ਕਾਠਮੰਡੂ, 29 ਜੂਨ (ਪੋਸਟ ਬਿਊਰੋ)- ਨੇਪਾਲ ਦੇ ਪ੍ਰਧਾਨ ਮੰਤਰੀ ਕੇ ਪੀ ਸ਼ਰਮਾ ਓਲੀ ਦੀ ਕੁਰਸੀ 'ਤੇ ਖਤਰੇ ਦੇ ਬੱਦਲ ਲਗਾਤਾਰ ਮੰਡਰਾਉਂਦੇ ਜਾ ਰਹੇ ਹਨ। ਸੱਤਾਧਾਰੀ ਕਮਿਊਨਿਸਟ ਪਾਰਟੀ 'ਚ ਪੈਦਾ ਹੋਏ ਘਮਸਾਨ ਅਤੇ ਦੇਸ਼ ਵਿੱਚ ਸਰਕਾਰ ਵਿਰੁੱਧ ਗੁੱਸੇ ਤੋਂ ਧਿਆਨ ਭਟਕਾਉਣ ਲਈ ਓਲੀ ਕੱਟੜਪੰਥੀ ਰਾਸ਼ਟਰਵਾਦ ਦੀ ਵਰਤੋਂ ਕਰ ਰਹੇ ਹਨ।
ਕੱਲ੍ਹ ਓਲੀ ਨੇ ਨਵਾਂ ਬਵਾਲ ਖੜ੍ਹਾ ਕਰ ਦਿੱਤਾ ਹੈ। ਆਪਣੀ ਪਾਰਟੀ ਵਿੱਚ ਪੈਦਾ ਹੋਏ ਘਮਸਾਨ ਦੇ ਬਾਰੇ ਉਨ੍ਹਾਂ ਨੇ ਭਾਰਤ 'ਤੇ ਇਸ਼ਾਰਿਆਂ ਵਿੱਚ ਦੋਸ਼ ਲਾਉਂਦੇ ਹੋਏ ਕਿਹਾ ਕਿ ਇੱਕ ਦੂਤਘਰ ਮੇਰੀ ਸਰਕਾਰ ਵਿਰੁੱਧ ਹੋਟਲ 'ਚ ਸਾਜਿਸ਼ ਰਚ ਰਿਹਾ ਹੈ। ਮਦਨ ਭੰਡਾਰੀ ਦੀ 69ਵੀਂ ਜਯੰਤੀ ਦੇ ਮੌਕੇ ਓਲੀ ਨੇ ਕਿਹਾ ਕਿ ਭਾਵੇਂ ਉਨ੍ਹਾਂ ਨੂੰ ਅਹੁਦੇ ਤੋਂ ਹਟਾਉਣ ਦੀ ਖੇਡ ਸ਼ੁਰੂ ਹੋਈ ਹੋਵੇ, ਪਰ ਇਹ ਅਸੰਭਵ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਭਾਰਤੀ ਜ਼ਮੀਨ ਨੂੰ ਨੇਪਾਲੀ ਨਕਸ਼ੇ 'ਚ ਦਿਖਾਉਣ ਵਾਲੇ ਸੰਵਿਧਾਨ ਸੋਧ ਤੋਂ ਬਾਅਦ ਉਨ੍ਹਾਂ ਵਿਰੁੱਧ ਸਾਜਿਸ਼ਾਂ ਰਚੀਆਂ ਜਾ ਰਹੀਆਂ ਹਨ। ਮੈਨੂੰ ਅਹੁਦੇ ਤੋਂ ਹਟਾਉਣ ਲਈ ਖੁੱਲ੍ਹੀਆਂ ਦੌੜਾਂ ਹੋ ਰਹੀਆਂ ਹਨ। ਓਲੀ ਨੇ ਕਿਹਾ ਕਿ ਨੇਪਾਲ ਦੀ ਕੌਮੀਅਤ ਕਮਜ਼ੋਰ ਨਹੀਂ ਹੈ।