* ਝਗੜੇ ਦੌਰਾਨ ਗੁਰੂ ਗ੍ਰੰਥ ਸਾਹਿਬ ਦੀ ਹੋਈ ਸੀ ਬੇਅਦਬੀ
ਸੰਗਰੂਰ, 28 ਮਈ (ਪੋਸਟ ਬਿਉੂਰੋ)- ਪਿੰਡ ਗੱਗੜਪੁਰ ਦੇ ਗੁਰਦੁਆਰਾ ਸਾਹਿਬ 'ਚ ਦੋ ਪਾਠੀ ਸਿੰਘਾਂ ਦੇ ਝਗੜੇ ਦੌਰਾਨ ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਹੋਣ ਦਾ ਵੱਖ-ਵੱਖ ਸਿੱਖ ਜਥੇਬੰਦੀਆਂ ਨੇ ਗੰਭੀਰ ਨੋਟਿਸ ਲਿਆ ਹੈ। ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਤੋਂ ਦੋ ਮੈਂਬਰੀ ਟੀਮ ਨੇ ਵੀ ਓਥੇ ਪੁੱਜ ਕੇ ਘਟਨਾ ਦਾ ਜਾਇਜ਼ਾ ਲਿਆ ਹੈ।
ਵਰਨਣ ਯੋਗ ਹੈ ਕਿ ਇਹ ਘਟਨਾ ਕਰੀਬ ਨੌ ਦਿਨ ਪਹਿਲਾਂ ਵਾਪਰੀ ਸੀ। ਮਾਮਲਾ ਭਖਣ ਉੱਤੇ ਪੁਲਸ ਨੇ ਘਟਨਾ ਲਈ ਜ਼ਿੰਮੇਵਾਰ ਦੋਵੇਂ ਪਾਠੀਆਂ ਨੂੰ ਗ਼ਿਫ਼ਤਾਰ ਕਰ ਲਿਆ ਹੈ। ਪਤਾ ਲੱਗਾ ਹੈ ਕਿ ਪਿੰਡ ਗੱਗੜਪੁਰ ਦੇ ਗੁਰਦੁਆਰਾ ਸਾਹਿਬ 'ਚ ਬੀਤੀ 19 ਮਈ ਨੂੰ ਗੁਰੂ ਘਰ ਦੇ ਗ੍ਰੰਥੀ ਚਰਨਜੀਤ ਸਿੰਘ ਤੇ ਇਸ ਪਿੰਡ ਦੇ ਪਾਠੀ ਮੱਲ ਸਿੰਘ ਵਿਚਾਲੇ ਸਪੀਕਰ ਦੀ ਆਵਾਜ਼ ਘੱਟ ਕਰਨ ਦਾ ਝਗੜਾ ਹੋ ਗਿਆ ਸੀ, ਜਿਸ ਦੌਰਾਨ ਕਿਰਪਾਨ ਵੱਜਣ ਕਾਰਨ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੀੜ ਨੂੰ ਵੀ ਨੁਕਸਾਨ ਪੁੱਜਾ ਸੀ। ਇਸ ਘਟਨਾ ਦੀ ਸੂਚਨਾ ਮਿਲਣ 'ਤੇ ਪਿੰਡ ਪੁੱਜੇ ਭਾਈ ਅਮਰੀਕ ਸਿੰਘ ਅਜਨਾਲਾ, ਰਾਜਾਰਾਜ ਸਿੰਘ ਤਰਨਾ ਦਲ, ਅਮਰਜੀਤ ਸਿੰਘ ਕਣਕਵਾਲ ਭੰਗੂਆਂ ਦਮਦਮੀ ਟਕਸਾਲ, ਜਥੇਦਾਰ ਸਿੱਖ ਸਦਭਾਵਨਾ ਦਲ ਬਚਿੱਤਰ ਸਿੰਘ ਅਤੇ ਹੋਰ ਸਿੱਖ ਜਥੇਬੰਦੀਆਂ ਦੇ ਨੁਮਾਇੰਦਿਆਂ ਨੇ ਦੋਸ਼ ਲਾਇਆ ਕਿ ਪਿੰਡ ਵਾਲਿਆਂ ਨੇ ਘਟਨਾ ਨੂੰ ਗੰਭੀਰਤਾ ਨਾਲ ਨਹੀਂ ਲਿਆ ਤੇ ਤਖ਼ਤ ਦਮਦਮਾ ਸਾਹਿਬ ਨੂੰ ਸਿਰਫ਼ ਵਟਸਐਪ 'ਤੇ ਲਿਖਤੀ ਸ਼ਿਕਾਇਤ ਭੇਜੀ ਸੀ। ਤਖ਼ਤ ਸਾਹਿਬ ਨੇ ਵੀ ਮਾਮਲੇ ਨੂੰ ਗੰਭੀਰਤਾ ਨਾਲ ਨਹੀਂ ਲਿਆ ਅਤੇ ਅੱਠ ਦਿਨਾਂ ਮਗਰੋਂ ਜਾਂਚ ਟੀਮ ਭੇਜੀ ਸੀ।
ਡੀ ਐਸ ਪੀ ਸੱਤਪਾਲ ਸ਼ਰਮਾ ਦੇ ਮੁਤਾਬਕ ਗ੍ਰੰਥੀ ਚਰਨਜੀਤ ਸਿੰਘ ਵਾਸੀ ਜੰਮੂ ਅਤੇ ਮੱਲ ਸਿੰਘ ਵਾਸੀ ਗੱਗੜਪੁਰ ਖ਼ਿਲਾਫ਼ ਦਫ਼ਾ 295ਏ ਤਹਿਤ ਕੇਸ ਦਰਜ ਕਰਕੇ ਦੋਵਾਂ ਨੂੰ ਗ਼੍ਰਿਫ਼ਤਾਰ ਕਰ ਲਿਆ ਹੈ।