ਰਿਓ ਡੀ ਜਨੇਰੀਓ, 7 ਜੁਲਾਈ (ਪੋਸਟ ਬਿਊਰੋ) : ਬ੍ਰਾਜ਼ੀਲ ਦੇ ਰਾਸ਼ਟਰਪਤੀ ਜ਼ਾਇਰ ਬੋਲਜ਼ੋਨਾਰੋ ਨੇ ਮੰਗਲਵਾਰ ਨੂੰ ਦੱਸਿਆ ਕਿ ਉਨ੍ਹਾਂ ਦਾ ਕੋਵਿਡ-19 ਸਬੰਧੀ ਟੈਸਟ ਪਾਜ਼ੀਟਿਵ ਆਇਆ ਹੈ। ਕਈ ਮਹੀਨੇ ਤੱਕ ਬੋਲਜੋ਼ਨਾਰੋ ਦੇਸ਼ ਵਿੱਚ ਕਰੋਨਾਵਾਇਰਸ ਨਾਲ ਹੋਣ ਵਾਲੀਆਂ ਮੌਤਾਂ ਦੇ ਬਾਵਜੂਦ ਇਸ ਦੀ ਗੰਭੀਰਤਾਂ ਨੂੰ ਹੌਲੇ ਵਿੱਚ ਲੈਂਦੇ ਆ ਰਹੇ ਸਨ।

ਰਾਜਧਾਨੀ ਬ੍ਰਾਜ਼ੀਲੀਆ ਵਿੱਚ ਮਾਸਕ ਪਾ ਕੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ 65 ਸਾਲ ਦੇ ਇਸ ਸਿਆਸਤਦਾਨ ਨੂੰ ਅਕਸਰ ਭੀੜ ਵਿੱਚ ਮਾਸਕ ਤੋਂ ਬਿਨਾਂ ਘੁੰਮਦਿਆਂ ਵੇਖਿਆ ਜਾਂਦਾ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਉਹ ਹਾਈਡਰੋਕਲੋਰੋਕੁਇਨ ਲੈ ਰਹੇ ਹਨ। ਇਹ ਐਂਟੀ ਮਲੇਰੀਆ ਦਵਾਈ ਹੈ ਤੇ ਕੋਵਿਡ-19 ਖਿਲਾਫ ਇਹ ਕਿੰਨਾ ਕੁ ਅਸਰ ਕਰਦੀ ਹੈ ਇਸ ਬਾਰੇ ਅਜੇ ਕੁੱਝ ਸਿੱਧ ਨਹੀਂ ਹੋ ਸਕਿਆ ਹੈ।

ਬੋਲਜੋ਼ਨਾਰੋ ਨੇ ਦੱਸਿਆ ਕਿ ਉਹ ਬਿਲਕੁਲ ਠੀਕ ਮਹਿਸੂਸ ਕਰ ਰਹੇ ਹਨ। ਉਨ੍ਹਾਂ ਆਖਿਆ ਕਿ ਉਹ ਇੱਥੇ ਸੈਰ ਵੀ ਕਰਨੀ ਚਾਹੁੰਦੇ ਹਨ ਪਰ ਮੈਡੀਕਲ ਸਿਫਾਰਿਸ਼ਾਂ ਕਾਰਨ ਉਹ ਅਜਿਹਾ ਨਹੀਂ ਕਰ ਪਾ ਰਹੇ। ਉਨ੍ਹਾਂ ਆਖਿਆ ਕਿ ਭਾਵੇਂ ਉਹ ਰਾਸ਼ਟਰਪਤੀ ਹਨ ਤੇ ਇਹ ਵਾਇਰਸ ਉਨ੍ਹਾਂ ਨੂੰ ਪਹਿਲਾਂ ਵੀ ਹੋ ਸਕਦਾ ਸੀ ਕਿਉਂਕਿ ਉਹ ਲੋਕਾਂ ਦੇ ਵਿਚਕਾਰ ਰਹਿਣਾ ਚਾਹੁੰਦੇ ਹਨ। ਬ੍ਰਾਜ਼ੀਲ ਦੁਨੀਆਂ ਦਾ ਛੇਵਾਂ ਸੱਭ ਤੋਂ ਵੱਡਾ ਦੇਸ਼ ਹੈ, ਇੱਥੋਂ ਦੀ ਆਬਾਦੀ 210 ਮਿਲੀਅਨ ਤੋਂ ਵੱਧ ਹੈ। ਇੱਥੇ ਕਈ ਵਾਰੀ ਆਊਟਬ੍ਰੇਕ ਹੋ ਚੱੁਕੀ ਹੈ। ਕੋਵਿਡ-19 ਕਾਰਨ 65000 ਬ੍ਰਾਜ਼ੀਲ ਵਾਸੀਆਂ ਦੀ ਮੌਤ ਹੋ ਚੁੱਕੀ ਹੈ ਤੇ 1.5 ਮਿਲੀਅਨ ਲੋਕ ਇਸ ਤੋਂ ਸੰਕ੍ਰਮਿਤ ਹਨ।