ਓਟਵਾ, 1 ਜੂਨ (ਪੋਸਟ ਬਿਊਰੋ) : ਸੰਯੁਕਤ ਰਾਸ਼ਟਰ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਹੈ ਕਿ ਸੰਯੁਕਤ ਰਾਸ਼ਟਰ ਦੀ ਸੁਰੱਖਿਆ ਕਾਉਂਸਲ ਦੀ ਅਸਥਾਈ ਸੀਟ ਲਈ ਚੋਣ ਜੂਨ ਵਿੱਚ ਹੋਵੇਗੀ। ਇਸ ਵਿੱਚ ਕੈਨੇਡਾ ਦਾ ਮੁਕਾਬਲਾ ਨੌਰਵੇਅ ਤੇ ਆਇਰਲੈਂਡ ਨਾਲ ਹੈ। ਸੰਯੁਕਤ ਰਾਸ਼ਟਰ ਨੇ ਇਹ ਵੀ ਆਖਿਆ ਹੈ ਕਿ ਇਹ ਚੋਣ ਕੋਵਿਡ-19 ਦੇ ਪਸਾਰ ਨੂੰ ਰੋਕਣ ਲਈ ਕੀਤੀਆਂ ਜਾ ਰਹੀਆਂ ਕੋਸਿ਼ਸ਼ਾਂ ਸਬੰਧੀ ਨਵੇਂ ਨਿਯਮਾਂ ਤਹਿਤ ਹੋਵੇਗੀ।
193 ਅੰਬੈਸਡਰਜ਼ ਆਪਣੇ ਦੇਸ਼ਾਂ ਦੇ ਪੱਖ ਉੱਤੇ ਗੁਪਤ ਵੋਟਾਂ ਪਾਉਣਗੇ। ਇਹ ਮੁਕਾਬਲਾ ਸੰਯੁਕਤ ਰਾਸ਼ਟਰ ਦੀ ਸੁਰੱਖਿਆ ਕਾਉਂਸਲ ਦੀਆਂ ਦੋ ਸੀਟਾਂ ਲਈ ਹੋਵੇਗਾ। ਪਰ ਇਹ ਵੋਟ ਜਨਰਲ ਅਸੈਂਬਲੀ ਦੀ ਪੂਰੀ ਮੀਟਿੰਗ ਵਿੱਚ ਨਹੀਂ ਹੋਵੇਗੀ ਕਿਉਂਕਿ ਨਿਊ ਯੌਰਕ ਕੋਵਿਡ-19 ਆਊਟਬ੍ਰੇਕ ਦਾ ਗੜ੍ਹ ਬਣ ਚੱੁਕਿਆ ਹੈ। ਇਸ ਕਾਰਨ ਸੰਯੁਕਤ ਰਾਸ਼ਟਰ ਦੇ ਡਿਪਲੋਮੈਟਸ ਘਰ ਤੋਂ ਕੰਮ ਕਰਨ ਤੇ ਵੀਡੀਓਕਾਨਫਰੰਸਿੰਗ ਉੱਤੇ ਹੀ ਨਿਰਭਰ ਕਰ ਰਹੇ ਹਨ।
ਇਸ ਦੀ ਥਾਂ ਉੱਤੇ ਅੰਬੈਸਡਰਜ਼ ਨੂੰ ਅਗਾਊਂ ਹੀ ਸੰਯੁਕਤ ਰਾਸ਼ਟਰ ਦੇ ਹੈੱਡਕੁਆਰਟਰ ਉੱਤੇ ਦੱਸੀ ਗਈ ਨਿਰਧਾਰਤ ਥਾਂ ਉੱਤੇ ਪਹੁੰਚਣ ਦਾ ਨੋਟਿਸ ਮਿਲੇਗਾ। ਅੰਬੈਸਡਰਜ਼ ਨੂੰ ਵੱਖ ਵੱਖ ਸਮੇਂ ਉੱਤੇ ਸੰਯੁਕਤ ਰਾਸ਼ਟਰ ਦੇ ਹੈੱਡਕੁਆਰਟਰ ਸੱਦਿਆ ਜਾਵੇਗਾ ਤਾਂ ਕਿ ਉਹ ਆਪਣੀ ਵੋਟ ਪਾ ਸਕਣ। ਇਸ ਦੇ ਨਾਲ ਹੀ ਵੱਡਾ ਇੱਕਠ ਕਰਨ ਤੋਂ ਵੀ ਬਚਤ ਰਹਿ ਜਾਵੇਗੀ।