ਨਕੋਦਰ, 29 ਜੂਨ (ਪੋਸਟ ਬਿਊਰੋ)- ਪਿੰਡ ਕੰਗ ਸਾਹਿਬ ਰਾਏ ਵਿੱਚ ਆਪਣੀ ਨੂੰਹ ਅਤੇ ਕੁੜਮ ਦੀਆਂ ਧਮਕੀਆਂ ਅਤੇ ਲੜਾਈ ਤੋਂ ਪ੍ਰੇਸ਼ਾਨ ਇੱਕ ਕਿਸਾਨ ਨੇ 25 ਜੂਨ ਵੀਰਵਾਰ ਨੂੰ ਜ਼ਹਿਰੀਲੀ ਦਵਾ ਨਿਗਲ ਲਈ ਅਤੇ 26 ਜੂਨ ਸ਼ੁੱਕਰਵਾਰ ਨੂੰ ਪ੍ਰਾਈਵੇਟ ਹਸਪਤਾਲ ਵਿੱਚ ਦਮ ਤੋੜ ਦਿੱਤਾ।
ਮ੍ਰਿਤਕ ਰਾਵਲ ਸਿੰਘ ਦੇ ਬੇਟੇ ਅਵਤਾਰ ਸਿੰਘ ਨੇ ਪੁਲਸ ਨੂੰ ਦੱਸਿਆ ਕਿ ਉਹ ਖੇਤੀ ਕਰਦਾ ਹੈ। 2010 ਵਿੱਚ ਉਸ ਦਾ ਵਿਆਹ ਹਰਜੀਤ ਕੌਰ ਪੁੱਤਰੀ ਮੋਹਨ ਸਿੰਘ ਪਿੰਡ ਢੀਂਡਸਾ ਥਾਣਾ ਗੋਰਾਇਆ ਨਾਲ ਹੋਇਆ ਸੀ। ਉਸ ਦੇ ਦੋ ਬੇਟੇ ਹਨ। ਵਿਆਹ ਦੇ ਬਾਅਦ ਤੋਂ ਉਸ ਦੀ ਪਤਨੀ ਹਰਜੀਤ ਪਰਵਾਰ ਦੇ ਨਾਲ ਲੜਾਈ ਕਰ ਕੇ ਪਰੇਸ਼ਾਨ ਕਰਦੀ ਰਹਿੰਦੀ ਸੀ। ਪਿਛਲੇ ਕੁਝ ਦਿਨਾਂ ਤੋਂ ਘਰ ਵਿੱਚ ਮਾਹੌਲ ਤਣਾਅ ਪੂਰਨ ਚੱਲ ਰਿਹਾ ਸੀ। 23 ਜੂਨ ਰਾਤ ਹਰਦੀਪ ਕੌਰ ਮੇਰੇ ਮਾਤਾ-ਪਿਤਾ ਨਾਲ ਬੱਚਿਆਂ ਨੂੰ ਝਿੜਕਣ ਬਾਰੇ ਝਗੜਨ ਲੱਗੀ ਤੇ ਆਪਣੇ ਪਿਤਾ ਨੂੰ ਫੋਨ ਕਰ ਦਿੱਤਾ। ਇਸ 'ਤੇ ਫੋਨ ਦਾ ਸਪੀਕਰ ਆਨ ਕਰ ਕੇ ਉਸ ਨੇ ਆਪਣੇ ਪਿਤਾ ਮੋਹਨ ਸਿੰਘ ਨਾਲ ਗੱਲ ਕਰਵਾਈ ਤਾਂ ਗਾਲੀ-ਗਲੌਚ ਕਰਨ ਅਤੇ ਪਰਵਾਰ ਨੂੰ ਧਮਕੀਆਂ ਦੇਣ ਲੱਗੇ। 24 ਜੂਨ ਨੂੰ ਫਿਰ ਝਗੜਾ ਕੀਤਾ ਅਤੇ ਦਾਜ ਦਾ ਝੂਠਾ ਕੇਸ ਕਰਨ ਦੀਆਂ ਧਮਕੀਆਂ ਦਿੱਤੀਆਂ। ਅਵਤਾਰ ਸਿੰਘ ਨੇ ਦੱਸਿਆ ਕਿ ਉਸ ਦੇ ਪਿਤਾ ਰਾਵਲ ਸਿੰਘ ਨੇ ਉਸ ਦੇ ਸਹੁਰੇ ਅਤੇ ਪਤਨੀ ਦੀਆਂ ਧਮਕੀਆਂ ਅਤੇ ਝਗੜੇ ਤੋਂ ਪ੍ਰੇਸ਼ਾਨ ਹੋ ਕੇ ਆਪਣੇ ਖੇਤਾਂ ਵਿੱਚ ਬਣੇ ਕਮਰੇ ਵਿੱਚ ਜਾ ਕੇ ਜ਼ਹਿਰੀਲੀ ਦਵਾਈ ਖਾ ਲਈ। ਰਾਤ ਨੂੰ ਘਰ ਆਉਣ 'ਤੇ ਉਲਟੀਆਂ ਹੋਣ ਲੱਗੀਆਂ। ਪੁੱਛਣ 'ਤੇ ਪਿਤਾ ਨੇ ਦੱਸਿਆ ਕਿ ਉਨ੍ਹਾਂ ਨੇ ਜ਼ਹਿਰੀਲੀ ਦਵਾਈ ਖਾ ਲਈ ਹੈ, ਜਿਸ ਤੋਂ ਘਬਰਾ ਕੇ ਅਵਤਾਰ ਨੇ ਵੀ ਜ਼ਹਿਰੀਲੀ ਦਵਾ ਪੀ ਲਈ। ਉਸ ਦੀ ਮਾਤਾ ਜਸਵਿੰਦਰ ਕੌਰ ਨੇ ਰੌਲਾ ਪਾ ਕੇ ਆਂਢ-ਗੁਆਂਢ ਦੇ ਲੋਕਾਂ ਤੇ ਰਿਸ਼ਤੇਦਾਰਾਂ ਨੂੰ ਬੁਲਾ ਲਿਆ ਜੋ ਪਿਓ-ਪੁੱਤ ਨੂੰ ਨਿੱਜੀ ਹਸਪਤਾਲ ਵਿੱਚ ਲੈ ਗਏ। ਓਥੇ ਪਿਤਾ ਦੀ ਮੌਤ ਹੋ ਗਈ ਅਤੇ ਅਵਤਾਰ ਨੂੰ ਬਚਾ ਲਿਆ ਗਿਆ। ਥਾਣਾ ਸਦਰ ਦੇ ਮੁਖੀ ਵਿਨੋਦ ਕੁਮਾਰ ਨੇ ਦੱਸਿਆ ਕਿ ਪੁਲਸ ਨੇ ਸ਼ਿਕਾਇਤ ਉੱਤੇ ਨੂੰਹ ਹਰੀਜਤ ਕੌਰ ਅਤੇ ਉਸ ਦੇ ਬਾਪ ਮੋਹਨ ਸਿੰਘ ਦੇ ਖਿਲਾਫ ਕੇਸ ਦਰਜ ਕਰ ਲਿਆ ਹੈ। ਦੋਸ਼ੀਆਂ ਦੀ ਤਲਾਸ਼ ਕੀਤੀ ਜਾ ਰਹੀ ਹੈ।