ਓਟਵਾ, 1 ਜੂਨ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ ਇਹ ਐਲਾਨ ਕੀਤਾ ਗਿਆ ਹੈ ਕਿ ਫੈਡਰਲ ਸਰਕਾਰ ਵੱਲੋਂ ਸਿਟੀਜ਼ ਨੂੰ ਬੁਨਿਆਦੀ ਢਾਂਚੇ ਲਈ 2.2 ਬਿਲੀਅਨ ਡਾਲਰ ਅਗਾਊਂ ਹੀ ਟਰਾਂਸਫਰ ਕਰਨ ਦੀ ਪੇਸ਼ਕਸ਼ ਕੀਤੀ ਜਾਵੇਗੀ। ਇਸ ਨਾਲ ਕੋਵਿਡ-19 ਮਹਾਂਮਾਰੀ ਕਾਰਨ ਮਿਊਂਸਪੈਲਿਟੀਜ਼ ਦੇ ਡਾਵਾਂਡੋਲ ਹੋਏ ਬਜਟ ਤੇ ਪਏ ਘਾਟਿਆਂ ਨੂੰ ਪੁਰ ਕਰਨ ਵਿੱਚ ਉਨ੍ਹਾਂ ਨੂੰ ਮਦਦ ਮਿਲੇਗੀ। ਇੱਥੇ ਦੱਸਣਾ ਬਣਦਾ ਹੈ ਕਿ ਨਵੇਂ ਮਹੀਨੇ ਦੇ ਸੁ਼ਰੂ ਹੋਣ ਨਾਲ ਹੀ ਖੇਤਰੀ ਪੱਧਰ ਉੱਤੇ ਲਾਕਡਾਊਨ ਵਿੱਚ ਹੋਰ ਰਿਆਇਤਾਂ ਵੀ ਦਿੱਤੀਆਂ ਜਾਣਗੀਆਂ।
2020-21 ਫੰਡਿੰਗ ਫੈਡਰਲ ਗੈਸ ਟੈਕਸ ਫੰਡ ਰਾਹੀਂ ਭੇਜੀ ਜਾਵੇਗੀ ਅਤੇ ਇਸ ਮਹੀਨੇ ਇਹ ਫੰਡ ਇੱਕ ਵਾਰੀ ਵਿੱਚ ਹੀ ਭੇਜ ਦਿੱਤਾ ਜਾਵੇਗਾ। ਇਸ ਤੋਂ ਪਹਿਲਾਂ ਆਮ ਤੌਰ ਉੱਤੇ ਇਸ ਫੰਡ ਦੀ ਅਦਾਇਗੀ ਸਾਲ ਵਿੱਚ ਦੋ ਵਾਰੀ ਕੀਤੀ ਜਾਂਦੀ ਹੈ। ਫੈਡਰਲ ਸਰਕਾਰ ਜਲਦ ਤੋਂ ਜਲਦ ਮਿਊਂਸਪੈਲਿਟੀਜ਼ ਨੂੰ ਮਹਾਂਮਾਰੀ ਦੀ ਮਾਰ ਵਿੱਚੋਂ ਬਾਹਰ ਕੱਢਣਾ ਚਾਹੁੰਦੀ ਹੈ। ਇਹ ਖੁਲਾਸਾ ਟਰੂਡੋ ਦੇ ਐਲਾਨ ਤੋਂ ਪਹਿਲਾਂ ਕੈਨੇਡਾ ਸਰਕਾਰ ਦੀ ਵੈੱਬਸਾਈਟ ਉੱਤੇ ਆਨਲਾਈਨ ਹੀ ਕੀਤਾ ਜਾ ਚੁੱਕਿਆ ਹੈ।
ਗੈਸ ਟੈਕਸ ਫੰਡ ਕੈਨੇਡਾ ਭਰ ਵਿੱਚ 3600 ਕਮਿਊਨਿਟੀਜ਼ ਨੂੰ ਸਾਲ ਦੇ 2 ਬਿਲੀਅਨ ਡਾਲਰ ਮੁਹੱਈਆ ਕਰਵਾਉਂਦਾ ਹੈ। ਹਰ ਮਿਊਂਸਪੈਲਿਟੀ ਨੂੰ ਮਿਲਣ ਵਾਲੀ ਰਕਮ ਵੱਖਰੀ ਹੁੰਦੀ ਹੈ। ਇਹ ਫੰਡ ਇਨਫਰਾਸਟ੍ਰਕਚਰ ਪ੍ਰੋਜੈਕਟਾਂ ਲਈ ਫੈਡਰਲ ਸਰਕਾਰ ਤੋਂ ਪ੍ਰੋਵਿੰਸਾਂ ਤੇ ਟੈਰੇਟਰੀਜ਼ ਰਾਹੀਂ ਲੋਕਲ ਪੱਧਰ ਤੱਕ ਪਹੁੰਚਦਾ ਹੈ। ਫਿਰ ਇਹ ਰਕਮ ਮਿਊਂਸਪੈਲਿਟੀਜ਼ ਦੀ ਮਰਜ਼ੀ ਅਨੁਸਾਰ ਖਰਚੀ ਜਾ ਸਕਦੀ ਹੈ।