ਭਾਰਤੀ ਮੂਲ ਦੇ ਕੈਨੇਡੀਅਨ ਨਾਗਰਿਕ ਨੂੰ ਕੀਤਾ ਗਿਆ ਚਾਰਜ
ਟੋਰਾਂਟੋ, 01 ਜੁਲਾਈ (ਪੋਸਟ ਬਿਊਰੋ) : ਅਮਰੀਕੀ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਵੱਲੋਂ ਕੈਨੇਡੀਅਨ ਸਰਹੱਦ ੳੱੁਤੇ ਮੈਰੀਯੁਆਨਾ ਦੀ ਸੱਭ ਤੋਂ ਵੱਡੀ ਖੇਪ ਫੜ੍ਹੀ ਗਈ ਹੈ।
ਯੂਐਸ ਕਸਟਮਜ਼ ਐਂਡ ਬਾਰਡਰ ਪ੍ਰੋਟੈਕਸ਼ਨ (U.S. Customs and Border Protection) ਦਾ ਕਹਿਣਾ ਹੈ ਕਿ ਉਨ੍ਹਾਂ ਵੱਲੋਂ ਲੱਗਭਗ 4.3 ਟੰਨ ਮੈਰੀਯੁਆਨਾ ਅਜਿਹੇ ਟਰੱਕ ਤੋਂ ਫੜ੍ਹੀ ਗਈ ਜਿਹੜਾ ਦੇਸ਼ ਵਿੱਚ ਦਾਖਲ ਹੋਣ ਦੀ ਕੋਸਿ਼ਸ਼ ਕਰ ਰਿਹਾ ਸੀ। ਇਹ ਟਰੱਕ 25 ਜੂਨ ਨੂੰ ਫੜ੍ਹਿਆ ਗਿਆ। ਫੜ੍ਹੀ ਗਈ ਮੈਰੀਯੁਆਨਾ ਦੀ ਕੀਮਤ 20 ਮਿਲੀਅਨ ਅਮਰੀਕੀ ਡਾਲਰ (27.3 ਮਿਲੀਅਨ ਕੈਨੇਡੀਅਨ ਡਾਲਰ) ਦੱਸੀ ਜਾਂਦੀ ਹੈ।
ਬਾਰਡਰ ਏਜੰਸੀ ਅਨੁਸਾਰ ਇਸ ਟਰੱਕ ਨੂੰ ਓਨਟਾਰੀਓ ਦੇ ਨਾਇਗਰਾ ਰੀਜਨ ਤੇ ਬਫਲੋ, ਨਿਊ ਯੌਰਕ ਦਰਮਿਆਨ ਸਥਿਤ ਪੀਸ ਬ੍ਰਿਜ ਪਾਰ ਕਰਦੇ ਸਮੇਂ ਰੋਕਿਆ ਗਿਆ ਸੀ। ਟਰੱਕ ਦੇ ਦਸਤਾਵੇਜ਼ਾਂ ਵਿੱਚ ਲਿਖਿਆ ਸੀ ਕਿ ਉਸ ਵਿੱਚ ਸਿਰਫ ਸਟੋਰੇਜ ਕੰਟੇਨਰਜ਼ ਸਨ ਪਰ ਜਾਂਚ ਕੀਤੇ ਜਾਣ ਉਪਰੰਤ ਇਸ ਵਿੱਚੋਂ 55 ਫੂਸ ਨਾਲ ਭਰੇ ਲੱਕੜ ਦੇ ਬਕਸੇ ਮਿਲੇ ਜਿਨ੍ਹਾਂ ਵਿੱਚ ਮੈਰੀਯੁਆਨਾ ਦੇ ਵੈਕਿਊਮ ਕੀਤੇ ਗਏ ਪੈਕੇਟ ਸਨ।
ਇਸ ਮੌਕੇ ਭਾਰਤੀ ਮੂਲ ਦੇ 26 ਸਾਲਾ ਕੈਨੇਡੀਅਨ ਪਰਮਾਨੈਂਟ ਰੈਜ਼ੀਡੈਂਟ ਨੂੰ ਮੈਰੀਯੁਆਨਾ ਇੰਪੋਰਟ ਕਰਨ ਅਤੇ ਉਸ ਨੂੰ ਵੰਡਣ ਦੇ ਇਰਾਦੇ ਨਾਲ ਆਪਣੇ ਕੋਲ ਰੱਖਣ ਦੇ ਦੋਸ਼ ਵਿੱਚ ਚਾਰਜ ਕੀਤਾ ਗਿਆ। ਅਮਰੀਕੀ ਬਾਰਡਰ ਏਜੰਸੀ ਵੱਲੋਂ ਇਸ ਨੂੰ ਉੱਤਰੀ ਬਾਰਡਰ ਉੱਤੇ ਫੜ੍ਹੀ ਗਈਆਂ ਨਸਿ਼ਆਂ ਦੀ ਸੱਭ ਤੋਂ ਵੱਡੀ ਖੇਪ ਦੱਸਿਆ ਜਾ ਰਿਹਾ ਹੈ। ਇੱਕ ਮਹੀਨੇ ਦੇ ਅੰਦਰ ਅੰਦਰ ਪੀਸ ਬ੍ਰਿਜ ਉੱਤੇ ਫੜ੍ਹੀ ਗਈ ਮੈਰੀਯੁਆਨਾ ਦੀ ਇਹ ਤੀਜੀ ਵੱਡੀ ਖੇਪ ਹੈ।