ਮਿਨੀਆਪੋਲਿਸ, 31 ਮਈ (ਪੋਸਟ ਬਿਊਰੋ) : ਪੁਲਿਸ ਅਧਿਕਾਰੀ ਵੱਲੋਂ ਸਿਆਹ ਨਸਲ ਦੇ ਵਿਅਕਤੀ ਜਾਰਜ ਫਲੌਇਡ ਦਾ ਕਥਿਤ ਤੌਰ ੳੱੁਤੇ ਕਤਲ ਕੀਤੇ ਜਾਣ ਤੋਂ ਬਾਅਦ ਅਮਰੀਕਾ ਭਰ ਵਿੱਚ ਸੁਰੂ ਹੋਏ ਰੋਸ ਮੁਜ਼ਾਹਰੇ ਰੁਕਣ ਦਾ ਨਾਂ ਹੀ ਨਹੀਂ ਲੈ ਰਹੇ। ਐਤਵਾਰ ਨੂੰ ਵੀ ਪੂਰੇ ਅਮਰੀਕਾ ਵਿੱਚ ਮੁਜ਼ਾਹਰਾਕਾਰੀਆਂ ਨੇ ਰੋਸ ਪ੍ਰਦਰਸ਼ਨ ਕੀਤੇ ਤੇ ਇੱਕਾ-ਦੁੱਕਾ ਥਾਂਵਾਂ ਉੱਤੇ ਹਿੰਸਕ ਵਾਰਦਾਤਾਂ ਨੂੰ ਵੀ ਅੰਜਾਮ ਦਿੱਤਾ।
ਇਸ ਘਟਨਾ ਤੋਂ ਇੱਕ ਹਫਤੇ ਬਾਅਦ ਮਿਨੀਆਪੋਲਿਸ ਵਿੱਚ ਹੀ ਮੁਜ਼ਾਹਰਾ ਕਰ ਰਹੇ ਲੋਕਾਂ ਉੱਤੇ ਇੱਕ ਟਰੱਕ ਡਰਾਈਵਰ ਨੇ ਜਾਣਬੁੱਝ ਕੇ ਟਰੱਕ ਚੜ੍ਹਾਉਣ ਦੀ ਕੋਸਿ਼ਸ਼ ਕੀਤੀ। ਪਰ ਅਧਿਕਾਰੀਆਂ ਅਨੁਸਾਰ ਕਿਸੇ ਵੀ ਮੁਜ਼ਾਹਰਾਕਾਰੀ ਨੂੰ ਕੋਈ ਨੁਕਸਾਨ ਨਹੀਂ ਪਹੁੰਚਿਆ। ਮਿਨਿਸੋਟਾ ਸਟੇਟ ਪੈਟਰੋਲ ਵੱਲੋਂ ਟਵੀਟ ਕਰਕੇ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਡਰਾਈਵਰ ਮੁਜ਼ਾਹਰਾਕਾਰੀਆਂ ਨੂੰ ਭੜਕਾਉਣ ਦੀ ਕੋਸਿ਼ਸ਼ ਕਰ ਰਿਹਾ ਸੀ ਤੇ ਉਸ ਨੂੰ ਗ੍ਰਿਫਤਾਰ ਵੀ ਕਰ ਲਿਆ ਗਿਆ। ਬੋਸਟਨ ਤੋਂ ਲੈ ਕੇ ਸੈਨ ਫਰਾਂਸਿਸਕੋ ਤੱਕ ਇਸ ਮੱੁਦੇ ਨੂੰ ਲੈ ਕੇ ਮੁਜ਼ਾਹਰੇ ਭਖੇ ਹੋਏ ਹਨ। ਫਿਲਾਡੈਲਫੀਆ, ਸੈਂਟਾ ਮੋਨਿਕਾ ਤੇ ਕੈਲੇਫੋਰਨੀਆ ਵਿੱਚ ਤਾਂ ਕੱੁਝ ਲੋਕਾਂ ਵੱਲੋਂ ਸਟੋਰ ਵੀ ਲੱੁਟੇ ਗਏ।
