ਲਾਕਡਾਊਨ ਦੌਰਾਨ ਥੀਏਟਰਾਂ ਦੇ ਬੰਦ ਹੋਣ ਨਾਲ ਦਰਸ਼ਕਾਂ ਦਾ ਰੁਝਾਨ ਡਿਜੀਟਲ ਪਲੇਟਫਾਰਮ ਵੱਲ ਵਧਿਆ ਹੈ। ਥੀਏਟਰ ਖੁੱਲ੍ਹਣ ਬੇਯਕੀਨੀ ਨੂੰ ਦੇਖ ਕੇ ਕੁਝ ਨਿਰਮਾਤਾ ਆਪਣੀਆਂ ਫਿਲਮਾਂ ਸਿੱਧੇ ਡਿਜੀਟਲ ਪਲੇਟਫਾਰਮ 'ਤੇ ਰਿਲੀਜ਼ ਕਰ ਰਹੇ ਹਨ। ‘ਛਿਛੋਰੇ’ ਅਤੇ ‘ਫੁਕਰੇ’ ਆਦਿ ਫਿਲਮਾਂ ਵਿੱਚ ਆਪਣੀ ਕਾਮੇਡੀ ਨਾਲ ਸਾਰਿਆਂ ਨੂੰ ਹਸਾਉਣ ਵਾਲੇ ਵਰੁਣ ਸ਼ਰਮਾ ਦਾ ਮੰਨਣਾ ਹੈ ਕਿ ਦਰਸ਼ਕਾਂ ਦੀ ਦਿਲਚਸਪੀ ਵਿੱਚ ਇਹ ਬਦਲਾਅ ਸਥਾਈ ਨਹੀਂ। ਆਪਣੀ ਮਾਂ ਦੀ ਮਿਸਾਲ ਦਿੰਦੇ ਹੋਏ ਉਹ ਕਹਿੰਦੇ ਹਨ ਕਿ ਉਹ ਖੁਦ ਡਿਜੀਟਲ ਕੰਟੈਂਟ ਅਤੇ ਨਿਰਧਾਰਤ ਸਮੇਂ 'ਤੇ ਆਉਣ ਵਾਲੇ ਟੀ ਵੀ ਸੀਰੀਅਲ ਦੇਖਣਾ ਪਸੰਦ ਕਰਦੀ ਹੈ। ਅੱਜਕੱਲ੍ਹ ਟੀ ਵੀ 'ਤੇ ਉਨ੍ਹਾਂ ਦੀ ਮਾਂ ਦੇ ਪਸੰਦ ਵਾਲੇ ਪ੍ਰੋਗਰਾਮ ਨਹੀਂ ਆ ਰਹੇ, ਫਿਰ ਵੀ ਉਹ ਟੀ ਵੀ ਦੇਖਦੀ ਹੈ। ਉਨ੍ਹਾਂ ਵਾਂਗ ਟੀ ਵੀ ਦੇ ਰੋਜ਼ਾਨਾ ਵਾਲੇ ਦਰਸ਼ਕਾਂ ਦੀ ਦਿਲਚਸਪੀ ਟੀ ਵੀ ਵਿੱਚ ਬਣੀ ਰਹੇਗੀ। ਟੀ ਵੀ ਛੱਡ ਕੇ ਡਿਜੀਟਲ ਦਾ ਰੁਖ਼ ਕਰਨ ਵਾਲੇ ਕੁਝ ਲੋਕਾਂ ਦੀਆਂ ਆਦਤਾਂ ਵਿੱਚ ਬਦਲਾਅ ਸੰਭਵ ਹੈ। ਜਿਨ੍ਹਾਂ ਲੋਕਾਂ ਨੂੰ ਥੀਏਟਰ ਵਿੱਚ ਫਿਲਮਾਂ ਦੇਖਣਾ ਪਸੰਦ ਹੈ, ਮਾਹੌਲ ਸਹੀ ਹੋਣ ਦੇ ਬਾਅਦ ਉਹ ਥੀਏਟਰ ਵਿੱਚ ਹੀ ਫਿਲਮਾਂ ਦਾ ਆਨੰਦ ਲੈਣਾ ਚਾਹੁਣਗੇ।
ਆਪਣੀ ਅਗਲੀ ਹਾਰਰ ਕਾਮੇਡੀ ਫਿਲਮ ‘ਰੂਹੀ ਅਫਜਾਨਾ' ਦੇ ਬਾਰੇ ਵਰੁਣ ਦੱਸਦੇ ਹਨ ਕਿ ਇਸ ਦੀ ਸ਼ੂਟਿੰਗ ਹੋ ਚੁੱਕੀ ਹੈ, ਫਿਲਹਾਲ ਇਸ ਦਾ ਪੋਸਟ ਪ੍ਰੋਡਕਸ਼ਨ ਕੰਮ ਚੱਲ ਰਿਹਾ ਹੈ। ਇਸ ਦੌਰਾਨ ਆਈ ਆਫਤ ਕਾਰਨ ਇਸ ਫਿਲਮ ਦੀ ਰਿਲੀਜ਼ ਡੇਟ ਬਦਲਣਾ ਸੁਭਾਵਕ ਹੈ। ਫਿਲਮ ਨੂੰ ਡਿਜੀਟਲ ਪਲੇਟਫਾਰਮ 'ਤੇ ਰਿਲੀਜ਼ ਕਰਨ ਬਾਰੇ ਫਿਲਹਾਲ ਉਨ੍ਹਾਂ ਦੀ ਨਿਰਮਾਤਾਵਾਂ ਨਾਲ ਕੋਈ ਗੱਲਬਾਤ ਨਹੀਂ ਹੋਈ। ਇਸ ਦੇ ਇਲਾਵਾ ਉਹ ਕੁਝ ਹੋਰ ਪ੍ਰੋਜੈਕਟਾਂ 'ਤੇ ਵੀ ਕੰਮ ਕਰ ਰਹੇ ਹਨ।