ਓਟਵਾ, 7 ਜੁਲਾਈ (ਪੋਸਟ ਬਿਊਰੋ) : ਮੈਨੀਟੋਬਾ ਦੇ ਪ੍ਰੀਮੀਅਰ ਬ੍ਰਾਇਨ ਪੈਲਿਸਤਰ ਤੇ ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਨੂੰ ਮੰਗਲਵਾਰ ਨੂੰ ਟੋਰਾਂਟੋ ਦੇ ਪੀਅਰਸਨ ਏਅਰਪੋਰਟ ਉੱਤੇ ਬਿਨਾਂ ਮਾਸਕ ਦੇ ਵੇਖਿਆ ਗਿਆ। ਇਹ ਏਅਰਪੋਰਟ ਦੇ ਕੋਵਿਡ-19 ਸੇਫਟੀ ਨਿਯਮਾਂ ਦੀ ਸਰਾਸਰ ਉਲੰਘਣਾ ਹੈ। ਇਸ ਤੋਂ ਬਾਅਦ ਮੈਨੀਟੋਬਾ ਦੇ ਪ੍ਰੀਮੀਅਰ ਬ੍ਰਾਇਨ ਨੇ ਆਪਣੀ ਗਲਤੀ ਮੰਨ ਲਈ।
ਪੈਲਿਸਤਰ ਨੇ ਆਖਿਆ ਕਿ ਟੋਰਾਂਟੋ ਏਅਰਪੋਰਟ ਉੱਤੇ ਦੁਪਹਿਰ ਸਮੇਂ ਕਿਸੇ ਗੱਲਬਾਤ ਵਿੱਚ ਹਿੱਸਾ ਲੈਣ ਲਈ ਉਨ੍ਹਾਂ ਨੇ ਆਪਣਾ ਮਾਸਕ ਉਤਾਰਿਆ ਸੀ। ਉਨ੍ਹਾਂ ਆਖਿਆ ਕਿ ਇਹ ਉਨ੍ਹਾਂ ਦੀ ਗਲਤੀ ਸੀ ਤੇ ਅਜਿਹਾ ਦੁਬਾਰਾ ਨਹੀਂ ਹੋਵੇਗਾ। ਸ਼ੀਅਰ ਦੀ ਤਰਜ਼ਮਾਨ ਕੈਲਸੀ ਚਿਆਸਨ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਉਹ ਏਅਰਪੋਰਟ ੳੱੁਤੇ ਸਨ ਪਰ ਉਸ ਨੇ ਨਾਲ ਹੀ ਇਹ ਵੀ ਆਖਿਆ ਕਿ ਉਨ੍ਹਾਂ ਥੋੜ੍ਹੀ ਦੇਰ ਲਈ ਹੀ ਮਾਸਕ ਉਤਾਰਿਆ ਸੀ। ਚਿਆਸਨ ਨੇ ਆਖਿਆ ਕਿ ਓਟਵਾ ਜਾਂਦੇ ਸਮੇਂ ਸ਼ੀਅਰ ਨੇ ਫੇਸ ਮਾਸਕ ਪਾਇਆ ਹੋਇਆ ਸੀ। ਉਨ੍ਹਾਂ ਫੋਨ ਕਰਨ ਲਈ ਮਾਸਕ ਉਤਾਰਿਆ। ਉਨ੍ਹਾਂ ਦੇ ਫੇਸ ਮਾਸਕ ਲਾਉਣ ਤੋਂ ਪਹਿਲਾਂ ਇਹ ਫੋਟੋ ਖਿੱਚੀ ਗਈ ਹੈ।
ਇਹ ਪੁੱਛੇ ਜਾਣ ਉੱਤੇ ਕਿ ਦੋਵਾਂ ਤਸਵੀਰਾਂ ਵਿੱਚ ਸ਼ੀਅਰ ਫੋਨ ਉੱਤੇ ਨਜ਼ਰ ਕਿਉਂ ਨਹੀਂ ਆ ਰਹੇ ਤਾਂ ਚਿਆਸਨ ਨੇ ਵਾਰੀ ਵਾਰੀ ਇਹੋ ਆਖਿਆ ਕਿ ਸ਼ੀਅਰ ਦੇ ਮਾਸਕ ਦੁਬਾਰਾ ਲਾਉਣ ਤੋਂ ਪਹਿਲਾਂ ਹੀ ਤਸਵੀਰਾਂ ਖਿੱਚੀਆਂ ਗਈਆਂ।