ਨਵੀਂ ਦਿੱਲੀ, 29 ਜੂਨ, (ਪੋਸਟ ਬਿਊਰੋ)- ਭਾਰਤ-ਚੀਨ ਵਿਚਾਲੇ ਸਰਹੱਦੀ ਤਣਾਅ ਹੇਠ ਅੱਜ ਭਾਰਤ ਸਰਕਾਰ ਨੇ ਵੱਡਾ ਕਦਮ ਚੁੱਕਿਆ ਅਤੇ ਚੀਨ ਦੀਆਂ 59 ਮੋਬਾਈਲ ਐਪਸ ਉੱਤੇ ਪਾਬੰਦੀ ਲਾ ਦਿੱਤੀ ਹੈ। ਸਰਕਾਰ ਦੇ ਇਲੈਕਟ੍ਰੋਨਿਕਸ ਅਤੇ ਆਈ ਟੀ ਮੰਤਰਾਲੇ ਨੇ ਅੱਜ ਜਾਰੀ ਬਿਆਨ ਵਿੱਚ ਇਸ ਫ਼ੈਸਲੇ ਦੀ ਜਾਣਕਾਰੀ ਦਿੱਤੀ ਹੈ।
ਤਾਜ਼ਾ ਫੈਸਲੇ ਮੁਤਾਬਕ ਭਾਰਤ ਸਰਕਾਰ ਨੇ ਟਿਕ ਟਾਕ ਅਤੇ ਯੂ ਸੀ ਬ੍ਰਾਉਜ਼ਰ ਸਮੇਤ 59 ਚੀਨੀ ਮੋਬਾਈਲ ਐਪਸ ਦੀ ਵਰਤੋਂ ਉੱਤੇ ਪਾਬੰਦੀ ਲਾਈ ਹੈ। ਸਰਕਾਰ ਨੇ ਇਹ ਫ਼ੈਸਲਾ ਭਾਰਤ ਚੀਨ ਵਿਚਾਲੇ ਤਣਾਅ ਦੌਰਾਨ ਦੇਸ਼ ਦੀ ਸੁਰੱਖਿਆ ਦਾ ਧਿਆਨ ਰੱਖ ਕੇ ਲਾਗੂ ਕੀਤਾ ਹੈ। ਅੱਜ ਜਾਰੀ ਹੋਏ ਬਿਆਨ ਮੁਤਾਬਕ ਮੋਬਾਈਲ ਤੇ ਬਗੈਰ ਮੋਬਾਈਲ ਵਾਲੀਆਂ ਇਨ੍ਹਾਂ ਐਪਸ ਦੀ ਵਰਤੋਂ ਇੰਟਰਨੈੱਟ ਡਿਵਾਈਸਿਜ਼ ਨਾਲ ਨਹੀਂ ਕੀਤੀ ਜਾ ਸਕੇਗੀ। ਇਹ ਐਪਸ ਭਾਰਤ ਦੀ ਅੰਦਰੂਨੀ ਸੁਰੱਖਿਆ ਦੇ ਲਈ ਨੁਕਸਾਨਦੇਹ ਹਨ। ਲੱਦਾਖ ਵਿੱਚ ਕੰਟਰੋਲ ਰੇਖਾ ਉੱਤੇ ਚੀਨ ਨਾਲ ਤਣਾਅ ਦੌਰਾਨ ਸਰਕਾਰ ਨੇ ਚੀਨ ਦੇ ਖਿਲਾਫ਼ ਜਿਨ੍ਹਾਂ 59 ਐਪ ਉੱਤੇ ਪਾਬੰਦੀ ਲਾਈ ਹੈ, ਇਨ੍ਹਾਂ ਵਿੱਚ ਟਿਕ-ਟਾਕ, ਹੈਲੋ, ਵੀਚੈਟ, ਯੂ ਸੀ ਨਿਊਜ਼ ਆਦਿ ਮੁੱਖ ਹਨ। ਚੀਨ ਤੋਂ ਆਉਂਦੇ ਮਾਲ ਬਾਰੇ ਵੀ ਸਨਅਤੀ ਸੰਗਠਨਾਂ ਨਾਲ ਵਿਚਾਰ ਸ਼ੁਰੂ ਹੋ ਗਈ ਹੈ ਕਿ ਕਦੋਂ ਤੇ ਕਿਵੇਂ ਇੰਪੋਰਟ ਦੀ ਰੋਕ ਲਾਈ ਜਾਣੀ ਹੈ। ਭਾਰਤ ਸਰਕਾਰ ਨੇ ਆਈ ਟੀ ਐਕਟ ਦੇ 69ਏ ਸੈਕਸ਼ਨ ਹੇਠ ਇਨ੍ਹਾਂ 59 ਐਪ ਉੱਤੇ ਪਾਬੰਦੀ ਦਾ ਫੈਸਲਾ ਕੀਤਾ ਹੈ, ਕਿਉਂਕਿ ਇਨ੍ਹਾਂ ਐਪਸ ਦੀ ਗਲਤ ਵਰਤੋਂ ਬਾਰੇ ਹੋਰ ਕਈ ਸ਼ਿਕਾਇਤਾਂ ਮਿਲਣ ਦੇ ਨਾਲ ਹੀ ਐਂਡ੍ਰਾਇਡ ਅਤੇ ਆਈ ਓ ਐੱਸ ਪਲੇਟਫਾਰਮ ਤੋਂ ਡਾਟਾ ਚੋਰੀ ਕਰਨ ਬਾਰੇ ਵੀ ਸਿ਼ਕਾਇਤ ਮਿਲ ਰਹੀ ਹੈ।