ਬਰੈਂਪਟਨ, 1 ਜੁਲਾਈ (ਪੋਸਟ ਬਿਊਰੋ) : ਕੱਲ੍ਹ ਸ਼ਾਮ ਨੂੰ ਬਰੈਂਪਟਨ ਵਿੱਚ ਇੱਕ ਸ਼ੂਟਿੰਗ ਵਿੱਚ ਪੁਲਿਸ ਅਧਿਕਾਰੀ ਦੇ ਸ਼ਾਮਲ ਹੋਣ ਤੋ ਬਾਅਦ ਮਾਮਲੇ ਦੀ ਜਾਂਚ ਐਸਆਈਯੂ ਵੱਲੋਂ ਕੀਤੀ ਜਾ ਰਹੀ ਹੈ।
ਪੀਲ ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸ਼ਾਮੀਂ 7:45 ਉੱਤੇ ਟੌਰਬ੍ਰੈਮ ਰੋਡ ਤੇ ਵਿਲੀਅਮਜ਼ ਪਾਰਕਵੇਅ ਵਾਲੇ ਇਲਾਕੇ ਵਿੱਚ ਗੋਲੀਆਂ ਚੱਲਣ ਦੀ ਘਟਨਾ ਵਾਪਰਨ ਤੋਂ ਬਾਅਦ ਸੱਦਿਆ ਗਿਆ। ਕਾਂਸਟੇਬਲ ਬੈਂਕ੍ਰੌਫਟ ਰਾਈਟ ਨੇ ਆਖਿਆ ਕਿ ਉਨ੍ਹਾਂ ਨੂੰ ਬਾਅਦ ਵਿੱਚ ਪਤਾ ਲੱਗਿਆ ਕਿ ਇਸ ਸੂ਼ਟਿੰਗ ਵਿੱਚ ਪੁਲਿਸ ਅਧਿਕਾਰੀ ਸ਼ਾਮਲ ਸੀ।
ਪੀਲ ਤੇ ਯੌਰਕ ਰੀਜਨਲ ਪੁਲਿਸ ਦੇ ਰੌਬਰੀ ਇਨਵੈਸਟੀਗੇਸ਼ਨ ਬਿਊਰੋ (robbery investigation bureau) ਦੇ ਜਾਂਚਕਾਰ ਇੱਕ ਗੱਡੀ ਦੀ ਨਿਗਰਾਨੀ ਕਰ ਰਹੇ ਸਨ ਜਿਸ ਵਿੱਚ ਡਾਕੇ ਨਾਲ ਸਬੰਧਤ ਤਿੰਨ ਮਸ਼ਕੂਕ ਸਵਾਰ ਸਨ। ਰਾਈਟ ਨੇ ਆਖਿਆ ਕਿ ਨਿਗਰਾਨੀ ਦੌਰਾਨ ਪੁਲਿਸ ਤੇ ਮਸ਼ਕੂਕਾਂ ਵਿੱਚ ਤੂੰ-ਤੂੰ, ਮੈਂ-ਮੈਂ ਹੋ ਗਈ ਤੇ ਪੁਲਿਸ ਅਧਿਕਾਰੀ ਨੇ ਮਸ਼ਕੂਕ ਨੂੰ ਗੋਲੀ ਮਾਰ ਦਿੱਤੀ।
ਮਸ਼ਕੂਕ ਨੂੰ ਟਰੌਮਾ ਸੈਂਟਰ ਲਿਜਾਇਆ ਗਿਆ ਜਿੱਥੇ ਉਸ ਦੀ ਹਾਲਤ ਖਤਰੇ ਤੋਂ ਬਾਹਰ ਦੱਸੀ ਜਾਂਦੀ ਹੈ। ਦੋ ਹੋਰਨਾਂ ਮਸ਼ਕੂਕਾਂ ਨੂੰ ਪੁਲਿਸ ਹਿਰਾਸਤ ਵਿੱਚ ਲੈ ਲਿਆ ਗਿਆ। ਸਾਰੇ ਮਸ਼ਕੂਕ ਆਪਣੇ 20ਵਿਆਂ ਦੇ ਅੱਧ ਵਿੱਚ ਹਨ।