ਕਾਨਪੁਰ, 9 ਜੁਲਾਈ, (ਪੋਸਟ ਬਿਊਰੋ)- ਉੱਤਰ ਪ੍ਰਦੇਸ਼ ਵਿੱਚ ਇੱਕ ਡੀ ਐੱਸ ਪੀ ਸਮੇਤ ਅੱਠ ਪੁਲਸ ਵਾਲਿਆਂ ਨੂੰ ਮਾਰ ਕੇ ਫਰਾਰ ਹੋਇਆ ਵਿਕਾਸ ਦੁੱਬੇ ਅੱਜ ਮੱਧ ਪ੍ਰਦੇਸ਼ ਦੇ ਉਜੈਨ ਸ਼ਹਿਰ ਵਿੱਚ ਪੁਲਸ ਦੇ ਕਾਬੂ ਆ ਗਿਆ। ਉਸ ਨੂੰ ਇਸ ਦੇ ਬਾਅਦ ਉੱਤਰ ਪ੍ਰਦੇਸ਼ ਪੁਲਸ ਦੀ ਸਪੈਸ਼ਲ ਟਾਸਕ ਫੋਰਸ ਦੇ ਹਵਾਲੇ ਕਰ ਦਿੱਤਾ ਗਿਆ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਮੱਧ ਪ੍ਰਦੇਸ਼ ਪੁਲਸ ਭਾਵੇਂ ਕਹਿੰਦੀ ਹੈ ਕਿ ਵਿਕਾਸ ਦੁਬੇ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ, ਪਰ ਚਰਚਾ ਹੈ ਕਿ ਓਥੋਂ ਦੇ ਸੰਪਰਕ ਸੂਤਰਾਂ ਰਾਹੀਂ ਉਸ ਨੇ ਆਤਮ ਸਮੱਰਪਣ ਕੀਤਾ ਹੈ। ਵਿਕਾਸ ਦੁਬੇ ਨੂੰ ਮੱਧ ਪ੍ਰਦੇਸ਼ ਪੁਲਸ ਨੇ ਕਾਗਜ਼ਾਂ ਵਿੱਚ ਗ੍ਰਿਫਤਾਰ ਨਾ ਕੀਤਾ ਹੋਣ ਕਰ ਕੇ ਉਸ ਦੇ ਟਰਾਂਜਿਟ ਰਿਮਾਂਡ ਦੀ ਬਜਾਏ ਸਿੱਧਾ ਉੱਤਰ ਪ੍ਰਦੇਸ਼ ਪੁਲਸ ਨੂੰ ਦਿੱਤਾ ਗਿਆ ਹੈ। ਇਹ ਕਾਰਵਾਈ ਮੱਧ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਸ਼ਿਵਰਾਜ ਸਿੰਘ ਚੌਹਾਨ ਦੇ ਹੁਕਮ ਉੱਤੇ ਕੀਤੀ ਹੈ। ਮੱਧ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਸ਼ਿਵਰਾਜ ਸਿੰਘ ਚੌਹਾਨ ਨੇ ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਆਦਿਤਿਅਨਾਥ ਨਾਲ ਫੋਨ ਉੱਤੇ ਇਸ ਬਾਰੇ ਗੱਲ ਕੀਤੀ ਤੇ ਇਸ ਗੱਲਬਾਤ ਦੀ ਜਾਣਕਾਰੀ ਜਨਤਕ ਕੀਤੀ ਗਈ ਹੈ। ਸਿ਼ਵਰਾਜ ਸਿੰਘ ਚੌਹਾਨ ਨੇ ਕਿਹਾ ਕਿ ਮੈਂ ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਆਦਿਤਿਅਨਾਥ ਨਾਲ ਗੱਲ ਕਰ ਲਈ ਹੈ ਤੇ ਜਲਦੀ ਅੱਗੇ ਦੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ। ਇਸ ਦੇ ਬਾਅਦ ਵਿਕਾਸ ਦੁਬੇ ਨੂੰ ਯੂ ਪੀ ਪੁਲਸ ਨੂੰ ਸੌਂਪ ਦਿੱਤਾ ਗਿਆ।
