ਪਾਤੜਾਂ, 28 ਮਈ (ਪੋਸਟ ਬਿਊਰੋ)- ਨੈਸ਼ਨਲ ਹਾਈਵੇ ਉੱਤੇ ਪਿੰਡ ਦੁਗਲ ਨੇੜੇ ਤੇਜ਼ ਰਫ਼ਤਾਰ ਕਾਰ ਦੇ ਡਰੇਨ ਵਿੱਚ ਡਿਗਣ ਨਾਲ ਇਸ 'ਚ ਸਵਾਰ ਦੋ ਨੌਜਵਾਨਾਂ ਦੀ ਮੌਤ ਹੋ ਗਈ ਅਤੇ ਤਿੰਨ ਜ਼ਖ਼ਮੀ ਹੋ ਗਏ। ਇਸ ਹਾਦਸੇ ਵਿੱਚ ਮਾਰੇ ਗਏ ਪਿੰਡ ਲਾਡਵੰਜਾਰਾ ਕਲਾਂ ਦੇ ਯਾਦਪ੍ਰੀਤ ਸਿੰਘ (26) ਦਾ ਜਨਮ ਦਿਨ ਸੀ ਅਤੇ ਕੱਲ੍ਹ ਸ਼ਾਮ ਆਪਣੇ ਚਾਰ ਹੋਰ ਦੋਸਤਾਂ ਨਾਲ ਮਿਲ ਕੇ ਮੋਟਰ 'ਤੇ ਪਾਰਟੀ ਕਰਨ ਮਗਰੋਂ ਆਪਣੇ ਦੋਸਤਾਂ ਨੂੰ ਉਨ੍ਹਾਂ ਦੇ ਘਰ ਛੱਡਣ ਜਾ ਰਿਹਾ ਸੀ।
ਪਿੰਡ ਲਾਡਵੰਜਾਰਾ ਕਲਾਂ ਦੇ ਸੁਜਾਨ ਸਿੰਘ ਨੇ ਦੱਸਿਆ ਕਿ ਉਸ ਦੇ ਪੁੱਤਰ ਯਾਦਪ੍ਰੀਤ ਸਿੰਘ, ਜਿਸ ਦਾ ਬੀਤੇ ਦਿਨ ਜਨਮ ਦਿਨ ਸੀ, ਨੇ ਕਿਹਾ ਕਿ ਉਹ ਆਪਣੇ ਦੋਸਤਾਂ ਨਾਲ ਰੋਟੀ ਖਾਣ ਆਵੇਗਾ, ਪਰ ਉਹ ਨਹੀਂ ਆਏ ਤੇ ਸਵੇਰੇ ਚਾਰ ਵਜੇ ਫ਼ੋਨ ਆਉਣ 'ਤੇ ਹਸਪਤਾਲ ਪੁੱਜੇ ਤਾਂ ਪਤਾ ਲੱਗਾ ਕਿ ਕਾਰ ਦੁਗਾਲ ਪਿੰਡ ਨੇੜੇ ਡਰੇਨ ਵਿੱਚ ਡਿਗਣ 'ਤੇ ਉਸ ਦੀ ਮੌਤ ਹੋ ਗਈ ਹੈ। ਇਸੇ ਤਰ੍ਹਾਂ ਪਿੰਡ ਚੱਠਾ ਨਨੇੜਾ ਦੇ ਗੁਰਵਿੰਦਰ ਸਿੰਘ ਨੇ ਦੱਸਿਆ ਕਿ ਉਸ ਦੇ ਭਰਾ ਕੁਲਵਿੰਦਰ ਸਿੰਘ ਦੀ ਇਸ ਕਾਰ ਹਾਦਸੇ 'ਚ ਮੌਤ ਹੋ ਗਈ। ਪਾਤੜਾਂ ਦੇ ਸਰਕਾਰੀ ਹਸਪਤਾਲ ਦੇ ਐਸ ਐਮ ਓ ਰਮੇਸ਼ ਕੁਮਾਰ ਨੇ ਦੱਸਿਆ ਕਿ ਹਾਦਸੇ ਮਗਰੋਂ ਹਸਪਤਾਲ 'ਚ ਲਿਆਂਦੇ ਗਏ ਪੰਜ ਕਾਰ ਸਵਾਰਾਂ 'ਚ ਯਾਦਪ੍ਰੀਤ ਸਿੰਘ ਅਤੇ ਕੁਲਵਿੰਦਰ ਸਿੰਘ ਮ੍ਰਿਤਕ ਪਾਏ ਰਾਏ, ਜਦੋਂ ਕਿ ਮੋਹਾਲੀ ਦੇ ਫੋਰਟੀਜ਼ ਹਸਪਤਾਲ ਦੇ ਡਾ. ਗੁਰਵੀਰ ਸਿੰਘ ਵਾਸੀ ਘਨੌਰੀ, ਹਰਮਨਦੀਪ ਸਿੰਘ ਵਾਸੀ ਜਰਖਲਾ ਖੇੜ੍ਹੀ, ਹਰਸ਼ਦੀਪ ਸਿੰਘ ਵਾਸੀ ਘੁੰਮਡਗੜ੍ਹ ਜ਼ਿਲ੍ਹਾ ਫ਼ਤਹਿਗੜ੍ਹ ਸਾਹਿਬ ਜ਼ਖ਼ਮੀ ਸਨ, ਜਿਨ੍ਹਾਂ ਨੂੰ ਪਟਿਆਲਾ ਦੇ ਰਜਿੰਦਰਾ ਹਸਪਤਾਲ ਲਈ ਰੈਫ਼ਰ ਕਰ ਦਿੱਤਾ ਗਿਆ ਹੈ।