ਇਸ ਸਾਲ ਹਿੰਦੀ ਸਿਨੇਮਾ ਵਿੱਚ ‘ਪ੍ਰਿਥਵੀਰਾਜ ਚੌਹਾਨ’, ‘ਗੁੰਜਨ ਸਕਸੈਨਾ : ਦ ਕਾਰਗਿਲ ਗਰਲ’ ਅਤੇ ਤਾਮਿਲ ਨਾਡੂ ਦੀ ਸਾਬਕਾ ਮੁੱਖ ਮੰਤਰੀ ਜੈਲਲਿਤਾ ਦੀ ਜ਼ਿੰਦਗੀ 'ਤੇ ਆਧਾਰਤ ‘ਥਲਾਈਵਾ’ ਸਮੇਤ ਕਈ ਬਾਇਓਪਿਕ ਫਿਲਮਾਂ ਨੂੰ ਰਿਲੀਜ਼ ਕੀਤਾ ਜਾਣਾ ਹੈ। ਮੈਥ ਦੀ ਮਾਹਰ ਸ਼ਕੰੁਤਲਾ ਦੇਵੀ ਦੀ ਬਾਇਓਪਿਕ ਨੂੰ ਡਿਜੀਟਲ 'ਤੇ ਰਿਲੀਜ਼ ਕਰਨ ਦਾ ਐਲਾਨ ਹੋ ਚੁੱਕਾ ਹੈ। ਫਿਲਮ ਵਿੱਚ ਮੁੱਖ ਭੂਮਿਕਾ ਵਿੱਚ ਵਿਦਿਆ ਬਾਲਨ ਹੈ। ਵਿਦਿਆ ਦਾ ਕਹਿਣਾ ਹੈ ਕਿ ਉਸ ਨੂੰ ਪਹਿਲਾਂ ਵੀ ਕਈ ਬਾਇਓਪਿਕਸ ਆਫਰ ਹੋਈਆਂ ਹਨ, ਪਰ ਉਸ ਨੇ ਕੇਵਲ ਦੋ ਬਾਇਓਪਿਕਸ ਫਿਲਮਾਂ ਕੀਤੀਆਂ ਹਨ। ਇਨ੍ਹਾਂ ਵਿੱਚੋਂ ਇੱਕ ‘ਸ਼ਕੁੰਤਲਾ ਦੇਵੀ’ ਹੈ ਅਤੇ ਦੂਸਰੀ ਸੀ ਸਿਲਕ ਸਿਮਤਾ ਦੀ ਜ਼ਿੰਦਗੀ 'ਤੇ ਫਿਲਮ ‘ਡਰਟੀ ਪਿਕਚਰ’।
ਵਿਦਿਆ ਕਹਿੰਦੀ ਹੈ ਕਿ ਉਸ ਨੂੰ ਉਹੀ ਬਾਇਓਪਿਕਸ ਕਰਨ ਦਾ ਮਜ਼ਾ ਆਉਂਦਾ ਹੈ, ਜਿਸ ਦੀ ਸ਼ਖਸੀਅਤ ਮਜਬੂਤ ਰਹੀ ਹੋਵੇ। ਉਹ ਪਹਿਲਾਂ ਪ੍ਰਧਾਨ ਮੰਤਰੀ ਸਵਰਗੀ ਇੰਦਰਾ ਗਾਂਧੀ ਦਾ ਕਿਰਦਾਰ ਕਰਨਾ ਚਾਹੁੰਦੀ ਹੈ। ਵਿਦਿਆ ਕਹਿੰਦੀ ਹੈ ਕਿ ਇੰਦਰਾ ਗਾਂਧੀ ਦੀ ਸ਼ਖਸੀਅਤ ਬਹੁਤ ਮਜਬੂਤ ਸੀ। ਉਹ ਸਾਰੀ ਉਮਰ ਸਟਰਾਂਗ ਮਹਿਲਾ ਰਹੀ। ਉਨ੍ਹਾਂ ਦਾ ਉਹ ਕਿਰਦਾਰ ਨਿਭਾਉਣਾ ਚਾਹੁੰਦੀ ਹਾਂ। ਮੈਂ ਹਮੇਸ਼ਾ ਤੋਂ ਇਸ ਗੱਲ ਤੋਂ ਸੁਚੇਤ ਰਹੀ ਹਾਂ ਕਿ ਰਾਜਨੀਤੀ 'ਤੇ ਕੋਈ ਫਿਲਮ ਨਾ ਕਰਾਂ। ਮੈਨੂੰ ਨਾ ਰਾਜਨੀਤੀ ਵਿੱਚ ਦਿਲਚਸਪੀ ਹੈ ਤੇ ਨਾ ਸਮਝ ਆਉਂਦੀ ਹੈ। ਐੱਨ ਟੀ ਆਰ ਦੀ ਬਾਇਓਪਿਕ ਵਿੱਚ ਮੈਂ ਉਨ੍ਹਾਂ ਦੀ ਪਤਨੀ ਦੇ ਕਿਰਦਾਰ ਵਿੱਚ ਹਾਂ, ਜਿਸ 'ਤੇ ਰਾਜਨੀਤੀ ਦਾ ਅਸਰ ਨਹੀਂ ਦਿਖਾਇਆ ਗਿਆ ਹੈ। ਇੰਦਰਾ ਗਾਂਧੀ ਦਾ ਕਿਰਦਾਰ ਮੈਂ ਹਮੇਸ਼ਾ ਤੋਂ ਨਿਭਾਉਣਾ ਚਾਹੁੰਦੀ ਸੀ। ਹਾਲਾਂਕਿ ਉਨ੍ਹਾਂ 'ਤੇ ਵੈਬ ਸੀਰੀਜ਼ ਨੂੰ ਬਣਾਉਣਾ ਆਸਾਨ ਨਹੀਂ ਹੋਵੇਗਾ। ਕਾਫੀ ਰਿਸਰਚ ਕਰਨੀ ਪਵੇਗੀ।