ਲੰਡਨ, 2 ਜੁਲਾਈ, (ਪੋਸਟ ਬਿਊਰੋ)- ਬ੍ਰਿਟੇਨ ਦੇ ਹਾਈ ਕੋਰਟ ਦੇ ਦਸਤਾਵੇਜ਼ਾਂ ਤੋਂ ਇਹ ਭੇਦ ਖੁੱਲ੍ਹਾ ਹੈ ਕਿ ਉਸ ਦੇਸ਼ ਦੇ ਮੀਡੀਆ ਵਿਚ ਰਾਜ ਪਰਵਾਰ ਦੀ ਨੂੰਹ ‘ਡੱਚੇਸ ਆਫ ਸਸੈਕਸ’ ਮੇਘਨ ਮਰਕੇਲ ਦੇ ਬਾਰੇ ਛਪੇ ਭਾਵਨਾਵਤਮਕ ਤੌਰ ਉੱਤੇ ਲਿਖੇ ਲੇਖਾਂ ਤੋਂ ਪ੍ਰਿੰਸੇਸ ਮਰਕੇਲ ਖੁਦ ਨੂੰ ਸੁਰੱਖਿਅਤ ਨਹੀਂ ਸੀ ਮਹਿਸੂਸ ਕਰਦੀ।
ਵਰਨਣ ਯੋਗ ਹੈ ਕਿ ‘ਡਿਊਕ ਆਫ ਸਸੈਕਸ’ ਪ੍ਰਿੰਸ ਹੈਰੀ ਦੀ ਪਤਨੀ ਅਤੇ ਅਮਰੀਕੀ ਫਿਲਮ ਜਗਤ ਦੀ ਸਾਬਕਾ ਅਭਿਨੇਤਰੀ ਮੇਘਨ (38 ਸਾਲ) ਨੇ ਪ੍ਰਾਈਵੇਸੀ ਦਾ ਉਲੰਘਣ ਕਰਨ ਦੇ ਦੋਸ਼ ਵਿਚ ‘ਦ ਮੇਲ ਆਨ ਸੰਡੇ` ਅਖਬਾਰ ਤੇ ਉਸ ਦੇ ਮਾਲਕ ਐਸੋਸੀਏਟਡ ਨਿਊਜ਼ਪੇਪਰ ਲਿਮਟਿਡ ਦੇ ਖਿਲਾਫ ਇੱਕ ਕਾਨੂੰਨੀ ਕੇਸ ਦਾਇਰ ਕੀਤਾ ਸੀ। ਮੇਘਨ ਦਾ ਦੋਸ਼ ਹੈ ਕਿ ਅਗਸਤ 2018 ਵਿੱਚ ਉਨ੍ਹਾਂ ਵਲੋਂ ਆਪਣੇ ਪਿਤਾ ਥਾਮਸ ਮਰਕੇਲ ਨੂੰ ਹੱਥੀਂਂ ਲਿਖੇ ਇਕ ਪੱਤਰ ਦੇ ਕੁਝ ਹਿੱਸੇ ਅਖਬਾਰ ਨੇ ਬਿਨਾਂ ਅਗਿਆ ਤੋਂ ਛਾਪੇ ਸਨ। ਪ੍ਰਕਾਸ਼ਕ ਨੇ ਮੇਘਨ ਦੇ ਇਨ੍ਹਾਂ ਦੋਸ਼ਾਂ ਦਾ ਖੰਡਨ ਕੀਤਾ ਸੀ। ਇਸ ਕੇਸ ਦੀ ਸੁਣਵਾਈ ਦੀ ਤਰੀਖ ਅਜੇ ਤੈਅ ਨਹੀਂ ਹੋਈ, ਪਰ ਦੋਵਾਂ ਧਿਰਾਂ ਵਿਚਾਲੇ ਕਾਨੂੰਨੀ ਸਮਝੌਤਿਆਂ ਬਾਰੇ ਗੱਲ ਸੁਣੀ ਜਾ ਰਹੀ ਹੈ। ਬੀ ਬੀ ਸੀ ਵਲੋਂ ਇਸ ਹਫਤੇ ਦੇਖੇ ਗਏ ਅਦਾਲਤੀ ਦਸਤਾਵੇਜ਼ਾਂ ਤੋਂ ਭੇਦ ਖੁੱਲ੍ਹਾ ਹੈ ਕਿ ਮਰਕੇਲ ਦਾ ਇਹ ਕਹਿਣਾ ਹੈ ਕਿ ਪ੍ਰੈਗਨੈਂਸੀ ਦੇ ਦੌਰਾਨ ਜਦੋਂ ਉਨ੍ਹਾਂ ਬਾਰੇ ਪ੍ਰੈੱਸ ਵਿਚ ਗਲਤ ਸੋਚ ਵਾਲੇ ਕਈ ਲੇਖ ਛਪ ਰਹੇ ਸਨ ਤਾਂ ਉਨ੍ਹਾਂ ਵਿਚ ਲੱਗੇ ਦੋਸ਼ਾਂ ਤੋਂ ਉਨ੍ਹਾਂ ਦਾ ਬਚਾਅ ਕਰਨ ਵਿਚ ਬ੍ਰਿਟਿਸ਼ ਸ਼ਾਹੀ ਪਰਿਵਾਰ ਦੀ ਸੰਸਥਾ ਸਫਲ ਨਹੀਂ ਰਹੀ। ਦਸਤਾਵੇਜ਼ਾਂ ਮੁਤਾਬਕ ਇਸ ਨਾਲ ਮਰਕੇਲ ਨੂੰ ਗਹਿਰਾ ਜਜ਼ਬਾਤੀ ਝਟਕਾ ਲੱਗਾ ਤੇ ਉਨ੍ਹਾਂ ਦੀ ਮਾਨਸਿਕ ਸਿਹਤ ਖਰਾਬ ਹੋ ਗਈ ਸੀ।
ਇਸ ਸੰਬੰਧ ਵਿੱਚ ਬੀ ਬੀ ਸੀ ਨੂੰ ਮਿਲੇ ਦਸਤਾਵੇਜ਼ਾਂ ਮੁਤਾਬਕ ਪ੍ਰਿੰਸੇਸ ਮਰਕੇਲ ਦੇ ਦੋਸਤਾਂ ਨੇ ਓਦੋਂ ਪਹਿਲਾਂ ਉਨ੍ਹਾਂ ਨੂੰ ਅਜਿਹੀ ਹਾਲਤ ਵਿਚ ਕਦੇ ਨਹੀਂ ਦੇਖੀ ਸੀ। ਉਸ ਦੇ ਪ੍ਰੈਗਨੈਂਸੀ ਦੌਰਾਨ ਇਸ ਹਾਲਤ ਵਿੱਚ ਹੋਣ ਕਾਰਨ ਇਹ ਦੋਸਤ ਵੀ ਚਿੰਤਤ ਸਨ, ਪਰ ਰਾਜ ਪਰਵਾਰ ਦੀ ਸੰਸਥਾ ਨੇ ਉਨ੍ਹਾਂ ਦਾ ਬਚਾਅ ਨਹੀਂ ਕੀਤਾ ਅਤੇ ਉਨ੍ਹਾਂ ਨੂੰ ਆਪਣਾ ਬਚਾਅ ਕਰਨ ਤੋਂ ਮਨ੍ਹਾ ਕੀਤਾ ਸੀ। ਅਖਬਾਰ ਦਾ ਦਾਅਵਾ ਹੈ ਕਿ ਉਸ ਨੇ ਇਹ ਪੱਤਰ ਸਿਰਫ ਇਸ ਲਈ ਛਾਪਿਆ ਕਿ ਅਮਰੀਕੀ ਮੈਗਜ਼ੀਨ ‘ਪੀਪਲ’ ਵਿਚ ਛਪੇ ਇੰਟਰਵਿਊ ਵਿਚ ਮੇਘਨ ਦੇ ਦੋਸਤਾਂ ਨੇ ਉਸ ਪੱਤਰ ਦਾ ਜ਼ਿਕਰ ਕੀਤਾ ਹੋਇਆ ਸੀ।