ਨਾਭਾ, 10 ਜੁਲਾਈ (ਪੋਸਟ ਬਿਊਰੋ)- ਉੱਤਰ ਪ੍ਰਦੇਸ਼ ਦੇ ਕਾਨਪੁਰ ਵਿੱਚ ਅੱਠ ਪੁਲਸ ਵਾਲਿਆਂ ਦਾ ਕਾਤਲ ਵਿਕਾਸ ਦੁਬੇ ਮੱਧ ਪ੍ਰਦੇਸ਼ ਦੇ ਉਜੈਨ ਤੋਂ ਗ੍ਰਿਫਤਾਰ ਕਰਨ ਪਿੱਛੋਂ ਯੂ ਪੀ ਪੁਲਸ ਨੇ ਭਾਵੇਂ ਮੁਕਾਬਲੇ ਵਿੱਚ ਮਾਰ ਦਿੱਤਾ ਹੈ, ਪਰ ਯੂ ਪੀ ਪੁਲਸ ਅੱਗੋਂ ਵੀ ਸ਼ਾਂਤ ਬੈਠਣ ਵਾਲੀ ਨਹੀਂ। ਉਸ ਨੇ ਖਤਰਨਾਕ ਅਪਰਾਧੀ ਵਿਕਾਸ ਦੁਬੇ ਤੇ ਉਸ ਦੇ ਗੈਂਗਸਟਰ ਸਾਥੀਆਂ 'ਤੇ ਸ਼ਿਕੰਜਾ ਕੱਸਣ ਲਈ 33 ਖਤਰਨਾਕ ਅਪਰਾਧੀਆਂ ਦੀ ਲਿਸਟ ਜਾਰੀ ਕੀਤੀ ਹੈ। ਇਸ ਵਿੱਚ ਪਹਿਲਾ ਨਾਂਅ ਅੰਮ੍ਰਿਤਸਰ ਦੇ ਖਤਰਨਾਕ ਗੈਂਗਸਟਰ ਬਦਨ ਸਿੰਘ ਬੱਦੋ ਦਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਬੱਦੋ ਦਾ ਪਰਵਾਰ 1970 ਵਿੱਚ ਯੂ ਪੀ ਦੇ ਮੇਰਠ ਵਿੱਚ ਜਾ ਵੱਸਿਆ ਸੀ। ਉਹ ਮੂਲ ਰੂਪ ਵਿੱਚ ਅੰਮ੍ਰਿਤਸਰ ਦਾ ਹੈ ਅਤੇ ਉਸ ਉੱਤੇ 2.5 ਲੱਖ ਰੁਪਏ ਦਾ ਇਨਾਮ ਹੈ ਅਤੇ ਪਿਛਲੇ 16 ਮਹੀਨਿਆਂ ਤੋਂ ਫਰਾਰ ਹੈ। ਉਹ 28 ਮਾਰਚ 2019 ਨੂੰ ਉੱਤਰ ਪ੍ਰਦੇਸ਼ ਦੀ ਜੇਲ੍ਹ ਤੋਂ ਗਾਜ਼ੀਆਬਾਦ ਕੋਰਟ ਵਿੱਚ ਪੇਸ਼ੀ ਲਈ ਜਾਂਦੇ ਸਮੇਂ ਮੁਕੁਟ ਮਹਿਲ ਹੋਟਲ ਵਿੱਚ ਖਾਣੇ ਲਈ ਜਦੋਂ ਪੁਲਸ ਟੀਮ ਰੁਕੀ ਤਾਂ ਬੱਦੋ ਨੇ ਛੇ ਪੁਲਸ ਵਾਲਿਆਂ ਨੂੰ ਸ਼ਰਾਬ ਪਿਆਈ ਅਤੇ ਫਿਰ ਇੱਕ ਲਗਜ਼ਰੀ ਕਾਰ ਵਿੱਚ ਭੱਜ ਨਿਕਲਿਆ ਸੀ। ਇਸ ਕੇਸ ਵਿੱਚ ਛੇ ਪੁਲਸ ਵਾਲਿਆਂ ਸਣੇ 18 ਲੋਕ ਜੇਲ੍ਹ ਜਾ ਚੁੱਕੇ ਹਨ। ਬੱਦੋ ਉੱਤੇ ਫਿਰੌਤੀ, ਕਤਲ, ਗੈਰ ਕਾਨੂੰਨੀ ਹਥਿਆਰ ਰੱਖਣ ਅਤੇ ਉਨ੍ਹਾਂ ਦੀ ਸਪਲਾਈ ਕਰਨ, ਬੈਂਕ ਡਕੈਤੀ ਵਰਗੇ ਚਾਲੀ ਕੇਸ ਦਰਜ ਹਨ। ਯੂ ਪੀ ਪੁਲਸ ਨੂੰ ਕਾਨਪੁਰ ਵਿੱਚ ਅੱਠ ਪੁਲਸ ਵਾਲਿਆਂ ਦੀ ਹੱਤਿਆ ਵਿੱਚ ਵੀ ਉਸ ਦਾ ਹੱਥ ਹੋਣ ਦਾ ਸ਼ੱਕ ਹੈ। ਉਹ ਸਾਲ ਅੱਸੀ ਦੇ ਦਹਾਕੇ ਵਿੱਚ ਬੱਦੋ ਸ਼ਰਾਬ ਦੀ ਤਸਕਰੀ ਕਰਦਾ ਸੀ। ਇਸ ਦੇ ਬਾਅਦ ਪੱਛਮੀ ਯੂ ਪੀ ਦੇ ਖਤਰਨਾਕ ਗੈਂਗਸਟਰ ਰਵਿੰਦਰ ਭੂਰਾ ਦੇ ਗੈਂਗ ਵਿੱਚ ਸ਼ਾਮਲ ਹੋ ਗਿਆ। ਬੱਦੋ ਉਤੇ 1988 ਵਿੱਚ ਕਤਲ ਕਰਨ ਦਾ ਕੇਸ ਦਰਜ ਹੋਇਆ। ਉਹ ਕਰਾਈਮ ਦੀ ਦੁਨੀਆ ਵਿੱਚ ਓਦੋਂ ਚਰਚਿਤ ਹੋਇਆ, ਜਦ 1996 ਵਿੱਚ ਵਕੀਲ ਰਵਿੰਦਰ ਸਿੰਘ ਦਾ ਕਤਲ ਕਰ ਦਿੱਤਾ। ਇਸ ਕੇਸ ਵਿੱਚ ਉਸ ਨੂੰ ਉਮਰ ਕੈਦ ਦਾ ਸਜ਼ੀ ਹੋਈ ਸੀ, ਪਰ 17 ਮਹੀਨੇ ਵਿੱਚ ਹੀ ਫਰਾਰ ਹੋ ਗਿਆ, ਉਸ ਦੀ ਸਭ ਤੋਂ ਅਖੀਰਲੀ ਵਾਰ ਦੀ ਲੋਕੇਸ਼ਨ ਜਲੰਧਰ ਦੀ ਸੀ।