ਨਿਊ ਯਾਰਕ, 31 ਮਈ (ਪੋਸਟ ਬਿਊਰੋ)- ਫਲੋਰੀਡਾ ਦੀ ਇੱਕ ਔਰਤ ਨੂੰ ਪੱਛਮੀ ਏਸ਼ੀਆ ਵਿੱਚ ਕੌਮਾਂਤਰੀ ਅੱਤਵਾਦੀ ਸੰਗਠਨ ਇਸਲਾਮਕ ਸਟੇਟ (ਆਈ ਐੱਸ) ਦੀ ਮਦਦ ਦੇ ਦੋਸ਼ ਵਿੱਚ ਪੰਜ ਸਾਲ 10 ਮਹੀਨੇ ਦੀ ਕੈਦ ਦੀ ਸਜ਼ਾ ਹੋਈ ਹੈ। ਔਰਤ ਨੂੰ ਬੰਬ ਧਮਾਕੇ ਵਜੋਂ ਲਈ ਮੋਬਾਈਲ ਭੇਜਣ ਦਾ ਦੋਸ਼ੀ ਠਹਿਰਾਇਆ ਗਿਆ ਸੀ।
ਪੁੰਟਾ ਗੋਰਡਾ ਦੀ ਐਲੀਸਨ ਮੈਰੀ ਸ਼ੇਪਰਡ (35) ਨੂੰ ਆਈ ਐਸ ਦੀ ਮਦਦ ਕਰਨ ਦੀ ਕੋਸ਼ਿਸ਼ ਦੇ ਮਾਮਲੇ ਵਿੱਚ ਫੋਰਟ ਮਾਇਰਸ ਫੈਡਰਲ ਅਦਾਲਤ ਵਿੱਚ ਪਿਛਲੇ ਸਾਲ ਦੋਸ਼ੀ ਠਹਿਰਾਇਆ ਗਿਆ ਸੀ। ਅਦਾਲਤੀ ਦਸਤਾਵੇਜ਼ਾਂ ਅਨੁਸਾਰ ਐਲੀਸਨ ਨੇ 2016 ਵਿੱਚ ਫੇਸਬੁਕ ਤੇ ਹੋਰ ਸ਼ੋਸ਼ਲ ਮੀਡੀਆ ਮਾਧਿਅਮਾਂ ਦੀ ਮਦਦ ਨਾਲ ਸਲਾਫੀ ਜੇਹਾਦੀ ਵਿਚਾਰਧਾਰਾ ਅਤੇ ਆਈ ਐੱਸ ਨੂੰ ਸਮਰਥਨ ਦੇਣ ਵਾਲੇ ਲੋਕਾਂ ਨਾਲ ਜੁੜਨਾ ਸ਼ੁਰੂ ਕੀਤਾ ਸੀ। ਉਸ ਨੇ ਉਨ੍ਹਾਂ ਲੋਕਾਂ ਨਾਲ ਸੋਸ਼ਲ ਮੀਡੀਆ 'ਤੇ ਕੋਡ ਭਾਸ਼ਾ ਵਿੱਚ ਵੀ ਗੱਲਬਾਤ ਕੀਤੀ, ਜਿਨ੍ਹਾਂ ਨੂੰ ਉਹ ਆਈ ਐੱਸ ਦਾ ਸਮਰਥਕ ਮੰਨਦੀ ਸੀ। ਇਨ੍ਹਾਂ ਵਿੱਚੋਂ ਇੱਕ ਨੂੰ ਬਾਅਦ ਵਿੱਚ ਐੱਫ ਬੀ ਆਈ ਨੇ ਫੜ ਲਿਆ ਅਤੇ ਉਸ ਨੇ ਫੈਡਰਲ ਕਾਨੂੰਨ ਏਜੰਸੀ ਨਾਲ ਸਹਿਯੋਗ ਕਰਨਾ ਸ਼ੁਰੂ ਕਰ ਦਿੱਤਾ ਸੀ। ਐਲੀਸਨ ਨੇ ਦੋ ਖੁਫੀਆ ਏਜੰਟਾਂ ਨੂੰ ਆਈ ਐੱਸ ਸਮਰਥਕ ਸਮਝ ਕੇ ਉਨ੍ਹਾਂ ਨਾਲ ਵੀ ਗੱਲਬਾਤ ਸ਼ੁਰੂ ਕੀਤੀ। ਵਕੀਲਾਂ ਅਨੁਸਾਰ ਉਸ ਨੇ ਜੂਨ 2017 ਵਿੱਚ ਏਜੰਟਾਂ ਨੂੰ ਦੱਸਿਆ ਕਿ ਉਹ ਆਈ ਐੱਸ ਲਈ ਮੋਬਾਈਲ ਫੋਨ ਖਰੀਦ ਕੇ ਭਿਜਵਾ ਸਕਦੀ ਹੈ। ਉਸ ਨੇ ਅਗਲੇ ਮਹੀਨੇ 10 ਮੋਬਾਈਲ ਫੋਨ ਖਰੀਦੇ ਤੇ ਇਹ ਸੋਚ ਕੇ ਇੱਕ ਏਜੰਟ ਨੂੰ ਭੇਜੇ ਕਿ ਉਹ ਪੱਛਮੀ ਏਸ਼ੀਆ ਵਿੱਚ ਇਸ ਨੂੰ ਭੇਜ ਦੇਵੇਗਾ ਅਤੇ ਉਨ੍ਹਾਂ ਦੀ ਵਰਤੋਂ ਪ੍ਰੈਸ਼ਰ ਕੁੱਕਰ ਬੰਬ ਬਣਾਉਣ ਵਿੱਚ ਕੀਤੀ ਜਾਵੇਗੀ।