ਟੋਰਾਂਟੋ, 28 ਮਈ (ਪੋੋਸਟ ਬਿਊਰੋ) : ਸਿਟੀ ਵੱਲੋਂ ਟੋਰਾਂਟੋ ਦੇ ਪਾਰਕ ਵਿੱਚ ਸੋਸ਼ਲ ਡਿਸਟੈਂਸਿੰਗ ਸਰਕਲਜ਼ ਬਣਾਉਣ ਦਾ ਫੈਸਲਾ ਕੀਤਾ ਹੈ। ਮੌਸਮ ਗਰਮ ਹੋਣ ਤੋਂ ਬਾਅਦ ਇਸ ਯੋਜਨਾ ਵਿੱਚ ਥੋੜ੍ਹੀ ਦਿੱਕਤ ਆ ਰਹੀ ਹੈ।
ਮੇਅਰ ਜੌਹਨ ਟੋਰੀ ਨੇ ਆਖਿਆ ਕਿ ਪਾਰਕ ਦੇ ਸਟਾਫ ਵੱਲੋਂ ਟ੍ਰਿਨਿਟੀ ਬੈੱਲਵੁੱਡਜ਼ ਪਾਰਕ ਵਿੱਚ ਘਾਹ ਉੱਤੇ ਗੋਲੇ ਬਣਾਉਣ ਦਾ ਕੰਮ ਕੀਤਾ ਜਾਵੇਗਾ। ਉਨ੍ਹਾਂ ਆਖਿਆ ਕਿ ਇਨ੍ਹਾਂ ਗੋਲਿਆਂ ਨਾਲ ਫਿਜ਼ੀਕਲ ਦੂਰੀ ਦੀ ਸ਼ਰਤ ਪੂਰੀ ਹੋ ਜਾਵੇਗੀ। ਟੋਰੀ ਨੇ ਆਖਿਆ ਕਿ ਇਹ ਪਾਇਲਟ ਪ੍ਰੋਜੈਕਟ ਹੈ ਤੇ ਸਟਾਫ ਇਸ ਦੀ ਪ੍ਰਭਾਵਸ਼ੀਲਤਾ ਦਾ ਮੁਲਾਂਕਣ ਕਰੇਗਾ। ਫਿਰ ਇਸ ਯੋਜਨਾ ਨੂੰ ਸਿਟੀ ਦੇ ਹੋਰਨਾਂ ਪਾਰਕਾਂ ਵਿੱਚ ਵੀ ਅਜ਼ਮਾਇਆ ਜਾਵੇਗਾ।
ਇਹ ਕਦਮ ਇਸ ਲਈ ਚੱੁਕਿਆ ਗਿਆ ਕਿਉਂਕਿ ਸ਼ਨਿੱਚਰਵਾਰ ਵਾਲੇ ਦਿਨ ਟ੍ਰਿਨਿਟੀ ਬੈੱਲਵੱੁਡਜ਼ ਪਾਰਕ ਵਿੱਚ ਸੋਸ਼ਲ ਡਿਸਟੈਂਸਿੰਗ ਦੀਆਂ ਧੱਜੀਆਂ ਉਡਾਉਂਦੇ ਹੋਏ ਹਜ਼ਾਰਾਂ ਦੀ ਗਿਣਤੀ ਵਿੱਚ ਲੋਕ ਪਾਰਕ ਵਿੱਚ ਇੱਕਠੇ ਹੋ ਗਏ ਸਨ। ਸਿਟੀ ਦੀ ਐਮਰਜੰਸੀ ਮੈਨੇਜਮੈਂਟ ਟੀਮ ਦੇ ਚੀਫ ਮੈਥਿਊ ਪੈਗ ਨੇ ਆਖਿਆ ਕਿ ਸ਼ਹਿਰ ਭਰ ਦੇ ਪਾਰਕਾਂ ਵਿੱਚ ਇਸ ਵੀਕੈਂਡ ਵੱਧ ਤੋਂ ਵੱਧ ਸਕਿਊਰਿਟੀ ਲਾਈ ਜਾਵੇਗੀ ਤਾਂ ਕਿ ਇਸ ਤਰ੍ਹਾਂ ਦੀ ਘਟਨਾ ਦੁਬਾਰਾ ਨਾ ਵਾਪਰੇ।