ਸ਼੍ਰਾਵਸਤੀ, 3 ਜੁਲਾਈ (ਪੋਸਟ ਬਿਊਰੋ)- ਭਾਰਤ-ਨੇਪਾਲ ਵਿਚਾਲੇ ਉੱਤਰ ਪ੍ਰਦੇਸ਼ ਦੇ ਸ਼੍ਰਾਵਸਤੀ ਦੇ ਦੇਵੀਪਾਟਨ ਡਵੀਜ਼ਨ ਦੀ 250 ਕਿਲੋਮੀਟਰ ਸਰਹੱਦ ਖੁੱਲ੍ਹੀ ਹੈ। ਇਸ ਦੇ ਲਗਭਗ ਤੀਹ ਪਿੰਡ ਸਰਹੱਦ ਨਾਲ ਲੱਗਦੇ ਹਨ। ਇਥੋਂ ਦੇ ਲੋਕਾਂ ਦਾ ਨੇਪਾਲ ਵਿੱਚ ਰੋਜ਼ ਆਉਣ-ਜਾਣਾ ਹੈ। ਦੋਵੇਂ ਪਾਸੇ ਲੋਕਾਂ ਦੀ ਰਿਸ਼ਤੇਦਾਰੀ ਅਤੇ ਇੱਕੋ ਜਿਹਾ ਰਹਿਣ-ਸਹਿਣ ਰਿਸ਼ਤਿਆਂ ਦੀ ਗੰਢ ਨੂੰ ਮਜ਼ਬੂਤ ਕਰ ਰਿਹਾ ਹੈ। ਸਰਹੱਦ 'ਤੇ ਵਧੀ ਸਖਤੀ ਅਤੇ ਲਾਕਡਾਊਨ ਦੀਆਂ ਬੰਦਿਸ਼ਾਂ ਦੇ ਕਾਰਨ ਦੋਵਾਂ ਦੇਸ਼ਾਂ ਦੇ ਕਿਸਾਨਾਂ ਨੂੰ ਖੇਤੀ ਬਾਰੇ ਪ੍ਰੇਸ਼ਾਨੀ ਆਉਣ ਲੱਗ ਪਈ ਹੈ।
ਇਸ ਬਾਰੇ ਕਿਸਾਨਾਂ ਦਾ ਕਹਿਣਾ ਹੈ ਕਿ ਸਰਕਾਰਾਂ ਸਖਤ ਹੋਈਆਂ ਤਾਂ ਉਨ੍ਹਾਂ ਦੇ ਖੇਤ ਸੁੱਕ ਜਾਣਗੇ ਅਤੇ ਆਰਥਿਕ ਵਿਵਸਥਾ ਨੂੰ ਝਟਕਾ ਲੱਗੇਗਾ। ਇਸ ਬਾਰੇ ਭਾਰਤੀ ਅਤੇ ਨੇਪਾਲੀ ਕਿਸਾਨ ਬੇਚੈਨ ਹਨ। ਉਨ੍ਹਾਂ ਦੇ ਪੈਰ ਖੇਤਾਂ ਵੱਲ ਜਾਣ ਤੋਂ ਝਿਜਕਦੇ ਹਨ ਅਤੇ ਮੱਥੇ 'ਤੇ ਚਿੰਤਾ ਦੀਆਂ ਲਕੀਰਾਂ ਗਹਿਰੀਆਂ ਹੋ ਰਹੀਆਂ ਹਨ ਕਿ ਖਾਲੀ ਖੇਤਾਂ ਵਿੱਚ ਝੋਨੇ ਦੀ ਬਿਜਾਈ ਕਿਵੇਂ ਹੋਵੇਗੀ। ਭਾਰਤ ਦੇ ਚੀਨ ਨਾਲ ਚੱਲਦੇ ਤਣਾਅ ਕਾਰਨ ਨੇਪਾਲ ਦੀ ਮੌਜੂਦਾ ਸਰਕਾਰ ਦੇ ਵਿਹਾਰ ਦਾ ਅਸਰ ਸਰਹੱਦੀ ਪਿੰਡਾਂ ਦੇ ਕਿਸਾਨਾਂ 'ਤੇ ਸਾਫ ਦਿੱਸਦਾ ਹੈ। ਮੀਡੀਆ ਟੀਮ ਸਰਹੱਦੀ ਪਿੰਡ ਅਸਨਹਰੀਆ, ਰੋਸ਼ਨਪੁਰਵਾ ਤੇ ਘੋੜਦੌਰੀਆ ਵਿੱਚ ਪਹੁੰਚੀ ਤਾਂ ਪਤਾ ਲੱਗਾ ਕਿ ਇਨ੍ਹਾਂ ਪਿੰਡਾਂ ਦੇ ਤਕਰੀਬਨ ਇੱਕ ਹਜ਼ਾਰ ਕਿਸਾਨ ਨੇਪਾਲ ਦੇ ਕਾਸ਼ਤਕਾਰ ਹਨ। ਸਰਹੱਦੀ ਵਿਵਾਦ ਕਾਰਨ ਲਾਕਡਾਊਨ ਦੇ ਬਹਾਨੇ ਸਰਹੱਦ 'ਤੇ ਨੇਪਾਲ ਨੇ ਹੋਰ ਸਖਤੀ ਵਧਾ ਦਿੱਤੀ ਹੈ। ਰੋਸ਼ਨਪੁਰਵਾ ਦੇ ਅਬਦੁਲ, ਝਲਾਹੀ, ਸ਼ਾਹਿਦ ਅਤੇ ਫਕੀਰੇ ਸਮੇਤ ਪੰਜਾਹ ਕਿਸਾਨਾਂ ਦੇ ਖੇਤ ਨੇਪਾਲ ਵਿੱਚ ਹਨ। ਇਸੇ ਪ੍ਰਕਾਰ ਨੇਪਾਲ ਦੇ ਰੋਸ਼ਨਪੁਰਵਾ ਵਾਸੀ ਮੁਸੱਬਿਰ ਸਮੇਤ ਕਈ ਨੇਪਾਲੀ ਭਾਰਤ ਦੇ ਕਿਸਾਨ ਹਨ।