ਨਵੀਂ ਦਿੱਲੀ, 31 ਮਈ (ਪੋਸਟ ਬਿਊਰੋ)- ਦਿੱਲੀ ਤੋਂ ਮਾਸਕੋ ਜਾਂਦੇ ਏਅਰ ਇੰਡੀਆ ਦੇ ਇੱਕ ਜਹਾਜ਼ ਨੂੰ ਕੱਲ੍ਹ ਅੱਧੀ ਦੂਰੀ ਤੋਂ ਮੁੜਨਾ ਪਿਆ ਜਦੋਂ ਹਵਾਬਾਜ਼ੀ ਕੰਪਨੀ ਦੀ ਗਰਾਊਂਡ ਟੀਮ ਨੂੰ ਪਤਾ ਲੱਗਾ ਕਿ ਇੱਕ ਪਾਇਲਟ ਕੋਰੋਨਾ ਵਾਇਰਸ ਨਾਲ ਪੀੜਤ ਹੈ। ਅਧਿਕਾਰੀਆਂ ਨੇ ਇਸ ਬਾਰੇ ਮੀਡੀਆ ਨੂੰ ਜਾਣਕਾਰੀ ਦਿੱਤੀ ਹੈ।
ਏਅਰ ਇੰਡੀਆ ਦੇ ਸੀਨੀਅਰ ਅਧਿਕਾਰੀਆਂ ਨੇ ਦੱਸਿਆ ਕਿ ਏ 320 ਜਹਾਜ਼ 'ਚ ਕੋਈ ਯਾਤਰੀ ਨਹੀਂ ਸੀ। ਵੰਦੇ ਭਾਰਤ ਮੁਹਿੰਮ ਹੇਠ ਫਸੇ ਹੋਏ ਭਾਰਤੀਆਂ ਨੂੰ ਲਿਆਉਣ ਲਈ ਜਹਾਜ਼ ਮਾਸਕੋ ਜਾਣਾ ਸੀ। ਜਦੋਂ ਜਹਾਜ਼ ਉਜ਼ਬੇਕਿਸਤਾਨ ਦੀ ਹਵਾਈ ਸਰਹੱਦ 'ਤੇ ਪਹੁੰਚਿਆ ਤਾਂ ਸਾਡੀ ਗਰਾਊਂਡ ਟੀਮ ਨੂੰ ਪਤਾ ਲੱਗ ਗਿਆ ਕਿ ਇੱਕ ਪਾਇਲਟ ਵਿੱਚ ਕੋਵਿਡ 19 ਦੀ ਪੁਸ਼ਟੀ ਹੋਈ ਹੈ। ਅਧਿਕਾਰੀਆਂ ਨੇ ਕਿਹਾ, ਜਹਾਜ਼ ਨੂੰ ਓਸੇ ਵੇਲੇ ਵਾਪਸ ਸੱਦ ਲਿਆ ਗਿਆ। ਉਹ ਕੱਲ੍ਹ ਕਰੀਬ ਸਾਢੇ ਚਾਰੇ ਵਜੇ ਦਿੱਲੀ ਪਹੁੰਚਿਆ। ਚਾਲਕ ਦਲ ਦੇ ਮੈਂਬਰਾਂ ਨੂੰ ਇਕਾਂਤਵਾਸ 'ਚ ਰੱਖਿਆ ਗਿਆ ਹੈ। ਅਧਿਕਾਰੀਆਂ ਮੁਤਾਬਕ ਮਾਸਕੋ ਵਿੱਚ ਫਸੇ ਹੋਏ ਭਾਰਤੀਆਂ ਨੂੰ ਵਾਪਸ ਲਿਆਉਣ ਲਈ ਦੂਜਾ ਜਹਾਜ਼ ਭੇਜਿਆ ਜਾਵੇਗਾ।