ਟੋਰਾਂਟੋ, 1 ਜੁਲਾਈ (ਪੋਸਟ ਬਿਊਰੋ) : ਸ਼ਾਂਤਮਈ ਢੰਗ ਨਾਲ ਕੀਤੇ ਜਾ ਰਹੇ ਕੈਂਸਲ ਕੈਨੇਡਾ ਡੇਅ ‘Cancel Canada Day’  ਮਾਰਚ ਦੌਰਾਨ ਮੂਲਵਾਸੀ ਕਾਰਕੁੰਨ ਦੇਸ਼ ਭਰ ਵਿੱਚ ਇੱਕ ਦਿਨ ਸੋਗ ਲਈ ਰੱਖਣਗੇ ਤੇ ਉਦੋਂ ਉਨ੍ਹਾਂ ਦੀ ਕਮਿਊਨਿਟੀ ਨਾਲ ਹੋਣ ਵਾਲੀ ਨਾਇਨਸਾਫੀ ਉੱਤੇ ਚਾਨਣਾ ਪਾਇਆ ਜਾਵੇਗਾ। ਮੂਲਵਾਸੀਆਂ ਦੇ ਅਧਿਕਾਰਾਂ ਬਾਰੇ ਗਰੱੁਪ ਆਇਡਲ ਨੋ ਮੋਰ (Idle No More) ਦੀ ਅਗਵਾਈ ਵਿੱਚ ਕੈਂਸਲ ਕੈਨੇਡਾ ਡੇਅ ਮੁਜ਼ਾਹਰਿਆਂ ਵਿੱਚ ਉਨ੍ਹਾਂ ਮੂਲਵਾਸੀ, ਸਿਆਹ ਨਸਲ, ਮਾਈਗ੍ਰੈਂਟ, ਔਰਤਾਂ ਤੇ ਟਰਾਂਸ ਲੋਕਾਂ ਨੂੰ ਚੇਤੇ ਕੀਤਾ ਜਾਵੇਗਾ ਜਿਨ੍ਹਾਂ ਦੀਆਂ ਕੀਮਤੀ ਜਾਨਾਂ ਅਜਾਂਈ ਚਲੀਆਂ ਗਈਆਂ। ਆਰਗੇਨਾਈਜ਼ੇਸ਼ਨ ਦੀ ਵੈਬਸਾਈਟ ਉੱਤੇ ਪੋਸਟ ਕੀਤੇ ਗਏ ਬਿਆਨ ਵਿੱਚ ਆਖਿਆ ਗਿਆ ਹੈ ਕਿ ਕੈਨੇਡਾ ਦੇ ਅੰਦਰ ਮੂਲਵਾਸੀ ਲੋਕਾਂ ਦੀ ਹੋ ਰਹੀ ਨਸਲਕੁਸ਼ੀ ਦੇ ਜਸ਼ਨ ਅਸੀਂ ਨਹੀਂ ਮਨਾਂਵਾਂਗੇ।

ਇਹ ਵੀ ਆਖਿਆ ਗਿਆ ਹੈ ਕਿ ਅਸੀਂ ਐਮਐਮਆਈਡਬਲਿਊਜੀ2ਐਸ, ਬੱਚਿਆਂ ਦੀ ਭਲਾਈ, ਬਰਥ ਐਲਰਟਜ਼, ਧੱਕੇ ਨਾਲ ਕੀਤੀ ਜਾਣ ਵਾਲੀ ਨਸਬੰਦੀ, ਪੁਲਿਸ ਅਤੇ ਆਰਸੀਐਮਪੀ ਦੇ ਜ਼ੁਲਮ ਤੇ ਸਾਡੇ ਨਾਲ ਹੋਣ ਵਾਲੀ ਨਾਇਨਸਾਫੀ ਲਈ ਆਪਣੀ ਆਵਾਜ਼ ਉਠਾਵਾਂਗੇ। ਆਇਡਲ ਨੋ ਮੋਰ ਵੱਲੋਂ ਲਾਈਵ ਬ੍ਰੌਡਕਾਸਟ ਤੋਂ ਇਲਾਵਾ ਵੈਨਕੂਵਰ, ਸਸਕਾਟੂਨ, ਹੈਲੀਫੈਕਸ ਤੇ ਹੈਮਿਲਟਨ-ਓਨਟਾਰੀਓ ਵਿੱਚ ਕਈ ਲੋਕਲ ਈਵੈਂਟ ਵੀ ਪਲੈਨ ਕੀਤੇ ਗਏ ਹਨ।