ਇਸਲਾਮਾਬਾਦ, 28 ਮਈ, (ਪੋਸਟ ਬਿਊਰੋ)- ਪਾਕਿਸਤਾਨ ਨੇ ਫਿਰ ਭਾਰਤ ਦੇ ਅੰਦਰੂਨੀ ਮਾਮਲਿਆਂ ਵਿਚ ਦਖਲ ਦੇਣ ਦਾ ਯਤਨ ਕੀਤਾ ਅਤੇ ਅਯੁੱਧਿਆ ਵਿਚ ਰਾਮ ਮੰਦਰ ਦੀ ਉਸਾਰੀ ਬਾਰੇ ਸਵਾਲ ਚੁੱਕ ਕੇ ਭਾਰਤ ਦੀ ਨਿੰਦਾ ਕੀਤੀ ਹੈ। ਉਸ ਦੀ ਇਸ ਟਿੱਪਣੀ ਉੱਤੇ ਅਯੁੱਧਿਆ ਦੇ ਸੰਤ ਭੜਕ ਗਏ ਹਨ।
ਕੱਲ੍ਹ ਬੁੱਧਵਾਰ ਪਾਕਿਸਤਾਨ ਦੇ ਵਿਦੇਸ਼ ਮੰਤਰਾਲਾ ਨੇ ਬਿਆਨ ਜਾਰੀ ਕਰ ਕੇ ਕਿਹਾ ਹੈ ਕਿ ਜਦੋਂ ਦੁਨੀਆ ਕੋਰੋਨਾ ਦੀ ਮਹਾਮਾਰੀ ਨਾਲ ਜੂਝ ਰਹੀ ਹੈ, ਓਦੋਂ ਆਰ ਐਸ ਐਸ ਅਤੇ ਭਾਜਪਾ ਹਿੰਦੂਤਵ ਦੇ ਏਜੰਡੇ ਨੂੰ ਲਾਗੂ ਕਰਨ ਵਿਚ ਰੁੱਝੀ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਅਯੁੱਧਿਆ ਵਿਚ ਮੰਦਰ ਉਸਾਰੀ ਦੀ ਸ਼ੁਰੂਆਤ ਇਸ ਪਾਸੇ ਵੱਲ ਇੱਕ ਹੋਰ ਕਦਮ ਹੈ, ਜਿਹੜਾ ਦੱਸਦਾ ਹੈ ਕਿ ਭਾਰਤ ਵਿਚ ਮੁਸਲਮਾਨਾਂ ਨੂੰ ਹਾਸ਼ੀਏ ਉੱਤੇ ਰੱਖਿਆ ਜਾ ਰਿਹਾ ਹੈ? ਪਾਕਿਸਤਾਨ ਸਰਕਾਰ ਤੇ ਇਸ ਦੇ ਲੋਕ ਇਸ ਦੀ ਸਖਤ ਨਿੰਦਾ ਕਰਦੇ ਹਨ।
ਭਾਰਤ ਸਰਕਾਰ ਨੇ ਰਾਮ ਮੰਦਰ ਪਿਛਲੇ ਸਾਲ ਭਾਰਤੀ ਸੁਪਰੀਮ ਕੋਰਟ ਦੇ ਫੈਸਲੇ ਉੱਤੇ ਪਾਕਿਸਤਾਨ ਵੱਲੋਂ ਕੀਤੀ ਗਈ ਇਸ ਅਣ-ਉਚਿਤ ਤੇ ਬੇ-ਮਤਲਬ ਦੀਆਂ ਟਿੱਪਣੀ ਨੂੰ ਵਾਰ-ਵਾਰ ਰੱਦ ਕੀਤਾ ਹੈ। ਉਸ ਦਾ ਕਹਿਣਾ ਹੈ ਕਿ ਭਾਰਤ ਦੀ ਸੁਪਰੀਮ ਕੋਰਟ ਦੇ ਇਹ ਫੈਸਲਾ ਇੱਕ ਨਾਗਰਿਕ ਕੇਸ ਉੱਤੇ ਪੂਰੀ ਤਰ੍ਹਾਂ ਇਸ ਦੇਸ਼ ਦਾ ਅੰਦਰੂਨੀ ਮਾਮਲਾ ਹੈ।
ਬਾਬਰੀ ਮਸਜਿਦ ਬਨਾਮ ਰਾਮ ਜਨਮ ਭੂਮੀ ਕੇਸ ਵਿਚ ਵਿਰੋਧੀ ਧਿਰ ਇਕਬਾਲ ਅੰਸਾਰੀ ਨੇ ਵੀ ਅੱਜ ਇਹ ਕਿਹਾ ਹੈ ਕਿ ਪਾਕਿਸਤਾਨ ਸਾਡੇ ਅੰਦਰੂਨੀ ਮਾਮਲਿਆਂ ਵਿਚ ਦਖਲ ਨਾ ਦੇਵੇ, ਵਰਨਾ ਅਸੀਂ ਇਸਲਾਮਾਬਾਦ ਵਿਚ ਵੀ ਇੱਕ ਰਾਮ ਮੰਦਰ ਬਣਾ ਦੇਵਾਂਗੇ। ਉਨ੍ਹਾਂ ਨੇ ਕਿਹਾ ਕਿ ਪਾਕਿਸਤਾਨ ਕੌਣ ਹੈ ਇਤਰਾਜ਼ ਕਰਨ ਵਾਲਾ?
ਇਸ ਦੌਰਾਨ ਪਾਕਿਸਤਾਨ ਵਿੱਚ ਬੀਤੇ 24 ਘੰਟਿਆਂ ਵਿੱਚ ਕੋਰੋਨਾ ਦੇ 2,076 ਨਵੇਂ ਕੇਸ ਮਿਲਣ ਨਾਲ ਦੇਸ਼ ਵਿਚ ਕੋਰੋਨਾ ਦੇ ਕੇਸਾਂ ਦੀ ਗਿਣਤੀ ਵੀਰਵਾਰ 61,227 ਨੂੰ ਪੁੱਜ ਗਈ ਹੈ। ਸਭ ਤੋਂ ਵੱਧ 24,206 ਕੇਸ ਸਿੰਧ ਸੂਬੇ ਵਿੱਚ ਹਨ, ਜਦ ਕਿ ਪੰਜਾਬ ਵਿੱਚ 22,037, ਖ਼ੈਬਰ ਪਖਤੂਨਖਵਾ ਵਿੱਚ 8,483, ਬਲੋਚਿਸਤਾਨ ਵਿੱਚ 3,616 ਅਤੇ ਇਸਲਾਮਾਬਾਦ ਵਿੱਚ 2,015 ਕੇਸਾਂ ਦੇ ਨਾਲ ਗਿਲਗਿਤ ਬਾਲਟਿਸਤਾਨ ਵਿੱਚ 651 ਤੇ ਮਕਬੂਜ਼ਾ ਕਸ਼ਮੀਰ ਵਿੱਚ 219 ਕੇਸ ਮਿਲੇ ਹਨ। ਇਸ ਦੇਸ਼ ਵਿੱਚ ਕੋਰੋਨਾ ਵਾਇਰਸ ਦੇ ਕਾਰਨ ਅੱਜ ਤੱਕ 1260 ਲੋਕਾਂ ਦੀ ਮੌਤ ਵੀ ਹੋ ਚੁੱਕੀ ਹੈ।