ਟੋਰਾਂਟੋ, 6 ਜੁਲਾਈ (ਪੋਸਟ ਬਿਊਰੋ) : ਓਨਟਾਰੀਓ ਸਿਹਤ ਅਧਿਕਾਰੀਆਂ ਵੱਲੋਂ ਕਈ ਮਹੀਨਿਆਂ ਵਿੱਚ ਪਹਿਲੀ ਵਾਰੀ ਪ੍ਰੋਵਿੰਸ ਵਿੱਚ ਕੋਵਿਡ-19 ਨਾਲ ਸਬੰਧਤ ਕੋਈ ਮੌਤ ਰਿਪੋਰਟ ਨਹੀਂ ਕੀਤੀ ਗਈ।
ਮਾਰਚ ਦੇ ਅਖੀਰ ਤੋਂ ਲੈ ਕੇ ਹੁਣ ਤੱਕ ਓਨਟਾਰੀਓ ਨੋਵਲ ਕਰੋਨਾਵਾਇਰਸ ਕਾਰਨ ਰੋਜ਼ਾਨਾ ਪ੍ਰੋਵਿੰਸ ਨੂੰ ਕਈ ਮੌਤਾਂ ਰਿਕਾਰਡ ਕਰਨੀਆਂ ਪਈਆਂ। ਹੁਣ ਤੱਕ, ਪ੍ਰੋਵਿੰਸ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਇਸ ਵਾਇਰਸ ਕਾਰਨ 2689 ਲੋਕ ਮਾਰੇ ਜਾ ਚੁੱਕੇ ਹਨ। ਵਾਇਰਸ ਜਦੋਂ ਆਪਣੇ ਪੂਰੇ ਚਰਮ ਉੱਤੇ ਸੀ ਤਾਂ ਪ੍ਰੋਵਿੰਸ ਵਿੱਚ ਰੋਜ਼ਾਨਾ ਦਰਜਨਾਂ ਲੋਕਾਂ ਦੀ ਮੌਤ ਹੋਈ। 30 ਅਪਰੈਲ ਨੂੰ ਪ੍ਰੋਵਿੰਸ ਵਿੱਚ ਇੱਕ ਦਿਨ ਵਿੱਚ, ਭਾਵ 24 ਘੰਟਿਆਂ ਦੇ ਅਰਸੇ ਵਿੱਚ, ਹੋਣ ਵਾਲੀਆਂ ਸੱਭ ਤੋਂ ਵੱਧ (86) ਮੌਤਾਂ ਦਰਜ ਕੀਤੀਆਂ ਗਈਆਂ।
ਸੋਮਵਾਰ ਨੂੰ ਭਾਵੇਂ ਕੋਵਿਡ-19 ਦੇ ਨਵੇਂ ਮਾਮਲਿਆਂ ਵਿੱਚ ਥੋੜ੍ਹਾ ਇਜਾਫਾ ਤਾਂ ਦਰਜ ਕੀਤਾ ਗਿਆ ਪਰ ਸਿਹਤ ਅਧਿਕਾਰੀਆਂ ਵੱਲੋਂ ਇਸ ਵਾਇਰਸ ਕਾਰਨ ਕਿਸੇ ਮੌਤ ਦਾ ਜਿ਼ਕਰ ਨਹੀਂ ਕੀਤਾ ਗਿਆ। ਅਧਿਕਾਰੀਆਂ ਨੇ ਨੋਵਲ ਕਰੋਨਾਵਾਇਰਸ ਦੇ 154 ਨਵੇਂ ਮਾਮਲਿਆਂ ਦੀ ਪੁਸ਼ਟੀ ਕੀਤੀ। ਐਤਵਾਰ ਨੂੰ ਕੋਵਿਡ-19 ਦੇ 138 ਮਾਮਲੇ ਤੇ ਸ਼ਨਿੱਚਰਵਾਰ ਨੂੰ 121 ਮਾਮਲੇ ਦਰਜ ਕੀਤੇ ਗਏ ਸਨ।