ਓਟਵਾ, 3 ਜੁਲਾਈ (ਪੋਸਟ ਬਿਊਰੋ) : ਆਰਸੀਐਮਪੀ ਦਾ ਕਹਿਣਾ ਹੈ ਕਿ ਰੀਡੋ ਹਾਲ ਦੇ ਗ੍ਰਾਊਂਡ ਤੋਂ ਗ੍ਰਿਫਤਾਰ ਕੀਤੇ ਗਏ ਹਥਿਆਰਬੰਦ ਵਿਅਕਤੀ ਨੂੰ ਕਈ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਹੋਵੇਗਾ। ਇਸ ਸਬੰਧ ਵਿੱਚ ਆਰਸੀਐਮਪੀ ਵੱਲੋਂ ਕਥਿਤ ਜੁਰਮਾਂ ਦਾ ਵੇਰਵਾ ਨਹੀਂ ਦਿੱਤਾ ਗਿਆ।
ਆਰਸੀਐਮਪੀ ਡਿਪਟੀ ਕਮਿਸ਼ਨਰ ਮਾਈਕ ਦੁਹੇਮੇ ਨੇ ਆਖਿਆ ਕਿ ਮਸ਼ਕੂਕ ਦੀ ਪਛਾਣ ਕੋਰੀ ਹੁਰੇਨ ਵਜੋਂ ਕੀਤੀ ਗਈ ਹੈ। ਇਹ ਵੀ ਦੱਸਿਆ ਗਿਆ ਕਿ ਜਦੋਂ ਉਸ ਨੇ ਸਾਹਮਣੇ ਵਾਲੇ ਪੈਡੈਸਟਰੀਅਨ ਗੇਟ ਨੂੰ ਤੋੜਿਆ ਸੀ ਤਾਂ ਉਸ ਕੋਲ ਕਈ ਹਥਿਆਰ ਸਨ। ਉਸ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ ਜਿੱਥੇ ਉਸ ਖਿਲਾਫ ਚਾਰਜਿਜ਼ ਲਾਏ ਜਾਣਗੇ।
ਅੱਜ ਸਵੇਰੇ ਓਟਵਾ ਵਿੱਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦੁਹੇਮੇ ਨੇ ਆਖਿਆ ਕਿ ਇਸ ਸਮੇਂ ਉਹ ਅਦਾਲਤ ਵਿੱਚ ਹੈ। ਜਿੰਨੀ ਜਲਦੀ ਆਰਸੀਐਮਪੀ ਹੋਰ ਵੇਰਵੇ ਜਾਰੀ ਕਰਨ ਦੀ ਸਥਿਤੀ ਵਿੱਚ ਹੋਵੇਗੀ ਓਨੀ ਜਲਦੀ ਸਾਰਿਆਂ ਨੂੰ ਇਸ ਬਾਰੇ ਜਾਣਕਾਰੀ ਦਿੱਤੀ ਜਾਵੇਗੀ।