ਓਟਵਾ, 5 ਜੁਲਾਈ (ਪੋਸਟ ਬਿਊਰੋ) : ਕੋਵਿਡ-19 ਦੇ ਚਾਰ ਮਹੀਨਿਆਂ ਬਾਅਦ ਫੈਡਰਲ ਸਰਕਾਰ ਕੈਨੇਡੀਅਨਾਂ ਨੂੰ ਦੇਸ਼ ਦੀ ਵਿੱਤੀ ਸਥਿਤੀ ਬਾਰੇ ਜਾਣੂ ਕਰਵਾਉਣ ਦੀ ਤਿਆਰੀ ਕਰ ਰਹੀ ਹੈ ਅਜਿਹੇ ਵਿੱਚ ਵਿਰੋਧੀ ਪਾਰਟੀਆਂ ਵੱਲੋਂ ਆਪਣੀਆਂ ਮੰਗਾਂ ਦੀ ਸੂਚੀ ਤਿਆਰ ਕਰ ਲਈ ਗਈ ਹੈ।
ਮਾਰਚ ਵਿੱਚ ਸ਼ੁਰੂ ਹੋਈ ਮਹਾਂਮਾਰੀ ਤੋਂ ਬਾਅਦ ਬੱੁਧਵਾਰ ਨੂੰ ਪੇਸ਼ ਕੀਤੀ ਜਾਣ ਵਾਲੀ ਵਿੱਤੀ ਰਿਪੋਰਟ ਦੇਸ਼ ਦੀ ਆਰਥਿਕ ਤੇ ਵਿੱਤੀ ਸਥਿਤੀ ਸਬੰਧੀ ਪਹਿਲਾ ਜਨਤਕ ਮੁਲਾਂਕਣ ਹੋਵੇਗੀ। ਇਸ ਮਹਾਂਮਾਰੀ ਦੌਰਾਨ ਪ੍ਰੋਵਿੰਸਾਂ ਨੂੰ ਜਿੱਥੇ ਲਾਕਡਾਊਨ ਕਰਨਾ ਪਿਆ ੳੱੁਥੇ ਹੀ ਲਿਬਰਲ ਸਰਕਾਰ ਨੂੰ ਬਿਲੀਅਨ ਡਾਲਰ ਮਦਦ ਦੇ ਰੂਪ ਵਿੱਚ ਜਾਰੀ ਕਰਨੇ ਪਏ।
ਇਸ ਰਿਪੋਰਟ ਨਾਲ ਇਹ ਅੰਦਾਜ਼ਾ ਵੀ ਹੋ ਜਾਵੇਗਾ ਕਿ ਸਰਕਾਰ ਬਾਕੀ ਦੇ ਵਿੱਤੀ ਵਰ੍ਹੇ ਦੀ ਯੋਜਨਾਬੰਦੀ ਕਿਸ ਤਰ੍ਹਾਂ ਕਰਦੀ ਹੈ, ਇਸ ਵਿੱਚ ਸੰਭਾਵੀ ਘਾਟੇ ਦਾ ਵੇਰਵਾ ਪੇਸ਼ ਕੀਤੇ ਜਾਣ ਦੀ ਵੀ ਸੰਭਾਵਨਾ ਹੈ। ਪਰ ਕੰਜ਼ਰਵੇਟਿਵਾਂ ਤੇ ਐਨਡੀਪੀ ਨੇ ਐਤਵਾਰ ਨੂੰ ਇਹ ਸਪਸ਼ਟ ਕਰ ਦਿੱਤਾ ਕਿ ਉਨ੍ਹਾਂ ਨੂੰ ਸਿਰਫ ਅੰਕੜੇ ਹੀ ਨਹੀਂ ਚਾਹੀਦੇ ਉਹ ਐਕਸ਼ਨ ਚਾਹੁੰਦੇ ਹਨ। ਵਿਰੋਧੀ ਪਾਰਟੀਆਂ ਚਾਹੁੰਦੀਆਂ ਹਨ ਕਿ ਸਰਕਾਰ ਫੈਡਰਲ ਕੋਵਿਡ-19 ਸਪੋਰਟ ਪ੍ਰੋਗਰਾਮ ਵਿੱਚ ਹੋਣ ਵਾਲੇ ਵਾਧੇ, ਤਬਦੀਲੀਆਂ ਤੇ ਪਸਾਰ ਬਾਰੇ ਵਧੇਰੇ ਪਾਰਦਰਸ਼ਤਾ ਲਿਆਵੇ ਤੇ ਜਵਾਬਦੇਹੀ ਤੈਅ ਕਰੇ।
