ਟੋਰਾਂਟੋ, 1 ਜੂਨ (ਪੋਸਟ ਬਿਊਰੋ) : 17 ਮਈ ਨੂੰ ਹਾਦਸੇ ਦਾ ਸਿ਼ਕਾਰ ਹੋਏ ਜਹਾਜ਼, ਜਿਸ ਵਿੱਚ ਸਨੋਅਬਰਡਜ਼ ਟੀਮ ਦੇ ਇੱਕ ਮੈਂਬਰ ਦੀ ਮੌਤ ਹੋ ਗਈ ਸੀ ਤੇ ਇੱਕ ਹੋਰ ਜ਼ਖ਼ਮੀ ਹੋ ਗਿਆ ਸੀ, ਬਾਰੇ ਜਾਰੀ ਜਾਂਚ ਵਿੱਚ ਸੋਮਵਾਰ ਨੂੰ ਇਹ ਖੁਲਾਸਾ ਹੋਇਆ ਕਿ ਇਹ ਹਾਦਸਾ ਪੰਛੀ ਦੇ ਟਕਰਾਉਣ ਕਾਰਨ ਵਾਪਰਿਆ ਸੀ।
ਡਿਪਾਰਟਮੈਂਟ ਆਫ ਨੈਸ਼ਨਲ ਡਿਫੈਂਸ ਦੀ ਏਅਰਵਰਦੀਨੈੱਸ ਇਨਵੈਸਟੀਗੇਟਿਵ ਅਥਾਰਟੀ ਨੇ ਇੱਕ ਬਿਆਨ ਵਿੱਚ ਆਖਿਆ ਕਿ ਜਾਂਚ ਲਈ ਹਾਸਲ ਹੋਈ ਇੱਕ ਵੀਡੀਓ ਫੁਟੇਜ ਤੋਂ ਇਹ ਸਾਹਮਣੇ ਆਇਆ ਹੈ ਕਿ ਜਹਾਜ਼ ਦੇ ਟੇਕ ਆਫ ਸਮੇਂ ਸੱਜੇ ਇੰਜਣ ਨਾਲ ਇੱਕ ਪੰਛੀ ਟਕਰਾ ਗਿਆ। ਸੀਟੀ-114 ਟਿਊਟਰ ਏਅਰਕ੍ਰਾਫਟ ਦੇ ਦੋਵਾਂ ਸਵਾਰਾਂ ਵੱਲੋਂ ਭਾਵੇਂ ਖੁਦ ਨੂੰ ਇਜੈਕਟ ਕਰ ਲਿਆ ਗਿਆ ਸੀ ਪਰ ਇਸ ਹਾਦਸੇ ਵਿੱਚ ਇੱਕ ਪਾਇਲਟ ਦੀ ਜਾਣ ਚਲੀ ਗਈ ਜਦਕਿ ਜਹਾਜ਼ ਕੈਮਲੂਪਜ਼, ਬੀਸੀ ਦੇ ਇੱਕ ਰਿਹਾਇਸ਼ੀ ਇਲਾਕੇ ਵਿੱਚ ਹਾਦਸੇ ਦਾ ਸਿ਼ਕਾਰ ਹੋ ਗਿਆ।
ਬਿਆਨ ਵਿੱਚ ਆਖਿਆ ਗਿਆ ਕਿ ਇਸ ਹਾਦਸੇ ਦੀ ਜਾਰੀ ਜਾਂਚ ਫਿਲਹਾਲ ਪੰਛੀ ਦੇ ਟਕਰਾਉਣ ਅਤੇ ਜੈੱਟ ਦੇ ਐਸਕੇਪ ਸਿਸਟਮ ਉੱਤੇ ਹੀ ਕੇਂਦਰਿਤ ਹੈ। ਸੋਮਵਾਰ ਨੂੰ ਨੈਸ਼ਨਲ ਡਿਫੈਂਸ ਨੇ ਆਖਿਆ ਕਿ ਇਹ ਰਿਪੋਰਟ ਇਸ ਸਮੇਂ ਹਾਸਲ ਜਾਣਕਾਰੀ ਦਾ ਹਾਲਾਤ ਅਤੇ ਤੱਥਾਂ ਉੱਤੇ ਆਧਾਰਤ ਨਿਚੋੜ ਹੈ। ਇਸ ਵਿੱਚ ਹਾਦਸੇ ਨਾਲ ਜੁੜੇ ਹੋਰ ਵੇਰਵੇ ਪੂਰੀ ਤਰ੍ਹਾਂ ਮੁਹੱਈਆ ਨਹੀਂ ਕਰਵਾਏ ਗਏ।
ਇਸ ਹਾਦਸੇ ਵਿੱਚ ਹੈਲੀਫੈਕਸ ਦੀ 35 ਸਾਲਾ ਕੈਪਟਨ ਜੈਨੀਫਰ ਕੇਸੀ, ਜੋ ਕਿ ਸਨੋਅਬਰਡਜ਼ ਦੀ ਪਬਲਿਕ ਅਫੇਅਰਜ਼ ਆਫੀਸਰ, ਦੀ ਮੌਤ ਹੋ ਗਈ ਤੇ ਡਿਏਪੇ, ਨਿਊ ਬਰੰਜ਼ਵਿੱਕ ਦਾ 38 ਸਾਲਾ ਪਾਇਲਟ ਕੈਪਟਨ ਰਿਚਰਡ ਮੈਕਡਗਲ ਜ਼ਖ਼ਮੀ ਹੋ ਗਿਆ। ਇਸ ਸਮੇਂ ਉਹ ਜੇਰੇ ਇਲਾਜ ਹੈ।