ਇਸਲਾਮਾਬਾਦ, 29 ਜੂਨ, (ਪੋਸਟ ਬਿਊਰੋ)- ਕਤਰ ਏਅਰਵੇਜ਼ ਸਮੇਤ ਕਈ ਇੰਟਰੈਸ਼ਨਲ ਏਅਰਲਾਈਨਾਂ ਨੇ ਅਚਾਨਕ 262 ਪਾਕਿਸਤਾਨੀ ਪਾਇਲਟਾਂ ਨੂੰ ਡਿਊਟੀ ਲਈ ਆਉਣ ਤੋਂ ਰੋਕ ਦਿੱਤਾ ਤੇ ਉਨ੍ਹਾਂ ਕੋਲ ਫਰਜ਼ੀ ਲਾਇਸੈਂਸ ਹੋਣ ਦੀ ਖਬਰ ਤੋਂ ਬਾਅਦ ਉਨ੍ਹਾਂ ਬਾਰੇ ਸਾਰੀ ਜਾਂਚ ਸ਼ੁਰੂ ਕਰ ਦਿਤੀ ਗਈ ਹੈ। ਨਕਦੀ ਸੰਕਟ ਨਾਲ ਜੂਝ ਰਹੀ ਪਾਕਿਸਤਾਨ ਇੰਟਰਨੈਸ਼ਨਲ ਏਅਰਲਾਈਨ (ਪੀ ਆਈ ਏ) ਨੇ ਪਿਛਲੇ ਹਫਤੇ ਸ਼ੱਕੀ ਲਾਇਸੈਂਸ ਵਾਲੇ 150 ਪਾਇਲਟਾਂ ਨੂੰ ਕੰਮ ਉੱਤੇ ਆਉਣ ਤੋਂ ਰੋਕ ਦਿੱਤਾ ਸੀ, ਕਿਉਂਕਿ ਕਰਾਚੀ ਦੇ 22 ਮਈ ਦੇ ਜਹਾਜ਼ ਹਾਦਸੇ ਦੀ ਜਾਂਚ ਵਿੱਚ ਪਾਇਲਟਾਂ ਅਤੇ ਏਵੀਏਸ਼ਨ ਕੰਟਰੋਲ ਟਾਵਰ ਨੂੰ ਜ਼ਿੰਮੇਵਾਰ ਦੱਸਿਆ ਗਿਆ ਸੀ। ਇਸ ਹਾਦਸੇ ਵਿੱਚ 97 ਲੋਕਾਂ ਦੀ ਮੌਤ ਹੋ ਗਈ ਸੀ।
ਖਬਰ ਏਜੰਸੀ ਨੇ ਸੂਤਰਾਂ ਦੇ ਹਵਾਲੇ ਨਾਲ ਦੱਸਿਆ ਹੈ ਕਿ ਕੁਵੈਤ ਏਅਰ ਨੇ 7 ਪਾਕਿਸਤਾਨੀ ਪਾਇਲਟਾਂ ਅਤੇ 56 ਇੰਜੀਨੀਅਰਾਂ ਨੂੰ ਕੰਮ ਕਰਨ ਤੋਂ ਰੋਕਿਆ ਹੈ ਅਤੇ ਕਤਰ ਏਅਰਵੇਜ਼, ਓਮਾਨ ਏਅਰ ਤੇ ਵੀਅਤਨਾਮ ਏਅਰਲਾਈਨਜ਼ ਨੇ ਪਾਕਿਸਤਾਨੀ ਪਾਇਲਟਾਂ, ਇੰਜੀਨੀਅਰਾਂ ਤੇ ਹੋਰ ਮੁਲਾਜ਼ਮਾਂ ਦੀ ਲਿਸਟ ਬਣਾ ਕੇ ਕਿਹਾ ਹੈ ਕਿ ਜਿਨ੍ਹਾਂ ਦੇ ਨਾਂ ਇਨ੍ਹਾਂ ਲਿਸਟਾਂ ਵਿੱਚ ਹਨ, ਉਹ ਉਦੋਂ ਤੱਕ ਕੰਮ ਉੱਤੇ ਨਹੀਂ ਆਉਣਗੇ, ਜਦੋਂ ਤੱਕ ਪਾਕਿਸਤਾਨੀ ਅਧਿਕਾਰੀਆਂ ਤੋਂ ਜਾਂਚ ਰਿਪੋਰਟ ਨਹੀਂ ਮਿਲ ਜਾਂਦੀ। ਪੀ ਆਈ ਏ ਦੇ ਬੁਲਾਰੇ ਨੇ ਦੱਸਿਆ ਕਿ ਕੰਪਨੀ ਨੇ ਵਿਦੇਸ਼ੀ ਮਿਸ਼ਨਾਂ, ਸੰਸਾਰਕ ਰੈਗੂਲੇਟਰੀ ਅਤੇ ਸੁਰੱਖਿਆ ਸੰਗਠਨਾਂ ਨੂੰ ਚਿੱਠੀ ਲਿਖ ਕੇ ਭਰੋਸਾ ਦਿੱਤਾ ਹੈ ਕਿ ਉਸ ਨੇ ਗਲਤ ਢੰਗ ਨਾਲ ਲਾਇਸੈਂਸ ਹਾਸਲ ਕਰਨ ਦੇ ਸ਼ੱਕ ਵਾਲੇ 141 ਪਾਇਲਟਾਂ ਨੂੰ ਕੰਮ ਉੱਤੇ ਆਉਣ ਤੋਂ ਰੋਕ ਦਿੱਤਾ ਹੈ। ਇਸ ਦੀ ਸਰਕਾਰੀ ਚਿੱਠੀ ਉੱਤੇ ਪੀ ਆਈ ਏ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਅਰਸ਼ਦ ਮਲਿਕ ਵੱਲੋਂ ਦਸਖਤ ਕੀਤੇ ਗਏ ਪਤਾ ਲੱਗੇ ਹਨ।
ਇਸ ਦੌਰਾਨ ਪਾਕਿਸਤਾਨ ਵਿੱਚ 24 ਘੰਟਿਆਂ ਵਿੱਚ ਕੋਰੋਨਾ ਦੇ 3,557 ਨਵੇਂ ਕੇਸ ਮਿਲਣ ਤੋਂ ਬਾਅਦ ਦੇਸ਼ ਵਿੱਚ ਇਨਫੈਕਸ਼ਨ ਦੇ ਕੇਸ ਦੋ ਲੱਖ ਤੋਂ ਵਧ ਗਏ ਹਨ। ਇਸ ਕਾਰਨ ਯੂ ਏ ਈ ਨੇ ਉਥੋਂ ਆਉਂਦੀਆਂ ਸਭ ਉਡਾਣਾਂ ਨੂੰ ਮੁਲਤਵੀ ਕਰ ਦਿੱਤਾ ਹੈ। ਯੂ ਏ ਈ ਨੇ 29 ਜੂਨ ਤੋਂ ਕਿਸੇ ਵੀ ਯਾਤਰੀ ਨੂੰ ਉਦੋਂ ਤੱਕ ਪਾਕਿਸਤਾਨ ਵੱਲੋਂ ਨਾ ਆਉਣ ਦੇਣ ਦਾ ਫੈਸਲਾ ਕੀਤਾ ਹੈ, ਜਦੋਂ ਤੱਕ ਕਿ ਉਸ ਦੀ ਜਾਂਚ ਲਈ ਵਿਸ਼ੇਸ਼ ਕੋਵਿਡ-19 ਲੈਬ ਨਹੀਂ ਬਣਾ ਲਈ ਜਾਂਦੀ। ਪਾਕਿਸਤਾਨ ਵਿੱਚੋਂ ਹੋ ਕੇ ਜਾਣ ਵਾਲੀਆਂ ਉਡਾਣਾਂ ਉੱਤੇ ਵੀ ਇਹ ਨਿਯਮ ਲਾਗੂ ਕਰ ਦਿੱਤਾ ਗਿਆ ਹੈ।