ਓਨਟਾਰੀਓ, 13 ਨਵੰਬਰ (ਪੋਸਟ ਬਿਊਰੋ) : ਪ੍ਰੀਮੀਅਰ ਡੱਗ ਫੋਰਡ ਦੀ ਸਰਕਾਰ ਵੱਲੋਂ ਆਫੀਸ਼ੀਅਲ ਪਾਰਟੀ ਦਾ ਦਰਜਾ ਹਾਸਲ ਕਰਨ ਲਈ ਐਮਪੀਪੀਜ਼ ਦੀ ਗਿਣਤੀ 8 ਤੋਂ ਵਧਾ ਕੇ 12 ਕੀਤੇ ਜਾਣ ਨਾਲ ਲਿਬਰਲ ਪਾਰਟੀ ਇਸ ਮੌਕੇ ਤੋਂ ਮੁੜ ਵਾਂਝੀ ਰਹਿ ਜਾਵੇਗੀ।
ਇਸ ਸਬੰਧ ਵਿੱਚ ਨਵੇਂ ਮਾਪਦੰਡਾਂ ਦਾ ਖੁਲਾਸਾ ਵੀਰਵਾਰ ਨੂੰ ਵਿੱਤ ਮੰਤਰੀ ਵਿੱਕ ਫੈਡੇਲੀ ਵੱਲੋਂ ਜਾਰੀ ਕੀਤੇ ਜਾਣ ਵਾਲੇ ਬਿਆਨ ਵਿੱਚ ਕੀਤਾ ਜਾਵੇਗਾ। ਜਿ਼ਕਰਯੋਗ ਹੈ ਕਿ ਅੰਤਰਿਮ ਲਿਬਰਲ ਆਗੂ ਜੌਹਨ ਫਰੇਜ਼ਰ, ਜਿਨ੍ਹਾਂ ਦੀ ਪਾਰਟੀ ਕੈਥਲੀਨ ਵਿੰਨ ਦੀ ਅਗਵਾਈ ਵਿੱਚ ਜੂਨ ਵਿੱਚ ਹੋਈਆਂ ਚੋਣਾਂ ਵਿੱਚ ਸੱਤ ਸੀਟਾਂ ਤੱਕ ਹੀ ਸਿਮਟ ਗਈ, ਵੱਲੋਂ ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਸਰਕਾਰ ਉੱਤੇ ਆਫੀਸੀਅਲ ਪਾਰਟੀ ਦਾ ਦਰਜਾ ਹਾਸਲ ਕਰਨ ਲਈ ਪਾਏ ਜਾਣ ਵਾਲੇ ਦਬਾਅ ਕਾਰਨ ਹੀ ਫੋਰਡ ਸਰਕਾਰ ਵੱਲੋਂ ਇਹ ਫੈਸਲਾ ਲਿਆ ਗਿਆ ਹੈ। ਫਰੇਜ਼ਰ ਚਾਹੁੰਦੇ ਸਨ ਕਿ 1.1 ਮਿਲੀਅਨ ਵੋਟਰਾਂ ਵੱਲੋਂ ਲਿਬਰਲ ਉਮੀਦਵਾਰਾਂ ਨੂੰ ਹਾਸਲ ਹੋਣ ਵਾਲੇ 19 ਫੀ ਸਦੀ ਸਮਰਥਨ ਬਦਲੇ ਉਨ੍ਹਾਂ ਨੂੰ ਇਹ ਦਰਜਾ ਦਿੱਤਾ ਜਾਵੇ।
ਪਰ ਸਰਕਾਰੀ ਹਾਊਸ ਲੀਡਰ ਟੌਡ ਸਮਿੱਥ ਨੇ ਆਖਿਆ ਕਿ ਸੀਟਾਂ ਵਿੱਚ ਕੀਤਾ ਗਿਆ ਵਾਧਾ ਇਸ ਲਈ ਵੀ ਜਾਇਜ਼ ਹੈ ਕਿਉਂਕਿ ਜੂਨ ਵਿੱਚ ਹੋਈਆਂ ਚੋਣਾਂ ਤੋਂ ਬਾਅਦ ਵਿਧਾਨਸਭਾ ਦਾ 124 ਸੀਟਾਂ ਨਾਲ ਪਸਾਰ ਹੋ ਗਿਆ ਹੈ ਤੇ ਅਜਿਹਾ ਨਵੇਂ ਹਲਕੇ ਸ਼ਾਮਲ ਕੀਤੇ ਜਾਣ ਕਾਰਨ ਹੋਇਆ ਹੈ। ਦੂਜੇ ਪਾਸੇ ਆਲੋਚਕਾਂ ਦਾ ਕਹਿਣਾ ਹੈ ਕਿ ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਹੁਣ ਜਾਣਬੁੱਝ ਕੇ ਨਿਯਮ ਬਦਲ ਰਹੇ ਹਨ ਤਾਂ ਕਿ ਕੋਈ ਦੂਜੀ ਧਿਰ ਮੁੜ ਸਮਰਥਨ ਹਾਸਲ ਕਰਨ ਲਈ ਪੱਕੇ ਪੈਰੀਂ ਨਾ ਹੋ ਸਕੇ।