ਮਾਰਖਮ, 2 ਜੁਲਾਈ (ਪੋਸਟ ਬਿਊਰੋ) : ਮਾਰਖਮ ਦੇ ਇੱਕ ਘਰ ਵਿੱਚ ਲੱਗੀ ਅੱਗ ਵਿੱਚੋਂ ਦੋ ਵ੍ਹੀਲਚੇਅਰ ਵਾਲੇ ਵਿਅਕਤੀਆਂ ਨੂੰ ਮੁਸ਼ਕਲ ਨਾਲ ਬਚਾਇਆ ਗਿਆ।
ਰਾਤੀਂ 2:00 ਵਜੇ ਐਮਰਜੰਸੀ ਅਮਲਾ ਜੌਹਨ ਤੇ ਯੌਂਗ ਸਟਰੀਟ ਨੇੜੇ ਕੌਲਬੌਰਨ ਸਟਰੀਟ ਉੱਤੇ ਪਹੁੰਚਿਆ। ਉਨ੍ਹਾਂ ਤੋਂ ਪਹਿਲਾਂ ਯੌਰਕ ਰੀਜਨਲ ਪੁਲਿਸ ਦੇ ਚਾਰ ਅਧਿਕਾਰੀ ਮੌਕੇ ਉੱਤੇ ਪਹੁੰਚੇ ਤੇ ਇੱਕ ਟੀਨੇਜਰ ਨੇ ਉਨ੍ਹਾਂ ਨੂੰ ਦੱਸਿਆ ਕਿ ਉਸ ਦੇ ਅਪਾਹਜ ਪਿਤਾ ਤੇ ਭੈਣ ਅੱਗ ਵਿੱਚ ਸੜ ਰਹੇ ਘਰ ਦੇ ਅੰਦਰ ਹੀ ਫਸ ਗਏ ਹਨ।
ਇਸ ਤੋਂ ਬਾਅਦ ਪੁਲਿਸ ਅਧਿਕਾਰੀ ਪਿਛਲੇ ਹਿੱਸੇ ਤੋਂ ਘਰ ਵਿੱਚ ਦਾਖਲ ਹੋਏ ਤੇ ਉਨ੍ਹਾਂ ਵ੍ਹੀਲਚੇਅਰ ਉੱਤੇ ਮੌਜੂਦ ਇੱਕ ਵਿਅਕਤੀ ਨੂੰ ਬਾਹਰ ਕੱਢਿਆ। ਫਿਰ ਉਨ੍ਹਾਂ ਉਸ ਸਮੇਂ ਤੱਕ ਮੌਕੇ ਉੱਤੇ ਪਹੁੰਚ ਚੱੁਕੇ ਫਾਇਰਫਾਈਟਰਜ਼ ਦੀ ਮਦਦ ਨਾਲ ਵ੍ਹੀਲਚੇਅਰ ਉੱਤੇ ਬੈਠੀ ਇੱਕ 18 ਸਾਲਾ ਲੜਕੀ ਨੂੰ ਬਾਹਰ ਕੱਢਿਆ। ਘਰ ਵਿੱਚ ਰਹਿਣ ਵਾਲੇ ਚਾਰਾਂ ਮੈਂਬਰਾਂ-ਮਾਤਾ-ਪਿਤਾ ਤੇ ਉਨ੍ਹਾਂ ਦੀਆਂ ਦੋ ਧੀਆਂ ਨੂੰ ਹਸਪਤਾਲ ਲਿਜਾਇਆ ਗਿਆ। ਇਨ੍ਹਾਂ ਸਾਰਿਆਂ ਨੂੰ ਧੂੰਆਂ ਚੜ੍ਹ ਗਿਆ ਸੀ ਤੇ ਇੱਕ ਪੁਲਿਸ ਅਧਿਕਾਰੀ ਨੂੰ ਵੀ ਧੂੰਆਂ ਚੜ੍ਹਨ ਕੱਾਰਨ ਹਸਪਤਾਲ ਲਿਜਾਇਆ ਗਿਆ।
ਡਿਪਟੀ ਫਾਇਰ ਚੀਫ ਐਡਮ ਗ੍ਰਾਂਟ ਨੇ ਦੱਸਿਆ ਕਿ ਅੱਗ ਉਤੇ ਕਾਬੂ ਪਾਉਣ ਲਈ ਢਾਈ ਘੰਟੇ ਦਾ ਸਮਾਂ ਲੱਗਿਆ। ਅੱਗ ਲੱਗਣ ਦੇ ਕਾਰਨਾਂ ਦਾ ਅਜੇ ਤੱਕ ਪਤਾ ਨਹੀਂ ਲੱਗ ਸਕਿਆ ਹੈ।