ਵਾਸਿ਼ੰਗਟਨ, 1 ਜੂਨ (ਪੋਸਟ ਬਿਊਰੋ) : ਸੁ਼ੱਕਰਵਾਰ ਰਾਤ ਨੂੰ ਸੀਕ੍ਰੇਟ ਸਰਵਿਸ ਏਜੰਟਾਂ ਨੂੰ ਰਾਸ਼ਟਰਪਤੀ ਡੌਨਲਡ ਟਰੰਪ ਨੂੰ ਵਾੲ੍ਹੀਟ ਹਾਊਸ ਦੇ ਬੰਕਰ ਵਿੱਚ ਲਿਜਾਣਾ ਪਿਆ। ਅਜਿਹਾ ਇਸ ਲਈ ਕਿਉਂਕਿ ਸੈਂਕੜੇ ਦੀ ਗਿਣਤੀ ਵਿੱਚ ਲੋਕ ਵਾੲ੍ਹੀਟ ਹਾਊਸ ਦੇ ਬਾਹਰ ਇੱਕਠੇ ਹੋ ਕੇ ਪੱਥਰਬਾਜ਼ੀ ਕਰ ਰਹੇ ਸਨ ਤੇ ਪੁਲਿਸ ਦੇ ਬੈਰੀਕੇਡਜ਼ ਤੋੜਨ ਦੀ ਕੋਸਿ਼ਸ਼ ਕਰ ਰਹੇ ਸਨ।
ਟਰੰਪ ਨੂੰ ਘੱਟੋ ਘੱਟ ਇੱਕ ਘੰਟਾ ਬੰਕਰ ਵਿੱਚ ਗੁਜ਼ਾਰਨਾ ਪਿਆ। ਆਪਣਾ ਨਾਂ ਗੁਪਤ ਰੱਖਣ ਦੀ ਸ਼ਰਤ ਉੱਤੇ ਇੱਕ ਰਿਪਬਲਿਕਨ ਨੇ ਦੱਸਿਆ ਕਿ ਇਹ ਬੰਕਰ ਅੱਤਵਾਦੀ ਹਮਲਿਆਂ ਵਰਗੀਆਂ ਐਮਰਜੰਸੀਜ਼ ਵਾਸਤੇ ਬਣਾਇਆ ਗਿਆ ਸੀ। ਏਜੰਟਾਂ ਵੱਲੋਂ ਲੋਕਾਂ ਦੇ ਮਿਜਾਜ਼ ਨੂੰ ਸਮਝਣ ਵਿੱਚ ਨਾਸਮਝੀ ਕੀਤੀ ਗਈ। ਇੱਥੇ ਹਫਤੇ ਭਰ ਤੋਂ ਲੋਕਾਂ ਵੱਲੋਂ ਕੀਤੇ ਜਾ ਰਹੇ ਮੁਜ਼ਾਹਰਿਆਂ ਦੀ ਆਵਾਜ਼ ਲਗਾਤਾਰ ਆ ਰਹੀ ਸੀ ਤੇ ਇਹ ਅਧਿਕਾਰੀਆਂ ਦੇ ਕੰਨਾਂ ਵਿੱਚ ਵੀ ਪੈ ਰਹੀ ਸੀ। ਪਰ ਇਸ ਸੱਭ ਦੇ ਬਾਵਜੂਦ ਸੀਕ੍ਰੇਟ ਸਰਵਿਸ ਏਜੰਟਸ ਤੇ ਪੁਲਿਸ ਅਧਿਕਾਰੀ ਇਸ ਭੀੜ ਨੂੰ ਰੋਕਣ ਤੋਂ ਅਸਫਲ ਰਹੇ।
ਜਿ਼ਕਰਯੋਗ ਹੈ ਕਿ ਇਹ ਮੁਜ਼ਾਹਰੇ ਸਿਆਹ ਨਸਲ ਦੇ ਵਿਅਕਤੀ ਜਾਰਜ ਫਲੌਇਡ ਨੂੰ ਪੁਲਿਸ ਅਧਿਕਾਰੀ ਵੱਲੋਂ ਅਜਾਂਈ ਮਾਰੇ ਜਾਣ ਤੋਂ ਬਾਅਦ ਸੁ਼ਰੂ ਹੋਏ ਸਨ। ਮਿਨੀਆਪੋਲਿਸ ਦੇ ਇੱਕ ਪੁਲਿਸ ਅਧਿਕਾਰੀ ਨੇ ਫਲੌਇਡ ਨੂੰ ਜ਼ਮੀਨ ਉੱਤੇ ਲਿਟਾ ਕੇ ਉਸ ਦੀ ਗਰਦਨ ਉੱਤੇ ਉਦੋਂ ਤੱਕ ਆਪਣਾ ਗੋਡਾ ਟਿਕਾਈ ਰੱਖਿਆ ਤੇ ਭਾਰ ਪਾਈ ਰੱਖਿਆ ਗਿਆ ਜਦੋਂ ਤੱਕ ਉਹ ਬੇਹੋਸ਼ ਨਹੀਂ ਹੋ ਗਿਆ। ਫਲੌਇਡ ਵੱਲੋਂ ਪੁਲਿਸ ਅਧਿਕਾਰੀ ਅੱਗੇ ਬਹੁਤ ਤਰਲੇ ਕੀਤੇ ਗਏ ਕਿ ਉਸ ਨੂੰ ਸਾਹ ਲੈਣ ਦਿੱਤਾ ਜਾਵੇ, ਪਾਣੀ ਦੇ ਦਿੱਤਾ ਜਾਵੇ ਪਰ ਕਿਸੇ ਨੇ ਉਸ ਦੀ ਇੱਕ ਨਾ ਸੁਣੀ। ਵਾਸਿ਼ੰਗਟਨ ਤੇ ਹੋਰਨਾਂ ਥਾਂਵਾਂ ਉੱਤੇ ਇਨ੍ਹਾਂ ਮੁਜ਼ਾਹਰਿਆਂ ਨੇ ਹਿੰਸਕ ਰੂਪ ਵੀ ਲਿਆ।