ਨਵੀਂ ਦਿੱਲੀ, 31 ਮਈ, (ਪੋਸਟ ਬਿਊਰੋ)- ਭਾਰਤ ਦੀ ਰਾਜਧਾਨੀ ਦਿੱਲੀ ਵਿੱਚ ਕੋਰੋਨਾ ਦਾ ਕਹਿਰ ਵਧਦਾ ਜਾਣ ਦੇ ਨਾਲ ਅੱਜ ਤੱਕ ਕੁੱਲ ਕੇਸ ਵਧ ਕੇ 19844 ਤੱਕ ਚਲੇ ਗਏ ਹਨ। ਬੀਤੇ ਇੱਕੋ ਦਿਨ ਵਿੱਚ ਦਿੱਲੀ ਵਿੱਚ 1295 ਨਵੇਂ ਕੇਸ ਮਿਲੇ ਹਨ, ਜਿਹੜੀ ਅੱਜ ਤੱਕ ਦੀ ਇੱਕੋ ਦਿਨ ਦੀ ਸਭ ਤੋਂ ਵੱਡੀ ਗਿਣਤੀ ਹੈ।
ਅੱਜ ਐਤਵਾਰ ਸ਼ਾਮ ਤੱਕ ਪੂਰੇ ਹੋਏ 24 ਘੰਟਿਆਂ ਵਿੱਚ ਕੋਰੋਨਾ ਦੀ ਮਹਾਮਾਰੀ ਨਾਲ ਦਿੱਲੀ ਵਿੱਚ 13 ਹੋਰ ਲੋਕਾਂ ਦੀ ਮੌਤ ਹੋਣ ਦੀ ਖਬਰ ਹੈ, ਜਿਸ ਨਾਲ ਰਾਜਧਾਨੀ ਵਿੱਚ ਕੁੱਲ ਮੌਤਾਂ ਦੀ ਗਿਣਤੀ 473 ਹੋ ਗਈ ਅਤੇ ਕੇਸਾਂ ਦੀ ਗਿਣਤੀ 10893 ਤੱਕ ਚਲੀ ਗਈ ਹੈ, ਜਿਸ ਤੋਂ ਕੇਂਦਰ ਸਰਕਾਰ ਵੀ ਚਿੰਤਾ ਵਿੱਚ ਹੈ।
ਇਨ੍ਹਾਂ ਦਿਨਾਂ ਵਿੱਚ ਤਾਮਿਲਨਾਡੂ ਵਿਚ ਨਵੇਂ ਕੇਸ ਵਧ ਰਹੇ ਹਨ ਤੇ ਮਹਾਰਾਸ਼ਟਰ, ਗੁਜਰਾਤ, ਰਾਜਸਥਾਨ, ਉੱਤਰ ਪ੍ਰਦੇਸ਼ ਵਿੱਚ ਵੀ ਪਹਿਲਾਂ ਤੋਂ ਵੱਧ ਨਵੇਂ ਕੇਸ ਮਿਲਣ ਲੱਗੇ ਸਨ। ਬੀਤੇ 24 ਘੰਟਿਆਂ ਵਿਚ ਇੱਕੋ ਦਿਨ 8,380 ਨਵੇਂ ਕੇਸ ਮਿਲੇ ਤੇ 193 ਲੋਕਾਂ ਦੀ ਮੌਤ ਹੋਣ ਨਾਲ ਭਾਰਤ ਵਿੱਚ ਕੁੱਲ ਕੇਸਾਂ ਦੀ ਗਿਣਤੀ 1,82,143 ਹੋਈ ਹੈ, ਜਿਨ੍ਹਾਂ ਵਿੱਚੋਂ ਕੁੱਲ 5,164 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਸਰਕਾਰੀ ਤੌਰ ਉੱਤੇ ਦਿੱਤੇ ਅੰਕੜਿਆਂ ਮੁਤਾਬਕ ਮਹਾਰਾਸ਼ਟਰ ਵਿੱਚ ਕੁੱਲ 2197 ਲੋਕਾਂ ਦੀ ਅੱਜ ਤੱਕ ਮੌਤ ਹੋ ਚੁੱਕੀ ਹੈ। ਗੁਜਰਾਤ ਵਿੱਚ 1007 ਮੌਤਾਂ ਹੋਈਆਂ ਹਨ, ਦਿੱਲੀ ਵਿੱਚ 416 ਮੌਤਾਂ ਹੋਣ ਦੇ ਨਾਲ ਮੱਧ ਪ੍ਰਦੇਸ਼ ਵਿੱਚ 343, ਪੱਛਮੀ ਬੰਗਾਲ ਵਿੱਚ 309, ਉੱਤਰ ਪ੍ਰਦੇਸ਼ ਵਿੱਚ 201, ਰਾਜਸਥਾਨ ਵਿੱਚ 193 ਅਤੇ ਤਾਮਿਲ ਨਾਡੂ ਵਿੱਚ 160 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਤਾਮਿਲ ਨਾਡੂ ਵਿੱਚ ਨਵੇਂ ਕੇਸ ਬਹੁਤ ਮਿਲ ਰਹੇ ਹਨ।