ਓਟਵਾ, 2 ਜੁਲਾਈ (ਪੋਸਟ ਬਿਊਰੋ) : ਓਟਵਾ ਵਿੱਚ ਗਵਰਨਰ ਜਨਰਲ ਦੀ ਰਿਹਾਇਸ਼ ਲਾਗਿਓਂ ਗ੍ਰਿਫਤਾਰ ਕੀਤਾ ਗਿਆ ਵਿਅਕਤੀ ਕੈਨੇਡੀਅਨ ਹਥਿਆਰਬੰਦ ਸੈਨਾਵਾਂ ਦਾ ਸਰਗਰਮ ਮੈਂਬਰ ਦੱਸਿਆ ਜਾ ਰਿਹਾ ਹੈ।
ਆਰਸੀਐਮਪੀ ਵੱਲੋਂ ਇਸ ਵਿਅਕਤੀ ਦੀ ਪਛਾਣ ਜਾਰੀ ਨਹੀਂ ਕੀਤੀ ਗਈ ਹੈ। ਪਰ ਇਹ ਦੱਸਿਆ ਜਾ ਰਿਹਾ ਹੈ ਕਿ ਇਹ ਵਿਅਕਤੀ ਹਿਰਾਸਤ ਵਿੱਚ ਹੈ ਤੇ ਇਸ ਤੋਂ ਪੱੁਛਗਿੱਛ ਕੀਤੀ ਜਾ ਰਹੀ ਹੈ। ਮਾਊਂਟੀਜ਼ ਨੇ ਇਸ ਗੱਲ ਦੀ ਪੁਸ਼ਟੀ ਜ਼ਰੂਰ ਕੀਤੀ ਹੈ ਕਿ ਇਹ ਵਿਅਕਤੀ ਕੈਨੇਡੀਅਨ ਮਿਲਟਰੀ ਦਾ ਮੈਂਬਰ ਹੈ। ਆਰਸੀਐਮਪੀ ਨੇ ਦੱਸਿਆ ਕਿ ਇਸ ਵਿਅਕਤੀ ਨੇ ਸਵੇਰੇ ਇੱਕ ਟਰਕ ਪੈਡੈਸਟਰੀਅਨ ਗੇਟ ਵਿੱਚ ਜਾ ਮਾਰਿਆ ਤੇ ਫਿਰ ਇਹ 1 ਸਸੈਕਸ ਡਰਾਈਵ ਅੰਦਰ ਦਾਖਲ ਹੋ ਗਿਆ। ਫਿਰ ਇਹ ਵਿਅਕਤੀ ਪੈਦਲ ਹੀ ਗ੍ਰੀਨਹਾਊਸ ਵਾਲੇ ਪਾਸੇ ਵੱਲ ਵਧਿਆ, ਉੱਥੇ ਗਸ਼ਤ ਕਰ ਰਹੇ ਆਰਸੀਐਮਪੀ ਮੈਂਬਰਾਂ ਨੇ ਇਸ ਨੂੰ ਫੜ੍ਹ ਲਿਆ।
ਪੁਲਿਸ ਨੇ ਇਸ ਤੋਂ ਥੋੜ੍ਹੀ ਦੇਰ ਬਾਅਦ 7:00 ਵਜੇ, ਐਮਰਜੰਸੀ ਰਿਸਪਾਂਸ ਟੀਮ ਭੇਜੀ ਤੇ ਉਸ ਨੇ ਇਸ ਵਿਅਕਤੀ ਨੂੰ ਗ੍ਰਿਫਤਾਰ ਕਰ ਲਿਆ ਤੇ ਉਸ ਨੂੰ 8:30 ਵਜੇ ਪੁੱਛਗਿੱਛ ਲਈ ਲਿਜਾਇਆ ਗਿਆ। ਆਰਸੀਐਮਪੀ ਨੇ ਦੱਸਿਆ ਕਿ ਕਿਸੇ ਤਰ੍ਹਾਂ ਦੀ ਗੜਬੜੀ ਤੋਂ ਪਹਿਲਾਂ ਹੀ ਇਸ ਵਿਅਕਤੀ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ।
ਓਟਵਾ ਪੁਲਿਸ ਵੱਲੋਂ ਸਥਾਨਕ ਵਾਸੀਆਂ ਨੂੰ ਇਸ ਇਲਾਕੇ ਵਿੱਚ ਜਾਣ ਤੋਂ ਵੀ ਵਰਜਿਆ ਜਾ ਰਿਹਾ ਸੀ। ਪੁਲਿਸ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਵੀ ਕੀਤੀ ਗਈ ਹੈ ਕਿ ਜਿਸ ਸਮੇਂ ਇਹ ਸਭ ਵਾਪਰਿਆ ਉਸ ਸਮੇਂ ਗਵਰਨਰ ਜਨਰਲ ਜੂਲੀ ਪੇਯੈਟ ਆਪਣੀ ਰਿਹਾਇਸ਼ ਉੱਤੇ ਮੌਜੂਦ ਨਹੀਂ ਸੀ। ਇੱਥੇ ਦੱਸਣਾ ਬਣਦਾ ਹੈ ਕਿ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਤੇ ਉਨ੍ਹਾਂ ਦਾ ਪਰਿਵਾਰ ਵੀ ਰੀਡੋ ਕਾਟੇਜ ਵਾਲੇ ਇਲਾਕੇ ਵਿੱਚ ਹੀ ਰਹਿੰਦਾ ਹੈ ਪਰ ਉਹ ਵੀ ਇਸ ਘਟਨਾ ਸਮੇਂ ਇੱਥੇ ਮੌਜੂਦ ਨਹੀਂ ਸਨ।
ਪੁਲਿਸ ਰੋਬੌਟ ਵੱਲੋਂ ਰੀਡੋ ਹਾਲ ਵੱਲ ਜਾਂਦੀ ਸਟਰੀਟ ਦੇ ਲਾਂਘੇ ਉੱਤੇ ਖੜ੍ਹੇ ਚਾਰ ਦਰਵਾਜਿ਼ਆਂ ਵਾਲੇ ਡੌਜ ਰੈਮ ਪਿੱਕਅੱਪ ਟਰੱਕ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਇਸ ਟਰੱਕ ਦੇ ਏਅਰਬੈਗ ਵੀ ਖੱੁਲ੍ਹੇ ਹੋਏ ਸਨ। ਇਸ ਟਰੱਕ ਦੀ ਪਿਛਲੀ ਸੀਟ ਉੱਤੇ ਬਕਸੇ ਤੇ ਕਾਲੇ ਰੰਗ ਦੇ ਗਾਰਬੇਜ ਬੈਗ ਪਏ ਸਨ ਤੇ ਇੱਕ ਸੰਤਰੀ ਰੰਗ ਦਾ ਕੂਲਰ ਮੂਹਰਲੀ ਪੈਸੈਂਜਰ ਸੀਟ ਉੱਤੇ ਪਿਆ ਸੀ ਜਿਸ ਵਿੱਚ ਆਈਸ ਪੈਕਸ ਭਰੇ ਪਏ ਸਨ। ਸੂਹੀਆ ਕੁੱਤੇ ਵੱਲੋਂ ਵੀ ਇਲਾਕੇ ਦੀ ਟੋਹ ਲਈ ਜਾ ਰਹੀ ਹੈ।