ਚੰਡੀਗੜ੍ਹ, 31 ਮਈ (ਪੋਸਟ ਬਿਊਰੋ)- ਭਾਰਤ ਸਰਕਾਰ ਦੀ ਨਿਯੁਕਤੀਆਂ ਬਾਰੇ ਕਮੇਟੀ ਨੇ ਪੰਜਾਬ ਪੁਲਸ ਦੇ ਡੀ ਜੀ ਪੀ ਦਿਨਕਰ ਗੁਪਤਾ ਨੂੰ ਡਾਇਰੈਕਟਰ ਜਨਰਲ, ਡੀ ਜੀ ਆਈ ਦੇ ਅਹੁਦੇ ਲਈ ਨਿਯੁਕਤ ਕਰਨ ਵਾਲੀ ਸੂਚੀ ਵਿੱਚ ਪਾਏ ਜਾਣ ਦੀ ਮਨਜ਼ੂਰੀ ਦੇ ਦਿੱਤੀ ਹੈ। ਸਰਕਾਰੀ ਬੁਲਾਰੇ ਅਨੁਸਾਰ ਗੁਪਤਾ ਆਈ ਪੀ ਐੱਸ ਦੇ 1987 ਬੈਚ ਦੇ 11 ਅਫਸਰਾਂ 'ਚੋਂ ਇੱਕ ਹਨ, ਜਿਨ੍ਹਾਂ ਵਿੱਚ ਦੇਸ਼ ਵਿੱਚੋਂ 100 ਤੋਂ ਵੱਧ ਆਈ ਪੀ ਐੱਸ ਅਧਿਕਾਰੀ ਸਨ।
ਇਸ ਬਾਰੇ ਭਾਰਤ ਸਰਕਾਰ ਵੱਲੋਂ ਡੀ ਜੀ ਪੀ ਪੱਧਰ ਦੇ ਨਾਲ ਡੀ ਜੀ ਪੀ (ਕੇਂਦਰ) ਦੇ ਬਰਾਬਰ ਦੀਆਂ ਪੋਸਟਾਂ ਦੇ ਵੀ ਅਧਿਕਾਰ ਹੋਣਗੇ। ਦਿਨਕਰ ਗੁਪਤਾ ਉਤਰ ਭਾਰਤ (ਪੰਜਾਬ, ਹਰਿਆਣਾ, ਹਿਮਾਚਲ ਪ੍ਰਦੇਸ਼, ਜੰਮੂ ਕਸ਼ਮੀਰ, ਉੱਤਰ ਪ੍ਰਦੇਸ਼, ਉਤਰਾਖੰਡ, ਰਾਜਸਥਾਨ) ਦੇ ਇੱਕੋ ਆਈ ਪੀ ਐੱਸ ਅਫਸਰ ਹਨ, ਜਿਸ ਨੂੰ ਇਹ ਅਧਿਕਾਰ ਮਿਲੇ ਹਨ। ਪੰਜਾਬ ਕੇਡਰ ਦੇ ਸੇਵਾ ਨਿਭਾ ਰਹੇ ਇੱਕ ਹੋਰ ਆਈ ਪੀ ਐੱਸ ਅਧਿਕਾਰੀ, ਜਿਸ ਨੂੰ ਡੀ ਜੀ ਪੀ ਵਜੋਂ ਕੇਂਦਰ ਵਿੱਚ ਡੀ ਜੀ ਪੀ ਦੀ ਪੋਸਟ ਉੱਤੇ ਰੱਖਣ ਦਾ ਅਧਿਕਾਰ ਮਿਲਿਾ ਹੈ, ਉਹ ਆਰ ਏ ਡਬਲਯੂ ਦੇ ਮੁਖੀ ਸਾਮੰਤ ਗੋਇਲ ਹਨ।
ਦਿਨਕਰ ਗੁਪਤਾ ਅਪ੍ਰੈਲ 2018 ਵਿੱਚ ਭਾਰਤ ਸਰਕਾਰ ਵੱਲੋਂ ਏ ਡੀ ਜੀ ਪੀ ਵਜੋਂ ਸੂਚੀਬੱਧ ਕੀਤੇ ਗਏ ਆਈ ਪੀ ਐੱਸ ਦੇ 1987 ਬੈਚ ਦੇ 20 ਅਫਸਰਾਂ 'ਚੋਂ ਇੱਕ ਸਨ। ਉਨ੍ਹਾਂ ਨੂੰ ਆਲ ਇੰਡੀਆ ਸਰਵੇ ਦੇ ਆਧਾਰ ਉੱਤੇ ਫੇਮ ਇੰਡੀਆ ਮੈਗਜ਼ੀਨ ਨੇ ਦੇਸ਼ ਦੇ ਚੋਟੀ ਦੇ 25 ਆਈ ਪੀ ਐੱਸ ਅਫਸਰਾਂ ਵਿੱਚੋਂ ਵੀ ਚੁਣਿਆ ਸੀ।