ਯਾਂਗੂਨ, 3 ਜੁਲਾਈ (ਪੋਸਟ ਬਿਊਰੋ)- ਭਾਰਤ ਦੇ ਗਵਾਂਢੀ ਦੇਸ਼ ਮਿਆਂਮਾਰ ਦੇ ਕਚਿਨ ਸੂਬੇ ਵਿੱਚ ਗਹਿਣਿਆਂ 'ਚ ਵਰਤੇ ਜਾਣ ਵਾਲੇ ਕੀਮਤੀ ਹਰੇ ਪੱਥਰਾਂ ਦੀ ਖਾਣ ਵਿੱਚ ਕੱਲ੍ਹ ਜ਼ਮੀਨ ਖਿਸਕਣ ਕਾਰਨ ਘੱਟੋਂ ਘੱਟ 123 ਲੋਕਾਂ ਦੀ ਮੌਤ ਹੋ ਗਈ ਹੈ। ਕਈ ਮਜ਼ਦੂਰਾਂ ਦੇ ਦੱਬੇ ਹੋਣ ਦਾ ਸ਼ੱਕ ਹੈ।
ਮੀਡੀਆ ਰਿਪੋਰਟ ਮੁਤਾਬਕ ਇਹ ਹਾਦਸਾ ਉਦੋਂ ਵਾਪਰਿਆਂ ਜਦੋਂ ਮਜ਼ਦੂਰ 250 ਫੁੱਟ ਦੀ ਉਚਾਈ 'ਤੇ ਕੰਮ ਕਰ ਰਹੇ ਸਨ। ਇਨ੍ਹਾਂ ਵਿੱਚੋਂ ਕੁਝ ਮਜ਼ਦੂਰਾਂ ਦੀ ਮੌਤ ਡੁੱਬਣ ਕਾਰਨ ਹੋਈ, ਕਿਉਂਕਿ ਖਾਨ ਦੇ ਨੇੜੇ ਮੀਂਹ ਦੇ ਕਾਰਨ ਪਾਣੀ ਭਰ ਗਿਆ ਸੀ। ਸੂਚਨਾ ਮੰਤਰਾਲੇ ਨੇ ਸਥਾਨਕ ਫਾਇਰ ਬ੍ਰੀਗੇਡ ਸਰਵਿਸ ਦੇ ਹਵਾਲੇ ਨਾਲ ਮ੍ਰਿਤਕਾਂ ਦੀ ਗਿਣਤੀ 126 ਦੱਸੀ ਹੈ। ਹਾਦਸਾ ਸੂਬੇ ਦੇ ਹੇਪਕਾਂਤ ਇਲਾਕੇ 'ਚ ਵਾਪਰਿਆ। ਇਹ ਖੇਤਰ ਮਿਆਂਮਾਰ ਦੇ ਸਭ ਤੋਂ ਵੱਡੇ ਸ਼ਹਿਰ ਯਾਂਗੂਨ ਦੇ ਉੱਤਰ ਵਿੱਚ ਹੈ ਅਤੇ ਇਹ ਵਿਸ਼ਵ ਦਾ ਸਭ ਤੋਂ ਵੱਡਾ ਖਾਨ ਉਦਯੋਗ ਹੈ। ਹੇਪਕਾਂਤ ਦੇ ਸਥਾਨਕ ਪ੍ਰਤੀਨਿਧੀ ਖੀਨ ਮੌਂਗ ਮਿਯੰਤ ਨੇ ਕਿਹਾ ਕਿ ਸਥਾਨਕ ਬਚਾਅ ਸੇਵਾ ਨੇ ਉਨ੍ਹਾਂ ਨੂੰ ਦੱਸਿਆ ਕਿ ਹਾਲੇ ਤੱਕ 123 ਲਾਸਾਂ ਮਿਲੀਆਂ ਹਨ ਅਤੇ 54 ਜ਼ਖ਼ਮੀ ਲੋਕਾਂ ਨੂੰ ਤਿੰਨ ਹਸਪਤਾਲਾਂ ਵਿੱਚ ਪਹੁੰਚਾਇਆ ਹੈ।