ਓਟਵਾ, 31 ਮਈ (ਪੋਸਟ ਬਿਊਰੋ) : ਐਨਡੀਪੀ ਆਗੂ ਜਗਮੀਤ ਸਿੰਘ ਵੱਲੋਂ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਤੋਂ ਇਹ ਮੰਗ ਕੀਤੀ ਜਾ ਰਹੀ ਹੈ ਕਿ ਉਹ ਪ੍ਰੋਵਿੰਸ ਦੇ ਲਾਂਗ ਟਰਮ ਕੇਅਰ ਹੋਮਜ਼ ਵਿੱਚ ਪੈਦਾ ਹੋਏ ਸੰਕਟ ਨਾਲ ਸਿੱਝਣ ਲਈ ਲੀਡਰਸਿ਼ਪ ਦਾ ਮੁਜ਼ਾਹਰਾ ਕਰਨ ਤੇ ਆਪਣੀਆਂ ਸ਼ਕਤੀਆਂ ਦੀ ਢੁਕਵੀਂ ਵਰਤੋਂ ਕਰਨ।
ਇੱਕ ਇੰਟਰਵਿਊ ਵਿੱਚ ਜਗਮੀਤ ਸਿੰਘ ਨੇ ਆਖਿਆ ਕਿ ਉਹ ਚਾਹੁੰਦੇ ਹਨ ਕਿ ਓਨਟਾਰੀਓ ਤੇ ਕਿਊਬਿਕ ਦੀਆਂ ਕੁੱਝ ਕੁ ਲਾਂਗ ਟਰਮ ਕੇਅਰ ਫੈਸਿਲਿਟੀਜ਼ ਬਾਰੇ ਫੌਜ ਵੱਲੋਂ ਨਸ਼ਰ ਕੀਤੀਆਂ ਗਈਆਂ ਗੰਭੀਰ ਰਿਪੋਰਟਾਂ ਤੋਂ ਬਾਅਦ ਇਨ੍ਹਾਂ ਫੈਸਿਲਿਟੀਜ਼ ਦੇ ਹਾਲਾਤ ਨੂੰ ਸੁਧਾਰਨ ਲਈ ਪ੍ਰਧਾਨ ਮੰਤਰੀ ਕੌਮੀ ਮਾਪਦੰਡ ਅਪਨਾਉਣ। ਇਸ ਲਈ ਫੈਡਰਲ ਸਰਕਾਰ ਅਜਿਹੀਆਂ ਫੈਸਿਲਿਟੀਜ਼ ਦੀ ਫੰਡਿੰਗ ਵਿੱਚ ਵਾਧਾ ਕਰ ਸਕਦੀ ਹੈ। ਪਿਛਲੇ ਕਈ ਦਹਾਕਿਆਂ ਤੋਂ ਅਜਿਹੀਆਂ ਫੈਸਿਲਿਟੀਜ਼ ਲਈ ਜਿਹੜੇ ਫੰਡ ਹੁੰਦੇ ਸਨ ਉਹ 50-50 ਤੋਂ ਘਟ ਕੇ 80-20 ਰਹਿ ਗਏ ਹਨ।
ਅਸੀਂ ਹੈਲਥ ਕੇਅਰ ਫੰਡਜ਼ ਵਿੱਚ ਵਾਧਾ ਕਰ ਸਕਦੇ ਹਾਂ ਤੇ ਇਹ ਯਕੀਨੀ ਬਣਾ ਸਕਦੇ ਹਾਂ ਕਿ ਲਾਂਗ ਟਰਮ ਕੇਅਰ ਵੀ ਉਨ੍ਹਾਂ ਸਿਧਾਂਤਾਂ ਉੱਤੇ ਹੀ ਚੱਲੇ ਜਿਨ੍ਹਾਂ ਉੱਤੇ ਕੈਨੇਡਾ ਹੈਲਥ ਐਕਟ ਕਾਇਮ ਹੈ। ਇਸ ਨਾਲ ਇਹ ਪੱਕਾ ਕੀਤਾ ਜਾ ਸਕਦਾ ਹੈ ਕਿ ਸਾਡੇ ਸੀਨੀਅਰਜ਼ ਨੂੰ ਮਿਆਰੀ ਹੈਲਥ ਕੇਅਰ ਮਿਲ ਰਹੀ ਹੈ। ਇਸ ਤੋਂ ਪਹਿਲਾਂ ਇੱਕ ਪ੍ਰੈੱਸ ਬ੍ਰੀਫਿੰਗ ਵਿੱਚ ਟਰੂਡੋ ਨੇ ਆਖਿਆ ਸੀ ਕਿ ਫੈਡਰਲ ਸਰਕਾਰ ਵਜੋਂ ਅਸੀਂ ਇਹ ਨਿਸ਼ਚਿਤ ਕਰਾਂਗੇ ਕਿ ਜਿਵੇਂ ਪ੍ਰੋਵਿੰਸਾਂ ਵੱਲੋਂ ਸੀਨੀਅਰਜ਼ ਦੀ ਕੇਅਰ ਨੂੰ ਨਿਯੰਤਰਣ ਵਿੱਚ ਕਰਨ ਲਈ ਕੰਮ ਕੀਤਾ ਜਾਵੇਗਾ ਅਸੀਂ ਉਨ੍ਹਾਂ ਨੂੰ ਸਹਿਯੋਗ ਦੇਣ ਲਈ ਉੱਥੇ ਹੋਵਾਂਗੇ।
ਜਗਮੀਤ ਸਿੰਘ ਨੇ ਆਖਿਆ ਕਿ ਇਸ ਤਰ੍ਹਾਂ ਦੀ ਬਿਆਨਬਾਜ਼ੀ ਕਰਕੇ ਫੈਡਰਲ ਸਰਕਾਰ ਆਪਣਾ ਪੱਲਾ ਨਹੀਂ ਛੁਡਾ ਸਕਦੀ। ਇਸ ਸਮੇਂ ਲੋੜ ਹੈ ਕਿ ਫੈਡਰਲ ਸਰਕਾਰ ਅਹਿਮ ਭੂਮਿਕਾ ਨਿਭਾਵੇ।