜਾਇਜ਼ਾ ਲਿਆ। ਬੀ ਆਰ ਓ ਨੇ ਦੱਸਿਆ ਕਿ ਇਸ ਸਾਲ ਦੇ ਪਹਿਲੇ ਛੇ ਮਹੀਨੇ ਵਿੱਚ ਸਾਲ ਦੇ ਮੁਕਾਬਲੇ 30 ਫੀਸਦੀ ਵੱਧ ਕੰਮ ਹੋਇਆ ਹੈ।