ਜਿਸ ਅਧਿਕਾਰੀ ਨੇ ਕਈ ਮਿੰਟਾਂ ਤੱਕ ਫਲੌਇਡ ਦੇ ਗਲੇ ਉੱਤੇ ਗੋਡਾ ਟਿਕਾਈ ਰੱਖਿਆ, ਉਸ ਉੱਤੇ ਕਤਲ ਦਾ ਚਾਰਜ ਲਾਇਆ ਗਿਆ ਹੈ। ਪਰ ਮੁਜ਼ਾਹਰਾਕਾਰੀਆਂ ਦੀ ਮੰਗ ਹੈ ਕਿ ਮੌਕੇ ਉੱਤੇ ਮੌਜੂਦ ਬਾਕੀ ਦੇ ਤਿੰਨ ਅਧਿਕਾਰੀਆਂ ਖਿਲਾਫ ਵੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ। ਇਨ੍ਹਾਂ ਚਾਰਾਂ ਪੁਲਿਸ ਅਧਿਕਾਰੀਆਂ ਨੂੰ ਨੌਕਰੀ ਤੋਂ ਕੱਢਿਆ ਜਾ ਚੁੱਕਿਆ ਹੈ।
ਹਿੰਸਕ ਮੁਜ਼ਾਹਰਿਆਂ ਦੌਰਾਨ ਮਿਨੀਆਪੋਲਿਸ ਵਿੱਚ ਕਈ ਇਮਾਰਤਾਂ ਨੂੰ ਨੁਕਸਾਨ ਪਹੁੰਚਿਆ, ਜਿਸ ਨੂੰ ਰੋਕਣ ਲਈ ਮਿਨੀਸੋਟਾ ਦੇ ਗਵਰਨਰ ਵੱਲੋਂ ਹਜ਼ਾਰਾਂ ਨੈਸ਼ਨਲ ਗਾਰਡ ਸੋਲਜਰਜ਼ ਦੀ ਮਦਦ ਲਈ ਜਾ ਰਹੀ ਹੈ। ਐਤਵਾਰ ਨੂੰ ਸਟੇਟ ਪੈਟਰੋਲਮੈਂਟ ਤੇ ਨੈਸ਼ਨਲ ਗਾਰਡ ਸੋਲਜਰਜ਼ ਵੱਲੋਂ ਮੁਜ਼ਾਹਰਾਕਾਰੀਆਂ ਦੀ ਹਿੰਸਾ ਨੂੰ ਰੋਕਣ ਲਈ ਤਾਕਤ ਦਾ ਮੁਜ਼ਾਹਰਾ ਕੀਤਾ ਗਿਆ। ਇਨ੍ਹਾਂ ਸੋਲਜਰਜ਼ ਦੇ ਪਿੱਛੇ ਮਿਲਟਰੀ ਸਟਾਈਲ ਹਥਿਆਰਬੰਦ ਗੱਡੀਆਂ ਵੀ ਖੜ੍ਹੀਆਂ ਸਨ। ਐਤਵਾਰ ਨੂੰ ਉਸ ਸਮੇਂ ਇੱਕ ਵਾਰੀ ਤਣਾਅ ਕਾਫੀ ਵੱਧ ਗਿਆ ਜਦੋਂ ਵਾੲ੍ਹੀਟ ਹਾਊਸ ਨੇੜੇ ਲਾਫਾਇਤੇ ਪਾਰਕ ਵਿੱਚ ਫਲੌਇਡ ਦੀ ਮੌਤ ਖਿਲਾਫ ਰੋਸ ਮੁਜ਼ਾਹਰਾ ਕਰ ਰਹੇ ਦੂਜੇ ਗਰੁੱਪ ਨੇ ਪਹਿਲਾਂ ਤੋਂ ਹੀ ਉੱਥੇ ਮੌਜੂਦ ਗਰੁੱਪ ਨਾਲ ਰਲਣ ਦੀ ਕੋਸਿ਼ਸ਼ ਕੀਤੀ ਪਰ ਪੁਲਿਸ ਵੱਲੋਂ ਉਨ੍ਹਾਂ ਦਾ ਰਾਹ ਰੋਕ ਦਿੱਤਾ ਗਿਆ। ਪੁਲਿਸ ਨੇ ਭੀੜ ਨੂੰ ਖਿੰਡਾਉਣ ਲਈ ਪੈਪਰ ਪੌਡਸ ਤੇ ਫਲੈਸ਼ ਬੈਂਗਜ਼ ਵੀ ਛੱਡੇ ਪਰ ਮੁਜ਼ਾਹਰਾਕਾਰੀ ਆਪਣੀ ਥਾਂ ਤੋਂ ਨਹੀਂ ਹਿੱਲੇ।