ਵਾਸਿ਼ੰਗਟਨ, 26 ਜੂਨ (ਪੋਸਟ ਬਿਊਰੋ):ਐਨਬੀਏ ਤੇ ਨੈਸ਼ਨਲ ਬਾਸਕਿਟਬਾਲ ਪਲੇਅਰਜ਼ ਐਸੋਸਿਏਸ਼ਨ ਦਾ ਕਹਿਣਾ ਹੈ ਕਿ ਨਵੇਂ ਸੀਜ਼ਨ ਦੀ ਸ਼ੁਰੂਆਤ ਤੋਂ ਪਹਿਲਾਂ ਕੀਤੀ ਜਾ ਰਹੀ ਤਿਆਰੀ ਵਿਚ ਕੋਵਿਡ-19 ਸਬੰਧੀ ਟੈਸਟ ਲਾਜ਼ਮੀ ਤੌਰ ਉੱਤੇ ਕਰਵਾਏ ਜਾਣ ਤੋਂ ਬਾਅਦ 16 ਖਿਡਾਰੀ ਕੋਵਿਡ-19 ਪਾਜ਼ੀਟਿਵ ਪਾਏ ਗਏ ਹਨ।
ਮੰਗਲਵਾਰ ਨੂੰ ਟੈਸਟ ਕੀਤੇ ਗਏ 302 ਖਿਡਾਰੀਆਂ ਵਿੱਚ ਇਹ 16 ਖਿਡਾਰੀ ਵੀ ਸ਼ਾਮਲ ਸਨ। ਅਗਲੇ ਮਹੀਨੇ ਓਰਲੈਂਡੋ, ਫਲੋਰਿਡਾ ਵਿੱਚ ਡਿਜ਼ਨੀ ਕੈਂਪਸ ਵਿੱਚ ਸ਼ੁਰੂ ਹੋਣ ਜਾ ਰਹੇ ਮੁਕਾਬਲਿਆਂ ਵਿੱਚ ਹਿੱਸਾ ਲੈਣ ਵਾਲੀਆਂ ਸਾਰੀਆਂ 22 ਟੀਮਾਂ ਦੇ ਹੁਣ ਟੈਸਟ ਕੀਤੇ ਜਾ ਰਹੇ ਹਨ। ਜਿਨ੍ਹਾਂ ਖਿਡਾਰੀਆਂ ਦਾ ਕੋਵਿਡ-19 ਸਬੰਧੀ ਟੈਸਟ ਪਾਜ਼ੀਟਿਵ ਆਇਆ ਹੈ ਉਨ੍ਹਾਂ ਦੇ ਨਾਂਵਾਂ ਦਾ ਖੁਲਾਸਾ ਨਹੀਂ ਕੀਤਾ ਗਿਆ ਹੈ। ਪਰ ਇੰਡੀਆਨਾ ਦੇ ਮਾਲਕਮ ਬ੍ਰੌਗਡਨ ਤੇ ਸੈਕਰਾਮੈਂਟੋ ਦੇ ਖਿਡਾਰੀ ਜਾਬਾਰੀ ਪਾਰਕਰ ਤੇ ਐਲੈਕਸ ਲੈਨ ਨੇ ਆਪਣੇ ਕੋਵਿਡ-19 ਪਾਜ਼ੀਟਿਵ ਹੋਣ ਦੀ ਗੱਲ ਜਨਤਕ ਤੌਰ ਉੱਤੇ ਮੰਨੀ ਹੈ।
ਦ ਲੀਗ ਅਤੇ ਦ ਯੂਨੀਅਨ ਦਾ ਕਹਿਣਾ ਹੈ ਕਿ ਕੋਈ ਵੀ ਖਿਡਾਰੀ ਜਿਹੜਾ ਪਾਜ਼ੀਟਿਵ ਆਉਂਦਾ ਹੈ ਉਸ ਨੂੰ ਉਦੋਂ ਤੱਕ ਸੈਲਫ ਆਈਸੋਲੇਸ਼ਨ ਵਿੱਚ ਰਹਿਣਾ ਹੋਵੇਗਾ ਜਦੋਂ ਤੱਕ ਉਹ ਆਈਸੋਲੇਸ਼ਨ ਖ਼ਤਮ ਕਰਨ ਸਬੰਧੀ ਹੈਲਥ ਪ੍ਰੋਟੋਕਾਲਜ਼ ਨੂੰ ਪੂਰਾ ਨਹੀਂ ਕਰ ਲੈਂਦਾ। ਇਸ ਤੋਂ ਬਾਅਦ ਉਸ ਨੂੰ ਡਾਕਟਰ ਦੀ ਜਾਂਚ ਮਗਰੋਂ ਹੀ ਖੇਡਣ ਲਈ ਹਰੀ ਝੰਡੀ ਮਿਲੇਗੀ।