ਪਤਾ ਲੱਗਾ ਹੈ ਕਿ ਵਿਕਾਸ ਦੁਬੇ ਦੀ ਗ੍ਰਿਫਤਾਰੀ ਤੋਂ ਪਹਿਲਾਂ ਮੱਧ ਪ੍ਰਦੇਸ਼ ਦੇ ਉਜੈਨ ਵਿੱਚ 8 ਪੁਲਸ ਮੁਲਜ਼ਮਾਂ ਦਾ ਅਚਾਨਕ ਤਬਾਦਲਾ ਕਰ ਦਿੱਤਾ ਗਿਆ ਸੀ। ਇਸ ਵਿੱਚ ਮਹਾਕਾਲ ਮੰਦਰ ਚੌਂਕੀ ਦੇ ਇੰਚਾਰਜ ਤੇ ਮਹਾਕਾਲ ਥਾਣੇ ਦਾ ਮੁਖੀ ਵੀ ਸ਼ਾਮਲ ਸਨ। ਇਸ ਤੋਂ ਚਰਚਾ ਚੱਲ ਪਈ ਹੈ ਕਿ ਕੀ ਇਹ ਪੁਲਸ ਵਾਲੇ ਵਿਕਾਸ ਦੁਬੇ ਦੀ ਕੋਈ ਮਦਦ ਕਰ ਰਹੇ ਸਨ ਜਾਂ ਉਸ ਨੂੰ ਪੁਲਸ ਦੀ ਕਾਰਵਾਈ ਦੀ ਸੂਚਨਾ ਦੇ ਰਹੇ ਸਨ।
ਇਸ ਦੌਰਾਨ ਫੜੇ ਜਾਣ ਪਿੱਛੋਂ ਮੁੱਢਲੀ ਪੁੱਛਗਿੱਛ ਵਿੱਚ ਗੈਂਗਸਟਰ ਵਿਕਾਸ ਦੁਬੇ ਨੇ 8 ਪੁਲਸ ਵਾਲਿਆਂ ਨੂੰ ਮਾਰਨ ਦੀ ਘਟਨਾ ਬਾਰੇ ਦੱਸਿਆ ਕਿ ਉਸ ਨੇ ਵਾਰਦਾਤ ਮਗਰੋਂ ਘਰ ਨੇੜਲੇ ਖੂਹ ਕੋਲ ਪੰਜ ਪੁਲਸ ਵਾਲਿਆਂ ਦੀਆਂ ਲਾਸ਼ਾਂ ਇੱਕ-ਦੂਸਰੇ ਉੱਤੇ ਇਸ ਲਈ ਰੱਖੀਆਂ ਸਨ ਕਿ ਉਨ੍ਹਾਂ ਨੂੰ ਸਾੜ ਕੇ ਸਬੂਤ ਖਤਮ ਕਰ ਦਿੱਤਾ ਜਾਵੇ। ਲਾਸ਼ਾਂ ਸਾੜਨ ਦੇ ਲਈ ਘਰ ਵਿਚ ਤੇਲ ਦਾ ਗੈਲਨ ਵੀ ਰੱਖਿਆ ਹੋਇਆ ਸੀ, ਪਰ ਇਸ ਦਾ ਮੌਕਾ ਨਹੀਂ ਮਿਲਿਆ ਤੇ ਫਿਰ ਉਹ ਫਰਾਰ ਹੋ ਗਿਆ। ਉਸ ਨੇ ਆਪਣੇ ਸਾਰੇ ਸਾਥੀਆਂ ਨੂੰ ਵੱਖੋ-ਵੱਖ ਭੱਜਣ ਨੂੰ ਕਿਹਾ ਸੀ। ਵਿਕਾਸ ਨੇ ਪੁਲਸ ਨੂੰ ਦੱਸਿਆ ਕਿ ਸਾਨੂੰ ਸੂਚਨਾ ਮਿਲੀ ਸੀ ਕਿ ਪੁਲਸ ਸਵੇਰੇ ਛਾਪਾ ਮਾਰੇਗੀ, ਪਰ ਪੁਲਸ ਰਾਤ ਹੀ ਆ ਗਈ, ਜਦੋਂ ਅਸੀਂ ਅਜੇ ਖਾਣਾ ਵੀ ਨਹੀਂ ਖਾਧਾ ਸੀ। ਇਸ ਦੇ ਅਗਲੇ ਦਿਨ ਪੁਲਸ ਵੱਲੋਂ ਮਾਰਿਆ ਗਿਆ ਵਿਕਾਸ ਦਾ ਮਾਮਾ ਜੇ ਸੀ ਬੀ ਮਸ਼ੀਨ ਦਾ ਇੰਚਾਰਜ ਸੀ, ਪਰ ਉਹ ਜੇ ਸੀ ਬੀ ਨਹੀਂ ਚਲਾ ਰਿਹਾ ਸੀ। ਰਾਤ ਨੂੰ ਰਾਜੂ ਨਾਮ ਦੇ ਇੱਕ ਸਾਥੀ ਨੇ ਜੇ ਸੀ ਬੀ ਮਸ਼ੀਨ ਨੂੰ ਸੜਕ ਵਿਚਾਲੇ ਖੜੀ ਕਰ ਕੇ ਪੁਲਸ ਦਾ ਰਸਤਾ ਰੋਕਿਆ ਸੀ। ਮਾਮੇ ਨੂੰ ਅਗਲੇ ਦਿਨ ਪੁਲਸ ਨੇ ਮੁਕਾਬਲੇ ਵਿੱਚ ਮਾਰ ਦਿੱਤਾ ਸੀ। ਵਿਕਾਸ ਦੁਬੇ ਨੇ ਮੰਨਿਆ ਕਿ ਚੌਬੇਪੁਰ ਥਾਣਾ ਹੀ ਨਹੀਂ, ਨਾਲ ਦੇ ਥਾਣਿਆਂ ਵਿੱਚੋਂ ਵੀ ਪੁਲਸ ਵਾਲੇ ਉਸ ਦੀ ਮਦਦ ਕਰਦੇ ਸਨ, ਕਿਉਂਕਿ ਲਾਕਡਾਊਨ ਦੇ ਦੌਰਾਨ ਚੌਬੇਪੁਰ ਥਾਣੇ ਦੇ ਕਈ ਪੁਲਸ ਵਾਲਿਆਂ ਦਾ ਉਸ ਨੇ ਬਹੁਤ ਖਿਆਲ ਰੱਖਿਆ ਸੀ ਤੇ ਸਾਰਿਆਂ ਨੂੰ ਖਾਣਾ ਖੁਆਉਣ ਦੇ ਨਾਲ ਹੋਰ ਵੀ ਕਈ ਤਰ੍ਹਾਂ ਦੀ ਮਦਦ ਕਰਦਾ ਰਿਹਾ ਸੀ।