ਪਟਿਆਲਾ, 30 ਮਈ, (ਪੋਸਟ ਬਿਊਰੋ)- ਕਈ ਸਾਲ ਪਹਿਲਾਂ ਫਰਾਡ ਦੇ ਕੇਸ ਵਿੱਚ ਸੀ ਬੀ ਆਈ ਵੱਲੋਂ ਨਾਮਜ਼ਦ ਕੀਤੇ ਗਏ ਇਕ ਵਿਅਕਤੀ ਨੇ ਆਪਣੇ ਪਰਿਵਾਰ ਰਾਹੀਂ ਮੌਤ ਦਾ ਸਰਟੀਫਿਕੇਟ ਦੇ ਕੇ ਆਪਣੇ-ਆਪ ਨੂੰ ਮਰਿਆ ਸਾਬਤ ਕਰਵਾ ਦਿੱਤਾ ਅਤੇ ਅਮਰੀਕਾ ਜਾ ਕੇ ਉਸ ਵਿਅਕਤੀ ਨੇ ਓਥੋਂ ਦੀ ਨਾਗਰਿਕਤਾ ਲੈ ਲਈ। ਉਸ ਨੂੰ ਸੀ ਬੀ ਆਈ ਨੇ ਪਟਿਆਲੇ ਦੇ ਪੰਜਾਬੀ ਬਾਗ਼ ਵਿੱਚੋਂ ਅੱਜ ਉਸ ਦੀ ਕੋਠੀ ਵਿੱਚੋਂ ਜਿੰਦਾ ਗ੍ਰਿਫਤਾਰ ਕਰ ਲਿਆ ਹੈ।
ਫੜੇ ਗਏ ਦੋਸ਼ੀ ਨਿਰਮਲ ਸਿੰਘ ਬਾਠ ਦੇ ਨਾਲ ਸੀ ਬੀ ਆਈ ਨੇ ਇਸ ਕੇਸ ਵਿੱਚ ਉਸ ਦੀ ਪਤਨੀ ਪ੍ਰਮਿੰਦਰ ਕੌਰ ਬਾਠ ਨੂੰ ਵੀ ਨਾਮਜ਼ਦ ਕਰ ਲਿਆ ਹੈ। ਉਸ ਉੱਤੇ ਨਿਰਮਲ ਸਿੰਘ ਦੀ ਲੁਕਣ ਵਿੱਚ ਮਦਦ ਕਰਨ ਦਾ ਦੋਸ਼ ਹੈ। ਅੱਜ ਏਥੇ ਪੁੱਜੀ ਸੀ ਬੀ ਆਈ ਟੀਮ ਨੇ ਇਸ ਜੋੜੇ ਨੂੰ ਉਨ੍ਹਾਂ ਦੇ ਘਰੋਂ ਫੜਿਆ ਹੈ। ਪਤਾ ਲੱਗਾ ਹੈ ਕਿ 1985 ਵਿਚ ਨਿਰਮਲ ਸਿੰਘ ਬਾਠ ਯੂਕੋ ਬੈਂਕ ਜਲੰਧਰ ਦਾ ਮੈਨੇਜਰ ਹੁੰਦਾ ਸੀ ਤੇ ਓਦੋਂ ਦੇ ਇੱਕ ਮਾਮਲੇ ਵਿੱਚ ਨਿਰਮਲ ਸਿੰਘ ਦੇ ਖਿਲਾਫ ਧੋਖਾਧੜੀ ਦਾ ਕੇਸ 1990 ਵਿੱਚ ਸੀ ਬੀ ਆਈ ਚੰਡੀਗੜ੍ਹ ਵਿਖੇ ਕੇਸ ਦਰਜ ਹੋਇਆ ਸੀ। ਦੋ ਸਾਲ ਅੰਦਰ ਅਦਾਲਤ ਨੇ ਉਸ ਨੂੰ ਭਗੌੜਾ ਵੀ ਐਲਾਨ ਕਰ ਦਿੱਤਾ ਸੀ। ਇਸ ਪਿੱਛੋਂ ਉਸ ਦੇ ਪਰਿਵਾਰ ਨੇ ਲੋਕਾਂ ਨੂੰ ਦੱਸਿਆ ਕਿ ਨਿਰਮਲ ਸਿੰਘ ਮਰ ਗਿਆ ਤੇ ਉਸ ਦਾ ਅੰਤਮ ਸਸਕਾਰ ਕਰ ਦਿੱਤਾ ਹੈ। ਫਿਰ ਉਸ ਦੀ ਮੌਤ ਸਰਟੀਫਿਕੇਟ ਬਣਾ ਕੇ ਅੱਗੇ ਸੀ ਬੀ ਆਈ ਨੂੰ ਦੇ ਦਿੱਤਾ। ਦੂਸਰੇ ਪਾਸੇ ਨਿਰਮਲ ਸਿੰਘ ਫ਼ਰਜ਼ੀ ਨਾਂ ਉੱਤੇ ਪਾਸਪੋਰਟ ਬਣਵਾ ਕੇ ਵਿਦੇਸ਼ ਗਿਆ ਅਤੇ ਅਮਰੀਕਾ ਦੀ ਸਿਟੀਜ਼ਨਸਿ਼ਪ ਲੈ ਲਈ। ਉਸ ਦੀ ਪਤਨੀ ਇਕ ਯੂ-ਟਿਊਬ ਚੈਨਲ ਚਲਾਉਂਦੀ ਸੀ, ਜਿਹੜਾ ਪਿਛਲੇ ਮਹੀਨੇ ਇਕ ਹੋਰ ਵਿਅਕਤੀ ਨੂੰ ਸੌਂਪ ਦਿੱਤਾ ਸੀ ਤੇ ਉਸ ਨਾਲ ਇਨ੍ਹਾਂ ਦਾ ਵਿਵਾਦ ਚੱਲਣ ਕਾਰਨ ਇਹ ਕੇਸ ਥਾਣਾ ਸਿਵਲ ਲਾਈਨ ਪੁਲਿਸ ਕੋਲ ਪੁੱਜ ਗਿਆ ਸੀ। ਇਸ ਸ਼ਿਕਾਇਤ ਵਿੱਚ ਨਿਰਮਲ ਸਿੰਘ ਦੀ ਪਤਨੀ ਪ੍ਰਮਿੰਦਰ ਕੌਰ ਉੱਤੇ ਦਫ਼ਤਰ ਵਿਚ ਰੱਖੇ ਹੋਏ ਧਾਰਮਿਕ ਚਿੰਨ੍ਹ ਦੀ ਬੇਅਦਬੀ ਦੇ ਦੋਸ਼ ਲਾਏ ਗਏ ਸਨ। ਇਸੇ ਦੌਰਾਨ ਨਿਰਮਲ ਸਿੰਘ ਵੀ ਵਿਦੇਸ਼ ਤੋਂ ਵਾਪਸ ਆ ਗਿਆ ਤਾਂ ਪੁਰਾਣੇ ਕੇਸ ਦੀ ਸੂਚਨਾ ਸੀ ਬੀ ਆਈ ਨੂੰ ਵੀ ਮਿਲ ਗਈ ਤੇ ਉਨ੍ਹਾਂ ਨੇ ਛਾਪਾ ਮਾਰ ਕੇ ਇਨ੍ਹਾਂ ਨੂੰ ਫੜ ਲਿਆ।
ਸੀ ਬੀ ਆਈ ਵੱਲੋਂ ਗ੍ਰਿਫਤਾਰੀ ਦੇ ਵਕਤ ਨਿਰਮਲ ਸਿੰਘ ਬੇਹੋਸ਼ ਹੋ ਗਿਆ। ਦੱਸਿਆ ਜਾਂਦਾ ਹੈ ਕਿ ਨਿਰਮਲ ਸਿੰਘ (62) ਦਿਲ ਦਾ ਮਰੀਜ਼ ਹੈ ਤੇ ਉਸ ਦਾ ਆਪ੍ਰਰੇਸ਼ਨ ਹੋ ਚੁੱਕਾ ਹੈ। ਸ਼ਨਿਚਰਵਾਰ ਸਵੇਰੇ ਜਦੋਂ ਸੀ ਬੀ ਆਈ ਟੀਮ ਨਿਰਮਲ ਦੇ ਘਰ ਪੁੱਜੀ ਤਾਂ ਦੇਖ ਕੇ ਉਹ ਬੇਹੋਸ਼ ਹੋ ਗਿਆ। ਲੰਬਾ ਸਮਾਂ ਓਥੇ ਰਹਿਣ ਪਿੱਛੋਂ ਸੀ ਬੀ ਆਈ ਟੀਮ ਨਿਰਮਲ ਸਿੰਘ ਤੇ ਉਸ ਦੀ ਪਤਨੀ ਨੂੰ ਲੈ ਕੇ ਚੰਡੀਗੜ੍ਹ ਰਵਾਨਾ ਹੋ ਗਈ।