ਟੋਰਾਂਟੋ, 29 ਜੂਨ (ਪੋਸਟ ਬਿਊਰੋ) : ਕਈ ਸਾਲਾਂ ਦੀਆਂ ਅਗਜ਼ਨੀ, ਸ਼ੂਟਿੰਗ ਤੇ ਭ੍ਰਿਸ਼ਟਾਚਾਰ ਦੀਆਂ ਘਟਨਾਵਾਂ ਕਾਰਨ ਅਤੇ ਘੱਟੋ ਘੱਟ ਇੱਕ ਕਤਲ ਤੋਂ ਬਾਅਦ ਓਨਟਾਰੀਓ ਸਰਕਾਰ ਨੇ ਟੋਇੰਗ ਇੰਡਸਟਰੀ (towing industry) ਵਿੱਚ ਸੁਧਾਰ ਕਰਨ ਤੇ ਇਸ ਨੂੰ ਨਿਯੰਤਰਿਤ ਕਰਨ ਲਈ ਇੱਕ ਟਾਸਕ ਫੋਰਸ ਕਾਇਮ ਕੀਤੀ ਹੈ।
ਇੰਡਸਟਰੀ ਵਿੱਚ ਮੁਜਰਮਾਨਾ ਗਤੀਵਿਧੀਆਂ ਸਬੰਧੀ ਦੋ ਵੱਡੀਆਂ ਪੁਲਿਸ ਜਾਂਚ ਤੋਂ ਬਾਅਦ ਇਹ ਐਲਾਨ ਕੀਤਾ ਗਿਆ ਹੈ। ਇਨ੍ਹਾਂ ਵਿੱਚੋਂ ਇੱਕ ਟੋਰਾਂਟੋ ਪੁਲਿਸ ਅਧਿਕਾਰੀ ਨਾਲ ਸਬੰਧਤ ਹੈ ਜਿਸ ਵਿੱਚ ਉਸ ਵੱਲੋਂ ਕਥਿਤ ਤੌਰ ਉੱਤੇ ਟੋਅ ਟਰੱਕ ਡਰਾਈਵਰਾਂ ਨੂੰ ਪੁਲਿਸ ਦਾ ਗੁਪਤ ਡਾਟਾ ਮੁਹੱਈਆ ਕਰਵਾਉਣ ਦਾ ਦੋਸ਼ ਹੈ।
ਪ੍ਰੀਮੀਅਰ ਡੱਗ ਫੋਰਡ ਨੇ ਆਖਿਆ ਕਿ ਉਹ ਸਮਝਦੇ ਹਨ ਕਿ ਵੱਡੀ ਗਿਣਤੀ ਟੋਅ ਟਰੱਕ ਡਰਾਈਵਰ ਇਮਾਨਦਾਰ ਲੋਕ ਹਨ ਜਿਹੜੇ ਆਪਣੇ ਪਰਿਵਾਰਾਂ ਲਈ ਪੂਰੀ ਮਸ਼ੱਕਤ ਕਰਦੇ ਹਨ ਪਰ ਇੱਕ ਨਿਕਾ ਜਿਹਾ ਗਰੁੱਪ ਗੜਬੜੀ ਕਰਕੇ ਬਾਕੀਆਂ ਲਈ ਵੀ ਖੱਡੇ ਪੱੁਟ ਰਿਹਾ ਹੈ। ਫੋਰਡ ਨੇ ਤੈਸ਼ ਵਿੱਚ ਆਉਂਦਿਆਂ ਆਖਿਆ ਕਿ ਇਸ ਤਰ੍ਹਾਂ ਦੀਆਂ ਗਤੀਵਿਧੀਆਂ ਲਈ ਕੋਈ ਗੁੰਜਾਇਸ਼ ਨਹੀਂ ਹੈ, ਜਿਹੜੇ ਇਹ ਸੱਭ ਗੜਬੜੀ ਕਰ ਰਹੇ ਹਨ, ਉਨ੍ਹਾਂ ਨੂੰ ਅਸੀਂ ਇਹ ਸਪਸ਼ਟ ਕਰਨਾ ਚਾਹੁੰਦੇ ਹਾਂ ਕਿ ਅਸੀਂ ਤੁਹਾਨੂੰ ਫੜ੍ਹ ਕੇ ਜੇਲ੍ਹ ਵਿੱਚ ਡੱਕਾਂਗੇ।
ਇਸ ਮੌਕੇ ਟਰਾਂਸਪੋਰਟੇਸ਼ਨ ਮੰਤਰੀ ਕੈਰੋਲੀਨ ਮਲਰੋਨੀ ਨੇ ਆਖਿਆ ਕਿ ਟਾਸਕ ਫੋਰਸ ਵਿੱਚ ਪ੍ਰੋਵਿੰਸ਼ੀਅਲ ਸਰਕਾਰ ਦੇ ਨੁਮਾਇੰਦਿਆਂ ਤੋਂ ਇਲਾਵਾ ਓਪੀਪੀ ਦੇ ਅਧਿਕਾਰੀ ਵੀ ਸ਼ਾਮਲ ਹੋਣਗੇ। ਉਨ੍ਹਾਂ ਆਖਿਆ ਕਿ ਅਸੀਂ ਚਾਹੁੰਦੇ ਹਾਂ ਕਿ ਟੋਅ ਟਰੱਕ ਸਿਸਟਮ ਕਿਸੇ ਵੀ ਮੁਜਰਮਾਨਾ ਗਤੀਵਿਧੀ ਤੋਂ ਪਾਸੇ ਰਹੇ। ਪਿਛਲੇ ਦੋ ਸਾਲਾਂ ਵਿੱਚ ਟੋਅ ਟਰੱਕ ਡਰਾਈਵਰਾਂ ਦਾ ਇੱਕ ਗਰੱੁਪ ਅਗਜ਼ਨੀ ਦੀਆਂ ਘਟਨਾਵਾਂ ਤੋਂ ਇਲਾਵਾ ਇੱਕ ਕਤਲ ਦੇ ਮਾਮਲੇ ਵਿੱਚ ਵੀ ਸ਼ਾਮਲ ਹੈ।