ਸੀਰੀਅਲਾਂ ਦੀ ਸ਼ੂਟਿੰਗ ਦਾ ਕੰਮ ਹੌਲੀ ਹੌਲੀ ਸ਼ੁਰੂ ਹੋ ਗਿਆ ਹੈ, ਪਰ ਹਾਲੇ ਫਿਲਮਾਂ ਦੀ ਸ਼ੂਟਿੰਗ ਸ਼ੁਰੂ ਨਹੀਂ ਹੋਈ। ਇਸ ਲਈ ਆਯੁਸ਼ਮਾਨ ਖੁਰਾਣਾ ਚੰਡੀਗੜ੍ਹ ਵਿੱਚ ਆਪਣੇ ਮਾਤਾ-ਪਿਤਾ ਅਤੇ ਪਰਵਾਰ ਨਾਲ ਸਮਾਂ ਬਿਤਾ ਰਹੇ ਹਨ। ਉਥੇ ਰਹਿ ਕੇ ਆਯੁਸ਼ਮਾਨ ਉਹ ਕੰਮ ਕਰ ਰਹੇ ਹਨ, ਜੋ ਮੁੰਬਈ ਰਹਿੰਦੇ ਹੋਏ ਕਰ ਸਕਣਾ ਉਨ੍ਹਾਂ ਲਈ ਮੁਸ਼ਕਲ ਸੀ। ਦਰਅਸਲ ਆਯੁਸ਼ਮਾਨ ਨੂੰ ਹਮੇਸ਼ਾ ਤੋਂ ਸਾਈਕਲ ਚਲਾਉਣ ਦਾ ਸ਼ੌਕ ਰਿਹਾ ਹੈ। ਅੱਜਕੱਲ੍ਹ ਸਮਾਂ ਮਿਲਿਆ ਹੈ ਤਾਂ ਉਨ੍ਹਾਂ ਨੇ ਸਾਈਕਲ ਨੂੰ ਆਪਣੇ ਰੋਜ਼ਾਨਾ ਦੀ ਐਕਸਰਸਾਈਜ਼ ਵਿੱਚ ਸ਼ਾਮਲ ਕਰ ਲਿਆ ਹੈ।
ਆਯੂਸ਼ਮਾਨ ਦਾ ਕਹਿਣਾ ਹੈ ਕਿ ਮੌਜੂਦਾ ਹਾਲਾਤ ਦੇ ਮੱਦੇਨਜ਼ਰ ਤੰਦਰੁਸਤ ਰਹਿਣਾ ਬੜਾ ਜ਼ਰੂਰੀ ਹੈ। ਸਾਈਕਲ ਦੀ ਸਵਾਰੀ ਮੈਨੂੰ ਨਾ ਕੇਵਲ ਫਿੱਟ ਰੱਖ ਦੀ ਹੈ, ਬਲਕਿ ਚੀਜ਼ਾਂ 'ਤੇ ਧਿਆਨ ਕੇਂਦਰਿਤ ਕਰਨ, ਜ਼ਿੰਦਗੀ ਦੇ ਬਾਰੇ ਸੋਚ-ਵਿਚਾਰ ਕਰਨ ਅਤੇ ਭਵਿੱਖ ਦੀਆਂ ਯੋਜਨਾਵਾਂ ਬਾਰੇ ਇਕਾਂਤ ਸਮਾਂ ਵੀ ਦੇ ਰਹੀ ਹੈ। ਸਾਈਕਲ ਚਲਾਉਣਾ ਮੈਡੀਟੇਸ਼ਨ ਵਾਂਗ ਹੁੰਦਾ ਹੈ। ਇਸ ਕਾਰਨ ਮੈਂ ਕਿਸੇ ਚੀਜ਼ 'ਤੇ ਆਪਣਾ ਧਿਆਨ ਕੇਂਦਰਿਤ ਕਰ ਕੇ ਆਪਣੇ ਦਿਮਾਗ ਵਿਚਲੇ ਵਿਚਾਰਾਂ ਨੂੰ ਸ਼ਾਂਤ ਕਰ ਸਕਦਾ ਹਾਂ। ਆਯੁਸ਼ਮਾਨ ਕੋਲ ਕਈ ਪ੍ਰੋਜੈਕਟ ਹਨ। ਉਹ ਸੈੱਟ 'ਤੇ ਜਾਣ ਲਈ ਬੇਕਰਾਰ ਹੈ। ਉਹ ਕਹਿੰਦੇ ਹਨ ਕਿ ਮੈਂ ਸੈੱਟ 'ਤੇ ਆਪਣੀ ਮੌਜੂਦਗੀ ਨੂੰ ਬਹੁਤ ਮਿਸ ਕਰ ਰਿਹਾ ਹਾਂ। ਜਿਵੇਂ ਹੀ ਪ੍ਰੋਡਕਸ਼ਨ ਟੀਮਾਂ ਕੋਈ ਰਾਹ ਕੱਢਣਗੀਆਂ ਅਤੇ ਕੰਮ ਦੇ ਸੁਰੱਖਿਅਤ ਤਰੀਕੇ ਤੈਅ ਕਰਨਗੀਆਂ, ਮੈਂ ਸੈੱਟ ਤੇ ਪਰਤ ਆਵਾਂਗਾ।