ਜਿੱਥੇ ਕੰਜ਼ਰਵੇਟਿਵਾਂ ਨੇ ਲਿਬਰਲਾਂ ਤੋਂ ਮੰਗ ਕੀਤੀ ਕਿ ਉਹ ਫੈਡਰਲ ਖਰਚਿਆਂ ਨੂੰ ਨਿਯੰਤਰਣ ਵਿੱਚ ਰੱਖੇ ਉੱਥੇ ਹੀ ਐਨਡੀਪੀ ਨੇ ਚੇਤਾਵਨੀ ਦਿੱਤੀ ਕਿ ਫੈਡਰਲ ਸਹਿਯੋਗ ਵਿੱਚ ਕਟੌਤੀਆਂ ਦੀ ਕੋਸਿ਼ਸ਼ ਨਾ ਕੀਤੀ ਜਾਵੇ।
ਜਿ਼ਕਰਯੋਗ ਹੈ ਕਿ ਪਿਛਲੇ ਹਫਤੇ ਫੈਡਰਲ ਸਰਕਾਰ ਵੱਲੋਂ ਪੇਸ਼ ਅੰਕੜਿਆਂ ਵਿੱਚ ਦਰਸਾਇਆ ਗਿਆ ਸੀ ਕਿ ਕੋਵਿਡ-19 ਕਾਰਨ ਸਰਕਾਰੀ ਖਰਚਾ 174 ਬਿਲੀਅਨ ਡਾਲਰ ਤੋਂ ਵੀ ਟੱਪ ਗਿਆ ਹੈ। ਕੈਨੇਡਾ ਐਮਰਜੰਸੀ ਰਿਸਪਾਂਸ ਬੈਨੇਫਿਟ ਲਈ ਬਜਟ ਵਿੱਚ ਹੋਰ ਵਾਧੇ ਦਾ ਸੰਕੇਤ ਵੀ ਦਿੱਤਾ ਗਿਆ ਸੀ। ਇਸ ਪ੍ਰੋਗਰਾਮ ਲਈ ਯੋਗਤਾ 16 ਹਫਤਿਆਂ ਤੋਂ ਵਧਾ ਕੇ 24 ਹਫਤੇ ਕਰ ਦਿੱਤੀ ਗਈ ਹੈ ਇਸ ਨਾਲ ਇਸ ਦੇ ਹੁਣ 80 ਬਿਲੀਅਨ ਡਾਲਰ ਤੱਕ ਅੱਪੜਣ ਦੀ ਸੰਭਾਵਨਾ ਹੈ।
ਇਸ ਦੌਰਾਨ ਸਟੈਟੇਸਟਿਕਸ ਕੈਨੇਡਾ ਵੱਲੋਂ ਪਿਛਲੇ ਹਫਤੇ ਪੇਸ਼ ਕੀਤੀ ਗਈ ਰਿਪੋਰਟ ਵਿੱਚ ਆਖਿਆ ਗਿਆ ਕਿ ਅਪਰੈਲ ਵਿੱਚ ਕੈਨੇਡਾ ਦਾ ਅਰਥਚਾਰਾ 11.6 ਫੀ ਸਦੀ ਸੁੰਗੜਿਆ, ਜੋ ਕਿ ਮਹੀਨੇ ਦੇ ਹਿਸਾਬ ਨਾਲ ਸੱਭ ਤੋਂ ਵੱਡੀ ਗਿਰਾਵਟ ਹੈ। ਇਸ ਦੇ ਨਾਲ ਹੀ ਮਾਰਚ ਵਿੱਚ ਕੱੁਲ ਘਰੇਲੂ ਉਤਪਾਦ (ਜੀਡੀਪੀ) ਵੀ 7.5 ਤੱਕ ਸੁੰਗੜ ਗਈ।